«Pryjšłosia prymać zaspakajalnyja preparaty»: mužčynu dali dva hady chatniaj chimii za abrazu Volhi Čamadanavaj
Sud Centralnaha rajona Minska siońnia asudziŭ 43-hadovaha Dźmitryja Ušackaha da dvuch hadoŭ chatniaj chimii pavodle art. 369 KK za abrazu ŭ telehram-čacie pres-sakratarki MUS Volhi Čamadanavaj.
Volha Čamadanava. Skrynšot STB
Na sud źjaviłasia sama paciarpiełaja i tłumačyła, jakija maralnyja pakuty joj byli pryčynienyja abrazaj abvinavačanaha ŭ adnym z telehram-čataŭ, jakija jana acaniła ŭ 5000 rubloŭ, paviedamlajuć pravaabaroncy.
Sam kamientar u sudzie ahučany nie byŭ, ale viadoma, što jon byŭ «u nieprystojnaj hrubaj niecenzurnaj formie».
U jakaści śviedki ŭ sudzie była dapytanaja aficyjnaja pradstaŭnica HUUS Minharvykankama Natalla Hanusievič.
Na sudzie Dźmitryj pryznaŭ vinu całkam, raskajaŭsia i paprasiŭ prabačeńnie ŭ Volhi Čamadanavaj u zale suda:
«Mety abrazy Volhi Čamadanavaj u mianie nie było. U mianie byli emocyi i nie zusim adekvatny stan [pakusali pčoły]. Ja nie chacieŭ jaje abrazić, nie dumaŭ, što jana pračytaje paviedamleńnie ŭ hetaj hrupie. Kali ja pisaŭ hety kamientar, ja nie mierkavaŭ, što aficyjnaja asoba MUS budzie karystacca takoj hrupaj.
Ja pryznaju svaju vinu ŭ tym, što ja raźmiaściŭ taki kamientar i što ŭ im utrymlivalisia abraźlivyja słovy ŭ adras Čamadanavaj, što ja zrabiŭ paviedamleńnie ŭ publičnaj sietcy, da jakoj moža mieć dostup luby karystalnik telehrama».
Na sudovym pracesie Dźmitryj raspavioŭ, što «moh być padpisany na hety telehram-čat, ale nie źjaŭlaŭsia pastajannym padpisčykam, nie cikaviŭsia dziejnaściu hrupy». Zychodziačy z materyjałaŭ spravy, Ušacki pakinuŭ abraźlivy kamientar.
Volha Čamadanava na sudzie raspaviała, što ŭbačyła kamientar ranicaj 18 červienia. Na toj momant jana viedała pra isnavańnie hetaha telehram-čata, ale nie była padpisanaja na jaho.
Adnak, jak patłumačyła pres-sakratarka, jaje kalehi z MUS ažyćciaŭlajuć manitorynh internet-prastory.
Skrynšot paviedamleńnia joj dasłała kaleha Natalla Hanusievič — načalnica pa suviaziach z hramadskaściu HUUS Minharvykankama.
«Takoje paviedamleńnie ja atrymała ŭpieršyniu za pieryjad majoj słužby na pasadzie načalnika ŭpraŭleńnia infarmacyi [z 29 śniežnia 2018 hoda], — raskazała Volha Čamadanava. — Raniej padobnych paviedamleńniaŭ mnie nichto nie dasyłaŭ i nie pierasyłaŭ, tamu dla mianie, viadoma, takoje paviedamleńnie vyklikała nie prosta abrazu asabista mianie, a ŭ cełym — i słužby, i viedamstva. Ja b skazała, heta peŭny zamach na aŭtarytet pravaachoŭnych orhanaŭ, asabliva na moj. Abraźlivym, napeŭna, było bolš toje, što čałaviek, jaki pakidaje taki kamientar, — heta absalutna nieviadomy dla mianie čałaviek, i nie maje prava rabić niejkija zaklučeńni, dumki publična adlustroŭvać.
Heta paviedamleńnie pryniziła maje honar i hodnaść. Vielmi adbiłasia, u pryncypie, na majoj pracy na praciahu niekatoraha pieryjadu času. Na praciahu tydnia, jak minimum, heta dakładna adbiłasia…
Heta paŭpłyvała, u tym liku, na moj stan zdaroŭja. Balničny list adkryvać nie treba było, ale, tym nie mienš, peŭny dyskamfort, na ahulny stan zdaroŭja — heta, sapraŭdy, paŭpłyvała. Akramia hetaha, vy razumiejecie, što infarmacyja, raźmieščanaja publična, stanovicca zdabytkam nie tolki tych, chto manitoryć hetuju infarmacyju, ale i šerahu inšych ludziej, jakija ciabie ŭžo viedajuć i ŭ jakich peŭnaje staŭleńnie da ciabie i jak da čałavieka, i jak da kiraŭnika. Viadoma, heta taki surjozny ŭdar pa reputacyi, u tym liku».
Volha Čamadanava zajaviła hramadzianski pazoŭ ab pryčynieńni joj maralnych pakut na 5000 rubloŭ.
«Pa-pieršaje, heta pryniesła mnie i fizičny peŭny dyskamfort. Moj stan zdaroŭja, dziakuj bohu, nie zapatrabavaŭ niejkaha praciahłaha lačeńnia. Ale, razam z tym, peŭnyja zaspakajalnyja preparaty mnie daviałosia prymać z-za taho, što heta zanadta paŭpłyvała na toje, što ja ŭbačyła ŭpieršyniu dla siabie.
Nu i taksama, viadoma, moj aŭtarytet i reputacyja paśla hetaha mieli taksama peŭnyja straty, i heta adbivałasia na tym, što pra heta paviedamleńnie mnie kazaŭ nie adzin čałaviek, a pra heta kazali mnohija», — tłumačyć svaje maralnyja pakuty Volha Čamadanava ŭ sudzie.
Abvinavačany pazoŭ pryznaŭ častkova: hatovy pakryć 3000 rubloŭ. Čamadanava prasiła pakarać abvinavačanaha Ušackaha na mierkavańnie suda.
U sudzie ŭ jakaści śviedki była dapytanaja Natalla Hanusievič — načalnica pa suviaziach z hramadskaściu HUUS Minharvykankama.
Jana raspaviała, što ranicaj 18 červienia pierad pracaj jana, prahladajučy roznyja telehram-kanały, vyjaviła ŭ čacie infarmacyju, jakaja tyčyłasia jaje niepasrednaj kiraŭnicy Volhi Čamadanavaj.
«Bo jana źjaŭlajecca publičnym čałaviekam i, pierš za ŭsio, maim kiraŭnikom, ja paličyła patrebnym prainfarmavać jaje, kab jana viedała», — raspaviadaje ŭ sudzie Natalla Hanusievič.
Jak raspaviała śviedka, pad fatahrafijaj raźmiaščaŭsia abraźlivy kamientar u niecenzurnaj formie ŭ adras Volhi Čamadanavaj. Jana zrabiła skrynšot i adpraviła asabistym paviedamleńniem u tielehramie svajoj načalnicy. Na pytańnie sudździ Akavitaj, ci prynižaŭ raźmieščany kamientar honar i hodnaść Čamadanavaj, Hanusievič adkazała stanoŭča, dadaŭšy, što jaje jon taksama pakryŭdziŭ.
Padčas sprečak prakuror vyklučyŭ z abvinavačvańniaŭ Ušackamu «matyvy palityčnaj i ideałahičnaj varožaści, źviazanaj z elektaralnaj kampanijaj u Respubliki Biełaruś». Adnak sama Volha Čamadanava zajaviła, što jaje mierkavańnie tut nieadnaznačna, i adrazu była niazhodnaja z prakuroram, što abraźlivaje paviedamleńnie abvinavačanaha nie źviazanaje z elektaralnaj kampanijaj:
«Usie padziei, jakija na telehram-kanale raźmiaščalisia, prynamsi, kamientavalisia ad MUS, tak ci inakš byli źviazanyja z tym samym pieradvybarnym pieryjadam. I ja skažu bolš, što, napeŭna, mienavita ŭ hety pieryjad času da 9 žniŭnia takija paviedamleńni z pahrozami i abrazami, jakija mienavita tyčacca pieradvybarnaj kampanii, pastupali šmatlikija».
Adnak potym na ŭdakładnialnyja pytańni sudździ jana skazała, što padtrymlivaje pazicyju dziaržabvinavaŭcy. Prakuror zapytaŭ amal samaje strohaje pakarańnie pa art. 369 KK — 2 hady abmiežavańnia biez nakiravańnia va ŭstanovy papraŭčaha typu. Sudździa Taćciana Akavitaja pryznačyła mienavita takoje pakarańnie. Akramia taho, sud abaviazaŭ Ušackaha vypłacić Volzie Čamadanavaj 5000 rubloŭ maralnaj škody.