Vynieśli prysud minčuku, jakoha abvinavačvali ŭ napadzie na supracoŭnika AMAPa — 5 hadoŭ kałonii
27 studzienia sudździa Maryna Zapaśnik vyniesła prysud 32-hadovamu minčuku Viktaru Barušku — jaho abvinavačvali ŭ naniasieńni ciažkich cialesnych paškodžańniaŭ supracoŭniku AMAPa. Prakuror zapatrabavaŭ dla jaho piać hadoŭ pazbaŭleńnia voli z adbyvańniem pakarańnia va ŭmovach uzmocnienaha režymu. Takoje ž rašeńnie i pryniaŭ sudździa.
Fota Siarhieja Saciuka, naviny.by
Na abviaščeńnie prysudu pryjšło kala 40 čałaviek. Sud pryznaŭ Viktara Barušku vinavatym i pryznačyŭ zapatrabavanaje prakuroram pakarańnie — 5 hadoŭ pazbaŭleńnia voli ŭ kałonii ŭzmocnienaha režymu, paviedamlaje Tut.by.
Spravu ab napadzie na supracoŭnika AMAPa i naniasieńni jamu ciažkich cialesnych paškodžańniaŭ razhladali ŭ sudzie Leninskaha rajona. Praces viała sudździa Maryja Zapaśnik, dziaržabvinavačańnie pradstaŭlaŭ Alaksandr Ramanovič, abaronu — Natalla Jafimčyk.
Z 18 kastryčnika 2020 hoda jon znachodziŭsia pad vartaj. U toj dzień jaho zatrymali na Partyzanskim praśpiekcie paśla niadzielnaha maršu. Nastupnyja 12 dzion jon pravioŭ u reanimacyi balnicy chutkaj miedycynskaj dapamohi ŭ Minsku. Na sudzie Viktar Baruška zajaviŭ ab źbićci i ździekach, jakija adbyvalisia ź im paśla zatrymańnia:
— Bili, dubinku ŭ d… zasoŭvali. Paśla hetaha ja pravioŭ dvanaccać dzion u reanimacyi BCHMD. Nohi byli takija apuchłyja, što nie moh źniać džynsy. Kali mianie bili, ja źbierahaŭ levuju nahu. Mnie mianiali źviazki na levaj nazie, ja nie moh joju ŭdaryć, — zajaviŭ mužčyna.
Svaju vinu Viktar Baruška nie pryznaŭ. Jon nastojvaŭ na tym, što 18 kastryčnika išoŭ z pratesnaha maršu; kali ŭbačyŭ siłavikoŭ, pačaŭ uciakać. Nieŭzabavie jaho źbili z noh — i razam z bajcom AMAPa jon upaŭ na ziamlu. U vyniku apošni atrymaŭ pierałom vialikaj halonačnaj kostki pravaj nahi, što adnosicca da ciažkich cialesnych paškodžańniaŭ.
Paciarpieły supracoŭnik AMAPa byŭ zasakrečany. Na sudzie jon vystupaŭ pad niesapraŭdnym imiem Ivana Vołachava. Padčas apytańnia ŭ špitali jon raskazvaŭ, što atrymaŭ traŭmu padčas sutyknieńnia. Na sudzie zajaviŭ, što abvinavačany nanios jamu ŭdar nahoj, što i paciahnuła pierałom.
Try miesiacy paciarpieły pravioŭ na balničnym, dva z pałovaj — u hipsie. Svaju maralnuju škodu jon acaniŭ u 6 tysiač rubloŭ, pałovu ź jakich paabiacaŭ addać na dabračynnaść. Jašče 351 rubiel paciarpieły «Vołachaŭ» vydatkavaŭ na lačeńnie.
Niahledziačy na toje, što Viktar Baruška svaju vinu nie pryznaŭ, jaho svajaki pieraličyli 3 tysiačy rubloŭ na dabračynny rachunak dziciačaha doma, taksama jany dali abaviazacielstva pakryć maralnuju škodu paciarpiełamu i vydatki na lačeńnie.
Abapirajučysia na heta, prakuror Alaksandr Ramanovič zapatrabavaŭ pałovu ad mahčymaha maksimalnaha terminu pa dadzienym artykule — 5 hadoŭ pazbaŭleńnia voli z adbyvańniem pakarańnia va ŭmovach uzmocnienaha režymu.
