Sudziać Lavona Chałatrana, kiraŭnika Ruin Bar OK16 i vałanciora štaba Babaryki. «Minsktrans» naličyŭ jamu 115 tysiač rubloŭ škody
U sudzie Frunzienskaha rajona pačaŭsia praces nad Lavonam Chałatranam. Spravu razhladaje sudździa Julija Bliźniuk, dziaržabvinavaŭca — staršy pamočnik prakurora Pavieł Papkoŭ, piša spring96.org.
Lavon Chałatran byŭ zatrymany 11 žniŭnia 2020 hoda i mocna źbity. Spačatku jaho abvinavacili pavodle č. 2 art. 293 Kryminalnaha kodeksa — «Udzieł u masavych biesparadkach», adnak u śniežni abvinavačvańnie pierakvalifikavali na č. 1 art. 342 KK — «Hrupavyja dziejańni, što hruba parušajuć hramadski paradak».
Lavon Chałatran žanaty, u jaho jość maleńki syn. Raniej da kryminalnaj adkaznaści nie pryciahvaŭsia. Pravaabarončaja supolnaść Biełarusi pryznała Lavona Chałatrana palityčnym viaźniem.
U sudzie zabaranili videa i fotazdymku, chacia abvinavačvany byŭ nie suprać. Lavon Chałatran chadajničaŭ ab viartańni spravy ŭ prakuraturu dla vypraŭleńnia hramatyčnych i punktuacyjnych pamyłak, adnak sudździa takoje chadajnictva nie zadavoliŭ.
Zhodna z abvinavačvańniem, Lavon Chałatran pryniał aktyŭny ŭdzieł u hrupavych dzieńniach ŭ noč z 9 na 10 žniŭnia, jakija paciahnuli hrubaje parušeńnie hramadskaha paradku, a mienavita publična zaklikaŭ ludziej da takich dziejańniaŭ praź internet, pierakryvaŭ darohi pa vulicach Bahdanoviča — Mašerava i Kujbyšava — Mašerava ŭ Minsku, pieraškadžaŭ ruchu transpartu, vykrykvaŭ łozunhi, hučna plaskaŭ u dałoni. Naniesienaja nibyta Lavonam škoda Minsktransu składaje 115 000 rubloŭ.
Svajoj viny Lavon Chałatran nie pryznaje.
U sudzie chacieli dapytać žonku Lavona — Alenu Smalaha, ale jana admoviłasia śviedčyć suprać muža.
Sud dapytaŭ samaho Lavona. Jon śćviardžaje, što nijakich supraćpraŭnych dziejańniaŭ nie ździajśniaŭ, a 11 žniŭnia jaho hruba zatrymlivali supracoŭniki HUBAZ. Pa słovach palitviaźnia, 9 žniŭnia jon pračnuŭsia, pajšoŭ hałasavać, paśla pajechaŭ u štab Viktara Babaryki, u mitynhach udziełu nie prymaŭ. Ličyć, što abvinavačvańnie źviazanaje ź jaho ŭdziełam ŭ inicyjatyŭnaj hrupie Viktara Babaryki.
Kali Lavona zatrymali, to advieźli ŭ HUBAZ, dzie pastavili da ściany, ruki skrucili za śpinaj chamutami, pačali źbivać. Milicyjaniery prasili addać parol ad telefona, kab jany spynili źbićcio — Lavon daŭ parol.
Na Akreścina ŭ IČU palitviazień prasiŭ źniać paboi, adnak miedycynski adhla adbyŭsia tolki praz dva tydni. Paśla ŭ miedycynskich dakumientach adsutničała fatahrafija łba, dzie była bujnaja drapina.
U sudzie abjaŭleny pierapynak da 16 lutaha.
