Eks-kiraŭnik Instytuta sacyjałohii Koršunaŭ pra ŭładnaje apytańnie: Heta prosta niejkija ličby, da jakich šmat pytańniaŭ
Źjavilisia vyniki «apytańnia hramadskaj dumki» da «Usiebiełaruskaha narodnaha schodu». Vyniki supiarečać tamu, što biełarusy bačać na ŭłasnyja vočy, ale zatoje pryjemnyja dla ŭładaŭ — heta styl pracy praŭładnaha analityčnaha centra Ecoom Siarhieja Musijenki.
Čytajcie. Praŭładnyja sacyjołahi: Łukašenku daviarajuć 66,5% biełarusaŭ
«Naša Niva» paprasiła prakamientavać hetaje apytańnie Hienadzia Koršunava, byłoha kiraŭnika Instytuta sacyjałohii Akademii navuk.
Pavodle zamieraŭ Instytuta sacyjałohii, uviesnu 2020 hoda ŭzrovień davieru da Łukašenki trymaŭsia 33,5% pa Biełarusi. I heta jašče ŭ davybarčy pieryjad, jašče navat da pasadki Viktara Babaryki.
Hienadź Koršunaŭ, fota BIEŁTA
«U mianie pakul što šmat pytańniaŭ da hetaha apytańnia: chto jaho pravodziŭ? Jak pravodziŭ? Jakija byli pytańni? Chto na ich adkazvaŭ? Jakaja meta? Jakaja sistema zadač? Jakaja sistema hipotez? U prafiesijnaj sacyjałahičnaj supolnaści nichto nie bačyć adkazaŭ», — kaža Koršunaŭ.
«Nu i navošta było apytvać 10 tysiač? Zvyčajna navat tysiačy respandentaŭ dastatkova, kali my robim sacyjałohiju pa Biełarusi. A dziesiać tysiač — heta kali treba atrymać vielmi detalovuju karcinu pa kožnaj sacyjalna-demahrafičnaj hrupie, pa kožnaj vobłaści.
Apytvać 10 tysiač čałaviek, jak pakazvaje praktyka, vielmi doraha i doŭha — heta miesiacy pracy, ja takoje rabiŭ. Kali jany zrabili toje ž mienš jak za 4 tydni — heta niejki niejmavierny, fiejeryčny sacyjałahičny pośpiech.
Pytańni da mietadaŭ, jak ja čytaŭ — častku apytvali pa telefonie, častku fejs-tu-fejs. U čym sens piłataža pa telefonie? Heta roznyja mietady.
Vielmi šmat supiarečnaściaŭ.
Jak ja razumieju, častku ludziej apytvali na pradpryjemstvach. Heta ekanamična aktyŭnaje nasielnictva. Druhi etap — prosta vypadkovaje apytańnie. Ale jak jano pravodziłasia? Na vulicach? Marozam? Pa kvaterach pry kavidzie? Nieviadoma. Ale jak złučyć hetyja dva błoki potym u adno? Vielmi ciažkaja zadača.
Nu i šykoŭnaja ŭsio ž situacyja z terminami. Nibyta 8 lutaha byŭ skončany zbor infarmacyi, a 10 lutaha ŭžo pakazali danyja — heta jany paśpieli dziesiać tysiač šmatstaronkavych adkazaŭ unieści ŭ bazu i davieści jaje da pracoŭnaha režymu za dva dni? Fiejeryčna!
Z takoj kolkaściu respandentaŭ čas na apracoŭku taksama istotny, jość paniaćcie «ramontu vybarki», kali pa niejkaj hrupie jość častka niajakasnych adkazaŭ. Heta prafiesijnyja matematyčnyja rečy, jakija patrabujuć času i raźlikaŭ.
Zrešty, mnie tak i nie zrazumieła, chto hetaje apytańnie rabiŭ.
Ja bačyŭ i Ecoom, i centr Rotmana, i pradstaŭnikoŭ niejkaj «Ukrainskaj palityki». Pahladzieŭ ich sajt, darečy, i tak i nie ŭbačyŭ śviedčańniaŭ choć niejkaj datyčnaści da sacyjałohii. Chto za što adkazvaŭ? Čyja intervjujerskaja sietka? Vielmi šmat pytańniaŭ. Adkazaŭ niama, tamu toje, što nam prezientavali, — prosta niejkija ličby», — skazaŭ Koršunaŭ.
