Maładych žycharoŭ Žłobina adpravili ŭ kałoniju za «masavyja biesparadki»
Sud Žłobinskaha rajonu 5 lutaha vynies prysud pa kryminalnaj spravie za «masavyja biesparadki» i «hvałt u dačynieńni da milicyi» suprać dvaich žycharoŭ Žłobinu, piša «Svaboda».
Sud pastanaviŭ pakarać 18-hadovaha Jaŭhiena Kachanoŭskaha pazbaŭleńniem voli na try z pałovaj hady, a 21-hadovamu Dźmitryju Hoptu, u jakoha razumovaja adstałaść, prysudziŭ 2 hady kalonii.
Dźmitryja ŭziali pad vartu ŭ zali sudu. Da prysudu Jaŭhien byŭ pad vartaj, Dźmitry — pad padpiskaj, doma.
Sprava tyčyłasia padziej 10-11 žniŭnia ŭ Homli, kali ludzi vyjšli na płošču i patrabavali sumlennych vybaraŭ. Paśla žorstkaha razhonu šmat kaho zatrymali. Maładych ludziej abvinavačvali ŭ tym, što ŭ noč z 10 na 11 žniŭnia jany ŭdzielničali ŭ niesankcyjanavanym mitynhu, pieraškadžali ruchu transpartu, śviścieli, vyhukvali lozunhi, uciakali ad milicyi i kidali kamiani ŭ bok milicyjantaŭ i transpartu pravaachoŭnych orhanaŭ.
Milicyjanty paškodžańniaŭ nie atrymali, ale vajskoviec unutranych vojskaŭ častki №5525 Alaksandar Błycha prachodziŭ pa spravie jak paciarpieły. Na sudzie jon paviedamiŭ, što ŭ bok jaho i tavaryšaŭ pa słužbie lacieli kamiani i butelki, jakija «mahli pryčynić kalectva ci hibiel».
Jaŭhien Kachanoŭski zajaviŭ na sudzie, što nia kidaŭ kamianioŭ, nie kryčaŭ ničoha. Na śledztvie jon kazaŭ inšaje (kryčaŭ, kidaŭ). Na sudzie patłumačyŭ, što pryznańni daŭ pad fizyčnym i psychalahičnym ciskam.
«Ja byŭ u šoku, panicy, kali mianie zatrymali. Mianie bili ŭ milicyi i ŭ žyvot, i pa hałavie, i pa nahach, pahražali «pres-chataj», kali ja davaŭ nie takija pakazańni, jak treba. Ja pačaŭ ahavorvać siabie i inšych. Ja padpisaŭ, nie čytajučy, bo bajaŭsia, što znoŭ buduć bić», — śviedčyŭ žychar Žłobina.
Ekspertyza pryjšła da vysnovy, što, niahledziačy na psychijatryčnyja prablemy, Dźmitry Hopta moža adkazvać za svaje dziejańni.
Vinu jon pryznaŭ całkam i pahadžaŭsia z kožnym śćvierdžańniem prakurora, sudździ ci advakata. Pierad sudom 5 lutaha jon mocna płakaŭ. Rydaŭ chłopiec i tady, kali jaho zabirali pad vartu.
Taksama ŭ Žłobinie sudziać 17-hadovaha Vitala Procharava i 18-hadovaha Alaksandra Kísieleva pa analahičnych artykułach za padziei 10-11 žniŭnia.
