«Naradziŭsia prahramistam» i «čałaviek-lehienda». Sudziać minčuka, na jakoha najechaŭ milicejski bus
U Frunzienskim sudzie Minska 3 lutaha pačaŭsia praces nad 34-hadovym ajcišnikam Ściapanam Čykilovym, jaki trapiŭ pad koły milicejskaha aŭtamabila, što ruchaŭsia pa sustrečnaj pałasie. Ściapan apynuŭsia ŭ špitali z surjoznymi traŭmami. Ciapier jaho abvinavačvajuć u chulihanstvie — pavodle artykuła 339 KK.
Pavodle materyjałaŭ śledztva, Čykiloŭ «naŭmysna, z metaj paškodžańnia aŭtamabila, zrabiŭ prycelny kidok u kirunku słužbovaha aŭtamabila MUS, adnak nie davioŭ svoj złačynny namier da kanca — kamień trapiŭ u metaličnuju aharodžu prajeznych častak». Adnak śledztva padličyła materyjalnuju škodu, jakuju Ściapan nanios aharodžy — 1180 rubloŭ, piša Radyjo Svaboda.
Što adbyłosia na praspekcie Puškina 15 listapada
15 listapada ŭ Miensku prachodziŭ «Marš śmiełych» pamiaci Ramana Bandarenki. Siłaviki pieraškadžali pratestoŭcam sabracca, na praspekcie Puškina i Prytyckaha aŭtamabilny ruch byŭ spynieny. Pratestoŭcy stajali ŭzdoŭž darohi, kahości pačali zaciahvać u sinija busy. Z prajeznaj častki małady čałaviek kinuŭ štości ŭ bok busa. I ŭ momant na jaho najechaŭ druhi bus, jaki ruchaŭsia z boku Prytyckaha.
Źbitaha piešachoda zakinuli ŭ bus, na darozie zastalisia jahonyja krasoŭki. Jak vyśvietliłasia paźniej, spačatku jaho pryvieźli ŭ Frunzenskaje RUUS. Zdareńnie adbyłosia ŭ 12:27, uviečary 34-hadovaha ajcišnika Ściapana Čykilova dastavili ŭ špital chutkaj dapamohi.
Zhodna z medyčnymi dakumentami, abśledavańni byli praviedzienyja kala 21-j hadziny. Medyki dyjahnastavali spałučanuju traŭmu, strasieńnie mozhu, šmatlikija ślady ŭdaraŭ, drapiny, paškodžańnie nyrki. Paciarpiełamu nakłali švy, na šyju nadzieli fiksavalny kaŭnier.
U špitali mužčynu trymali pad kanvojem, praz try dni pieraviali na Akreścina, a potym u Žodzina.
Na Čykilova zaviali kryminalnuju spravu — milicyjanty śćviardžajuć, što małady čałaviek nibyta kidaŭ kamiani ŭ ichny bus. Ciapier jamu pahražaje da 6 hadoŭ pazbaŭleńnia voli.
Pra toje, što Ściapana zatrymali, jaho siamja daviedałasia ad dziažurnaha advakata — uviečary ŭ niadzielu ŭ internecie ŭžo źjavilisia videaroliki zdareńnia. Kali ŭbačyli kadar z krasoŭkami na darozie, sumnievy źnikli: heta byli krasoŭki Ściapana.
«Naturalna, spačatku ŭ nas byŭ prosta šok — Ściapan vielmi spakojny, strymany čałaviek. Pa vychodnych jeździŭ u toj rajon rabić ramont u svajoj kvatery, tearetyčna moh apynucca na Puškinskaj. Mabyć, nie ŭtrymaŭsia. Ale jon mocna paciarpieŭ, u špitali nadzieli admysłovy fiksujučy kaŭnier na šyju — ź im jaho i viarnuli na Akreścina, — kaža siastra Taciana.
Vydatna vučyŭsia, daskanała viedaje anhielskuju i niamieckuju movy
Ściapan Čykiloŭ pracuje ŭ bujnoj IT-kampanii. Jaho starejšaja siastra Taciana raskazvaje, što brat zaŭsiody vučyŭsia vielmi dobra.
«Paśla škoły adrazu pastupiŭ na biudžet u prestyžny radyjotechničny instytut (ciapierašni BDUIR). Kali vučyŭsia na trecim kursie, jaho ŭziali na pracu adrazu ŭ surjoznuju IT-kampaniju JERAM. Jon zajmaŭsia jašče i na dadatkovych kamputarnych kursach. U JERAM jaho i raźmierkavali. Jon davoli doŭha tam adpracavaŭ, ale ciapier pracuje ŭ inšaj IT-kampanii», — uzhadvaje Taciana.
Ściapan daskanała viedaje anhielskuju i niamieckuju movy, zaŭsiody lubić sprabavać niešta novaje, i ŭ jaho ŭsio vydatna atrymlivajecca, raskazvaje siastra.
«Brat samastojna navučyŭsia hrać na hitary, na syntezatary. Jon dobra maluje. Vielmi šmat čytaje — jon zaŭsiody z knihami.
Ja nikoli nia čuła, kab jon pavyšaŭ hołas, usie pytańni vyrašaje spakojna i mirna.
Na jaho zaŭsiody možna raźličvać — i na materyjalnuju dapamohu, i na mudruju paradu.
Nikoli nia skardziŭsia ŭ listach z turmy na ciažkaści, umovy ŭtrymańnia. Piša, što kampanija ŭ Žodzinie dobraja i cikavaja, a supracoŭniki adekvatnyja.
Jon vielmi pieražyvaje za nas, u kožnym liście prosić prabačeńnia, što prymusiŭ chvalavacca. Ściapan nas z tatam pastajanna supakojvaje (mamy daŭno ŭžo niama z nami), padbadziorvaje», — kaža siastra Taciana.
«Ściopa — zvyšmehaŭraŭnavažany i dobrazyčlivy chłopiec»
Pra Ściopu možna havaryć tolki ŭ pazytyŭnym klučy — i jak pra admysłoŭca, i jak pra čałavieka, pierakananaja jahonaja kaleha Nona Kiško.
«Dla mianie heta zvyšmehaŭraŭnavažany i dobrazyčlivy chłopiec, a heta redkaść — zachavać takija jakaści va ŭmovach vielmi napružanaj pracy na našych prajektach. Jon nikoli nie admaŭlaŭ u dapamozie i kansultacyjach, navat kali soty raz padychodziš da jaho z adnymi i tymi ž pytańniami.
Čaściakom mnie zdavałasia, što dla jaho vyrašać składanyja architekturnyja zadačy, hieneravać idei ŭ raspracoŭcy hetaksama prosta, jak i pabałbatać pra žyćcio ź siabram.
Ja ščyra zachaplajusia prastatoj i dabrynioj Ściopy, i ŭ toj ža čas jaho niejmaviernym rozumam. A jašče, akazvajecca, taki surjozny admysłoviec moža być viasiołym i zabaŭnym chłopcam, ź jakimi možna cikava i nienapružana parazmaŭlać na roznyja temy», — kaža Nona Kiško.
Volha Pietrapaŭłaŭskaja raskazvaje, što ŭ kampanii Ściapanu daviarajuć samyja adkaznyja i składanyja zadačy, i ŭsie ŭpeŭnieny, što jon usio zrobić vydatna
«Ściopa naradziŭsia prahramistam, heta jaho sapraŭdnaje vysokaje paklikańnie. U hetym sensie jon «čałaviek-lehienda».
Jaho ciapierašniaja adsutnaść litaralna pieraviarnuła plany kampanii, mnohija rečy my prosta adkłali da jahonaha chutkaha viartańnia. Jon zaŭsiody spakojny, strymany, ciarplivy, čuły — zaŭsiody vysłuchaje, patłumačyć, paraić, na ŭsich u jaho znachodzicca čas.
Žyć i razumieć, što takija ludzi prosta vyrvanyja z žyćcia — i dziela čaho? My ŭsie vielmi spadziajomsia na jahonaje jak maha chutčejšaje viartańnie», — kaža Volha Pietrapaŭłaŭskaja.
Nina Karakina, jakaja pracuje razam sa Ściapanam bolš za 4 hady, adznačaje jahonaje nadzvyčaj tonkaje pačućcio humaru i ŭmieńnie canić prostyja rečy.
«Ściopa sapraŭdny prafesijanał, cudoŭny čałaviek, vielmi čullivy, taktoŭny i dobry, z tonkim pačućciom humaru. Ściapan vielmi spakojny, lajalny i adkazny, na jaho zaŭsiody možna raźličvać. Jon vielmi pavažliva stavicca da kalehaŭ, cenić žyćcio i prostyja rečy. My vielmi sumujem pa našym siabru i kalehu i ź nieciarpieńniem čakajem jaho», — kaža Nina Karakina.
«Ściapan 5 hadoŭ pracuje ŭ našaj kampanii na pazycyi viadučaha inžynera-prahramista, zarekamendavaŭ siabie jak prafesijanał najvyšejšaha ŭzroŭniu. Jon sapraŭdny siabar, zaŭsiody hatovy pryjści na dapamohu», — kaža pra Ściapana Čykilova kaleha Saša Cimašenka.
