Dva hady chatniaj «chimii» i 2000 rubloŭ kampiensacyi. Asudzili mužčynu za abrazu vałožynskaha milicyjaniera
Minski rajonny sud 1 lutaha vynies prysud pa kryminalnaj spravie Alaksandra Dziaščeni. Jaho abvinavacili u abrazie pradstaŭnika ŭłady (art. 369 Kryminalnaha kodeksa), paviedamlajuć pravaabaroncy.
Spravu razhladała sudździa Alena Novikava. Dziaržaŭny abvinavaŭca — prakuror Famina.
Z materyjałaŭ śledstva viadoma, što 20 vieraśnia Dziaščenia naŭmysna, z dapamohaj telefona raźmiaściŭ u supołcy haziety «Radzima» UKantakcie paviedamleńnie źnievažalnaha charaktaru, z vykarystańniem nienarmatyŭnaj leksiki.
Paciarpieły — supracoŭnik milicyi Pavieł Kurs.
Na papiarednim sudovym pasiadžeńni dziaržaŭny abvinavaŭca zaprasiŭ dla Alaksandra Dziaščeni dva hady abmiežavańnia voli biez nakiravańnia va ŭstanovy adkrytaha typu.
Sudździa Alena Novikava vyniesła prysud: dva hady abmiežavańnia voli biez nakiravańnia va ŭstanovy adkrytaha typu. Aproč hetaha Dziaščenia pavinien vypłacić paciarpiełamu 2000 rubloŭ kampiensacyi maralnaj škody. Aryšt na televizar, telefon i mikrachvaloŭku pakinuć u sile.
