Lilija Ananič moža ŭznačalić kamisiju pa vyjaŭleńni prykmiet ekstremizmu
Były ministr infarmacyi i deputat Pałaty pradstaŭnikoŭ Lilija Ananič moža ŭznačalić kamisiju pa vyjaŭleńni prykmiet ekstremizmu ŭ infarmacyjnaj pradukcyi. Adpaviednaja pastanova apublikavana siońnia na Nacyjanalnym pravavym internet-partale, piša Tut.by.
Lilija Ananič. Fota Volhi Šukajła
Dakumient zaćviardžaje novy skład Respublikanskaj ekśpiertnaj kamisii pa acency infarmacyjnaj pradukcyi na pradmiet najaŭnaści (adsutnaści) u joj prykmiet prajavy ekstremizmu. Raniej u składzie było 23 čałavieki, ciapier — 20.
Kamisiju raniej uznačalvała dyrektar dziaržaŭnaj ustanovy «Nacyjanalnaja knižnaja pałata Biełarusi» Alena Ivanova. Zaraz staršynioj kamisii pryznačanaja Lilija Ananič. U dakumiencie jość zaŭvaha — «ź jaje zhody».
Heta značyć Lilija Ananič moža pahadzicca, albo admovicca ŭznačalić kamisiju.
Namieśnikam staršyni Respublikanskaj ekśpiertnaj kamisii pa-raniejšamu zastaniecca namieśnik ministra infarmacyi Ihar Buzoŭski, a sakratarom — kansultant upraŭleńnia vydavieckaj i palihrafičnaj dziejnaści Ministerstva infarmacyi Alena Anoška.
U skład kamisii taksama ŭvachodziać pradstaŭniki navukovaj supolnaści z NAN Biełarusi i VNU krainy — daktary i kandydaty sacyjałahičnych, histaryčnych, fiłasofskich i fiłałahičnych navuk. A akramia taho — pradstaŭniki siłavych viedamstvaŭ. Naprykład, namieśnik načalnika Hałoŭnaha ŭpraŭleńnia KDB Ihar Žukaŭ, hałoŭny śpiecyjalist adździeła infarmacyi i prapahandy ŭpraŭleńnia ideałahičnaj raboty Dziaržpahrankamiteta Siarhiej Kasačuk, načalnik čaćviortaha adździeła treciaha ŭpraŭleńnia HUBAZiK MUS Juryj Tkačuk, namieśnik načalnika druhoha adździeła čaćviortaha upraŭleńnia HUBAZiK MUS Dźmitryj Jucoŭ, pradstaŭnik SK Siarhiej Kabakovič i pradstaŭnik DMK Kaciaryna Škurdziuk.
Nahadajem, Respublikanskaja ekśpiertnaja kamisija pa acency infarmacyjnaj pradukcyi na pradmiet najaŭnaści (adsutnaści) u joj prykmiet prajavy ekstremizmu była stvorana ŭ 2014 hodzie pry Mininfarmie. Mienavita na padstavie rašeńnia hetaj kamisii ŭ 2020 hodzie dva telehram-kanały byli pryznanyja sudom ekstremisckimi materyjałami.
Lilija Ananič z 2014 pa 2017 hod była ministram infarmacyi ŭ Biełarusi. U ciapierašni čas źjaŭlajecca deputatam Pałaty pradstaŭnikoŭ siomaha sklikańnia. Razam ź inšymi deputatami jana zajmajecca raspracoŭkaj zakonaprajekta ab niedapuščeńni hieraizacyi nacyzmu.
