Ułada raśpisvaje aptymistyčnyja płany na piacihodku ŭ kultury
U płanach urada — zabieśpiačeńnie dyjałohu dziaržavy ź biełaruskaj dyjasparaj, ekanamičnaja kankurentazdolnaść prafiesijnaha mastactva dy papularyzacyja kultury i movy ŭ śviecie. Prahrama maje na mecie «biezumoŭnaje zachavańnie nacyjanalnaj historyka-kulturnaj spadčyny i stvareńnie ŭmoŭ dla tvorčaści».
Ab pryniataj uładaju prahramie «Kultura Biełarusi» raskazaŭ namieśnik premjer-ministra Ihar Pietryšenka infarmacyjnamu ahienctvu BiełTA. Jana raźličana na piać hadoŭ i ŭtrymlivaje ŭ sabie pašyreńnie biełaruskaha kino na ekranach, «uviadzieńnie ŭ abarot» 28 pomnikaŭ architektury, 20 novych abjektaŭ niemateryjalnaj spadčyny, nie mienš za 13500 tysiač śpiektaklaŭ i kancertaŭ na hod, pavieličeńnie naviedvalnaści muziejaŭ i biblijatek dy inšaje.
Paralelna Ministerstvam kultury raspracoŭvajucca źmianieńni ŭ «Kodeks ab kultury», ale budzie jaho novaja redakcyja stvarać «umovy dla tvorčaści» ci, naadvarot, pakul nieviadoma.
Nahadajem, za apošni čas albo zakrylisia, albo prypynili pracu Kupałaŭski teatr, Sučasny mastacki teatr, teatralny prajekt kampanii «Art Karparejšn», halereja «Ŭ», kulturny chab OK16, kulturnaja prastora «KCH» u Breście, za dzień da adkryćcia byŭ admienieny kinafiestyval «Listapad», niezaležnyja vydaviectvy «Knihazbor» i «Januškievič» stracili mahčymaść drukavać knihi, mnohija dziaržaŭnyja ŭstanovy pamianiali kiraŭnikoŭ i stracili supracoŭnikaŭ, mnohija źviedali vizity siłavikoŭ.
