Šrajbman: Zabaraniajučy bieł-čyrvona-bieły ściah, ułada harantuje, što jon budzie dziaržaŭnym
Piša palityčny ahladalnik Arciom Šrajbman.
Zabarona BČB i pryznańnie jaho ekstremisckim — važny krok da dalejšaj sakralizacyi ściaha. Jon pačynaŭ 2020 hod jak simvał nacyjanalna-demakratyčnaj prasłojki hramadstva — 15-20% ad siły. Zaviaršaŭ jon hety hod jak simvał šyrokaha hramadzianskaha pratestu biez pryviazki da svajoj historyi.
Ciapier jon stanovicca sakralnym simvałam, zabaronienym płodam, čymści, što buduć malavać pa načach na ścienach, zachoŭvać u zacišnych kutkach i ŭsio bolš emacyjna pryviazvacca da hetaha znaka.
Niedaaceńvajučy jaho papularnaść, ułada adrazaje jašče adzin šlach da kampramisu, vynosiačy miljony svaich apanientaŭ u pole kryminału ŭžo nie tolki za ich dziejańni, ale i za ich markiery.
Čyrvona-zialony ściah zaŭsiody mieŭ bolšuju padtrymku, čym biełaruskaja ŭłada i dakładna moh jaje pieražyć. Ciapier hramadstvu prapanujuć padzialicca. Siadzieć pobač z čyrvona-zialonym ściaham ciapier prajava palityčnaj pazicyi.
Takaja palityzacyja simvała i jaho pryviazka da kankretnaj pazicyi — šlach da taho, što sychod ułady budzie aznačać sychod i jaje atrybutaŭ razam ź joj. Čyrvona-zialony ściah mieŭ šancy nie stać takim atrybutam, ale zaraz sapraŭdy stanie.
Zabaraniajučy BČB, ułada harantuje, što jon budzie dziaržaŭnym, pakolki heta ciapier nie subkultura. Važny dzień.
