U Mastach na hod kałonii asudzili mužčynu za akcyi z pudziłami, trunami i BČB-ściahami. U jaho taksama kanfiskavali mašynu
Sud Mastoŭskaha rajona Hrodzienskaj vobłaści 27 studzienia vynies prysud pa kryminalnaj spravie suprać Viktara Carykieviča. Jaho abvinavacili pa č. 1 i 2 art. 339 (chulihanstva i złosnaje chulihanstva) i 369 (publičnaja abraza pradstaŭnika ŭłady) Kryminalnaha kodeksa.
spring96.org
Za praviadzieńnie sieryj «cyničnych» akcyj u vieraśni-kastryčniku: razmaloŭvańnie prypynkaŭ u Mastoŭskim rajonie, naniasieńnie na drevach BČB-ściahoŭ, raźviešvańnie na ich pudziłaŭ u milicejskaj formie i raźmiaščeńnie tabličak u vyhladzie rytualnych nadmahillaŭ, a taksama truny z pudziłam u formie supracoŭnika milicyi, — Viktara Carykieviča pazbavili voli terminam na adzin hod u kałonii ahulnaha režymu. Akramia hetaha, u mužčyny kanfiskavali mašynu. Spravu razhladaŭ staršynia suda Mastoŭskaha rajona Vital Siniła, piša spring96.org.
Praces prachodziŭ faktyčna ŭ zakrytym režymie, tamu jaho padrabiaznaści nieviadomyja. Na pieršy praces nie puścili navat u budynak suda pravaabaroncu Alaksandra Vajciešyka, jaki płanavaŭ ažyćciaŭlać manitorynh suda. Pryčyna — epidemijałahičnaja situacyja ŭ suviazi z SOVID-19.
U čym abvinavacili mužčynu?
Zhodna z materyjałami spravy, Viktar Carykievič u žniŭni minułaha hoda raźmiaściŭ u adnym z telehram-čataŭ «nieprystojny, prynižalny dla honaru i hodnaści kamientar» pad fatahrafijaj staršyni Mastoŭskaha rajvykankama Juryja Valevataha. Jaho dziejańni kvalifikavali pavodle art. 369 Kryminalnaha kodeksa (publičnaja abraza pradstaŭnika ŭłady) Kryminalnaha kodeksa. Sankcyja hetaj normy nie praduhledžvaje pazbaŭleńnia voli.
Taksama pavodle abvinavačvańnia, Viktar Carykievič u vieraśni-kastryčniku pravioŭ cełuju sieryju akcyj, jakija, na dumku prakuratury, «adroźnivalisia pa svaim źmieście vyklučnym cynizmam»:
— nanios bieł-čyrvona-biełyja linii na darozie pablizu viosak Savinka, Zapolle i ahraharadka Dubna Mastoŭskaha rajona;
— «paviesiŭ pudziły ŭ milicejskaj formie i zrabiŭ nadpisy» pad naviesami prypynkaŭ «Mikieleŭščyna», «Dubna» i «Čarlona»;
— u lesie pamiž horadam Masty i ahraharadkom Masty Pravyja namalavaŭ na 33 drevach BČB-ściahi, u poli rasstaviŭ tablički ŭ vyhladzie rytualnych nadmahillaŭ «z nadpisami, jakija demanstrujuć hrebavańnie dziaržaŭnym ładam kiravańnia», a pobač z tabličkami pastaviŭ trunu z pudziłam u formie supracoŭnika milicyi.
Hetyja dziejańni byli kvalifikavanyja pavodle č. 1 i č. 2 art. 339 Kryminalnaha kodeksa (chulihanstva i złosnaje chulihanstva). Sankcyja hetaj normy praduhledžvaje pazbaŭleńnie voli da šaści hadoŭ.
Sudździa Siniła pryznačyŭ žycharu Mastoŭ pakarańnie — pazbaŭleńnie voli terminam na adzin hod u kałonii ahulnaha režymu. Taksama pa prysudzie suda ŭ Carykieviča kanfiskujuć jaho aŭtamabil. Vierahodna, jak srodak ździajśnieńnia złačynstva pa art. 339 Kryminalnaha kodeksa.
