Ministr sportu pra Hierasimieniu: Try hady padrychtoŭki ŭ ZŠA. Z kim tam kamunikavała, chto apracoŭvaŭ, jakija abiacali hanarary? Śpiecsłužby nie śpiać
Ministr sportu i turyzmu Siarhiej Kavalčuk u intervju Siarhieju Kanašycu z «SB» parazvažaŭ pra ŭpłyŭ palityki na sport.
— Palityčnaja abstanoŭka ŭ krainie, jakaja zakranuła ŭ tym liku i sport, dadała niervovaści ŭ pracu?
— Starajusia nie źviartać uvahi na pravakacyi.
Choć ciažka nie zaŭvažyć «vilenski filijał» i jaho papulisckija zajavy kaśmičnaj duraści. Pišuć paklopy ŭ mižnarodnyja arhanizacyi, a potym radujucca sankcyjam i zajaŭlajuć, što dziakujučy im Biełaruś straciła vielizarnyja hrošy, jakija MAK vyłučaŭ našaj krainie dla padtrymki spartoŭcaŭ.
Chaču skazać, što, pa-pieršaje, kali tvaja kraina niedaatrymała finansavych srodkaŭ, to radavacca tut zusim niama čamu. A pa-druhoje, udakładniu, što 100 tysiač dalaraŭ, pra jakija viadziecca havorka, dla biełaruskaha sportu — heta kropla ŭ mory. Adzin zbor futbolnaha kłuba za miažoj abychodzicca daražej. A jašče zusim niadaŭna pracentaŭ 80 biełaruskich kamand mieli zadavalnieńnie lotać zimoj na mora na pastajannaj asnovie, a niekatoryja — pa dva-try razy. Voś i ličycie. U tym liku i z hetaj pryčyny ź ciapierašniaha siezona padobnyja «kamandziroŭki» ŭziatyja Ministerstvam sportu pad žorstki kantrol.
— Na vaš pohlad, čym abumoŭleny ich učynki?
— Dumaju, sprava ŭ asabistych ambicyjach i kryŭdzie. Z Alaksandraj Hierasimieniaj, naprykład, ja sutykaŭsia ŭsiaho adzin raz. Razam z Nadziejaj Skardzina ich pryvioŭ da mianie raniejšy pres-sakratar: spartovaje radyjo, kažuć, chočam stvaryć.
Staŭ unikać: profilnaj adukacyi ŭ dziaŭčat niama, pryvodziać dovady, miakka kažučy, sumniŭnyja. Uvohule, historyja padałasia nie zusim čystaj. Vyvučyli padrabiazna: akazałasia, što pad heta radyjo jašče piać punktaŭ płanavałasia adkryć. Možam vykazać zdahadku, jak hetyja infarmacyjnyja centry vykarystoŭvalisia b u niaprostych palityčnych umovach minułaha hoda.
Bałazie, prykładaŭ chapaje, kali resursy, zajaŭlenyja vyklučna jak spartyŭnyja, skacilisia na adkryta tendencyjnuju palityčnuju płatformu časta da taho ž jarka ekstremisckaj nakiravanaści.
Moža, byli i tut niejkija płany, stajała peŭnaja zadača?
Pačynaješ raźbiracca ź losam toj ža Hierasimieni — i taksama ŭźnikajuć pytańni. 2003 hod. Dopinh. 4 hady dyskvalifikacyi. Ale raptam skaračajuć termin udvaja. Nonsens, jaki nichto tołkam rastłumačyć tak i nie zmoh. Z čaho b heta taki atrakcyjon niečuvanaj ščodraści? Dzie i z kim udałosia damovicca?
Jašče adna viacha žyćciovaha šlachu — try hady padrychtoŭki ŭ ZŠA. Z kim tam mieła znosiny, chto apracoŭvaŭ, jakija abiacali hanarary? I čamu mienavita jana ciapier uznačaliła hetyja vilenskija fondy? Kali ŭsie hetyja fakty vybudavać u adzin łahičny łancužok, to prasočvajecca niekatoraja zakanamiernaść. Śpiecsłužby nie śpiać, pracujuć, i mietady ich uździejańnia na svaich ahientaŭ byvajuć roznyja.
Čałaviek unutrana moža być i nie zhodny z tym, što robić, ale dziavacca niama kudy. U maim razumieńni nie moža spartsmien, jaki zaŭsiody padtrymlivaŭ dziaržavu, abaraniaŭ jaje honar na mižnarodnaj arenie, raptam rezka i ŭ korani pamianiacca, zapieŭšy zusim inšuju pieśniu, — zajaviŭ Kavalčuk.
