«Pracujem praź dzień, pierabivajemsia adnym kampjutaram» — Hienadź Viniarski ab dziejnaści «Knihazboru» paśla vizitu DFR
Paśla taho, jak 13 studzienia ŭ ofis «Knihazboru», a taksama dadomu i ŭ haraž jaho kiraŭnika Hienadzia Viniarskaha pryjšoŭ DFR, rabota vydaviectva akazałasia amal paralizavanaj. Ciapier «Knihazbor» moža chiba pradavać svaje raniejšyja vydańni i čakać vyrašeńnia situacyi.
Hienadź Viniarski kaža, što naviedvańnie DFR niesumiaščalnaje z paŭnavartasnaj pracaj. U vydaviectvie zabrali sistemny błok, telefon i knihi — 558 asobnikaŭ «Revalucyi» Viktara Marcinoviča. «Heta ŭsie, što byli, uziali navat brakavanyja».
Aproč hetaha, u «Knihazbora» aryštavany rachunak, što značyć niemahčyma płacić ni drukarni, ni ludziam, datyčnym da pracy nad vydańniami. «Navat kali hrošy prychodziać, my imi nie možam karystacca, a značyć, faktyčna nie možam pracavać».
Hienadź Viniarski
U vydaviectvie čatyry supracoŭniki — ciapier jany pracujuć «pavolna i niaŭpeŭniena», prychodziać u ofis praź dzień i pierabivajucca adnym kampjutaram. «Adzinaje, što my jašče možam, — adpuskajem knihi, jakija vyjšli raniej. A ŭ cełym čakajem niejkaha rašeńnia. My napisali ŭ DFR list z zapytam pra terminy, ale na jaho jašče nie adkazali. Nie viedajem, što budzie dalej».
Hienadź Viniarski kaža, što ab pryčynach takoj začystki moža tolki zdahadvacca, ale adznačaje, što začyščajecca mienavita «biełaruskamoŭnaje aśvietnickaje pole».
«Mahčyma, jany dumali, što praz naša vydaviectva išła niejkaja dapamoha na apłatu štrafaŭ ci jašče što, bo razam sa mnoj u toj dzień uziali žurnalista Andreja Alaksandrava, jakomu heta pradjavili. Ale ŭ nas navat niama valutnaha rachunku, knihi my drukujem vyklučna ŭ Biełarusi. A moža, šukali, chto drukuje nalepki ŭ bieła-čyrvona-biełych kolerach, bo padčas ahladu pytalisia pra tuju, što była ŭ našym ofisie, — ale ž my vydaviectva, a nie drukarnia. Ja ščyra nie razumieju, što heta było, my zaŭždy pracujem u pravavym poli».
Nahadajem, praz dva dni paśla vizitu ŭ «Knihazbor» DFR pryjšoŭ taksama pa kniharaspaŭsiudnika Alesia Jaŭdachu i vydaŭca Andreja Januškieviča.
Ciapier «Knihazboru» dy inšym dziejačam knižnaha rynku, što źviedali cisk, možna dapamahčy, nabyvajučy ich knihi.
