Piensijanierak sa staličnaj Malinaŭki pakarali praciahłymi «sutkami»
Sud Maskoŭskaha rajona Minska razhledzieŭ siońnia spravy piensijanierak, jakich zatrymali jašče 29 studzienia na vulicy Rafijeva, paviedamlajuć pravaabaroncy.
Usiaho było zatrymana 7 žančyn, ale nočču 68-hadovuju Ninu Kavałhinu ŭsio ž adpuścili. Sa słoŭ jaje syna, piensijanierki sustrelisia, kab sabrać hrošy dla chvoraha dziciaci.
61-hadovuju Irenu Kurackuju sudździa Maskoŭskaha rajona Pirožnikava adpraviła na 15 sutak aryštu. Žančyna pieramahła rak, ciapier u jaje remisija.
Taćciana Ledak pa rašeńni sudździ Lidzii Cielicy praviadzie 15 sutak na Akreścina. Na sudzie žančyna patłumačyła, što jana z astatnimi piensijanierkami źbirali hrošy na lačeńnie dziciaci. Jašče ŭ ich byli płakaty ŭ padtrymku Ihara Łosika. 62-hadovaja Taćciana paviedamiła, što doma jaje čakaje chvoraja 85-hadovaja maci.
62-hadovaja Łarysa Śvirydovič vyzvalena sa štrafam u 50 bazavych pa rašeńni sudździ Śviatłany Bandarenka.
56-hadovaj Taćcianie Siańkievič sudździa Siarhiej Kacer taksama prysudziŭ pa art. 23.34 KaAP 15-sutkavy aryšt.
Hety ž sudździa taksama adpraviŭ na 15 sutak i Śviatłanu Žmajevu 1960 hoda naradžeńnia. Piensijanierka skazała, što nakiroŭvałasia ŭ sad pa ŭnuka, ale ŭbačyła žančyn, padyšła da ich, kab pahladzieć na płakaty. U hety čas ich usich i zatrymali.
Sudździa Małašanka pakarała 15-sutkavym aryštam 65-hadovuju Taćcianu Dambroŭskuju.
U vyniku, sud Maskoŭskaha rajona Minska asudziŭ piensijanierak ahułam na 75 sutak i 50 bazavych (1450 rubloŭ).
