«Cyničny malunak u vyhladzie busła». U Hrodnie pačali sudzić dziaŭčynu, jakaja malavała na prypynkach
U sudzie Hrodzienskaha rajona pačaŭsia razhlad kryminalnaj spravy ŭ dačynieńni da dvaich žycharoŭ Skidziela — Kryściny Pałtaviec i Andreja Apanasoviča. Ich abvinavačvajuć pa artykule 341 KK RB — «Apahańvańnie budynkaŭ i psavańnie majomaści», paviedamlaje Tut.by.
MUS
Sudździa — Hanna Čyleka, dziaržabvinavaŭca — prakuror Maryna Ciareška.
U spravie kala 20 epizodaŭ. Pa materyjałach spravy, pačynajučy z kanca žniŭnia i da 21 śniežnia minułaha hoda mastačka Kryścina Pałtaviec u roznych miescach Skidziela, a taksama na prypynkach i mastach Hrodzienskaha rajona, u vioskach Savaleŭka, Biruličy, Suchaŭlany, Abuchava, Aziory pakidała malunki. Nijakich ahresiŭnych zaklikaŭ abo nienarmatyŭnaj leksiki jana nie vykarystoŭvała. Naadvarot, mastačka navat zamaloŭvała pobač niecenzurnyja słovy.
harodniaspring.org
Na abjekty dziaŭčyna vyjazdžała pozna ŭviečary na rovary i malavała busłoŭ, dziaŭčat z BČB-vałasami, hierb «Pahonia», BČB-jalinki, partret Ramana Bandarenki, a taksama pakidała nadpisy: «Dałučajsia!», «Ja vychodžu», «Žyvie Biełaruś».
Vosieńniu i zimoj Kryścinu na miescy, dzie źjaŭlalisia malunki, časam padvoziŭ na svajoj mašynie druhi abvinavačany — Andrej Apanasovič. Tak, u śniežni jany ździejśnili try sumiesnyja pajezdki. Pry hetym mužčyna nie dapamahaŭ malavać.
Dvum abvinavačanym naličyli 596 rubloŭ 21 kapiejku škody — heta vydatki kamunalnikaŭ. Hrošy Kryścina i Andrej užo vypłacili.
U pieršy dzień sudovych pasiadžeńniaŭ prajšło apytańnie abvinavačanych. Taksama prakuror doŭha začytvała epizody spravy z charaktarystykami, naprykład takimi: «Cyničnaja vyjava ŭ vyhladzie busła», «Čym istotna źniziła estetyčnyja charaktarystyki ściany płota».
