Jak TikTok u Rasii staŭ palityčnym
Sacsietka z karotkimi humarystyčnymi videa pieražyła imhniennuju palityzacyju, paśla taho jak Navalny apublikavaŭ svoj film pra nieźličonyja bahaćci Uładzimira Pucina.
Fota Depositphotos.com
Na pačatku tydnia Alaksiej Navalny zapisaŭ videazvarot z pastarunku palicyi, dzie jaho sudzili, z zaklikam vychodzić na mitynhi 23 studzienia. Paśla hetaha cheštehi #svabodunavalnamu, #23studzienia i #navalnyžyvi pačali imkliva nabirać papularnaść, a stužka zapoŭniłasia videa z zaklikami pajści na mitynh i paradami, jak pravilna brać udzieł u pratesnych akcyjach. Takija videa źbirajuć miljony łajkaŭ i sotni tysiač kamientaroŭ.
Pa słovach Słavy Varfałamiejeva, aŭtara telehram-kanała «Jaho zavuć «CikTok», dva hady tamu ŭ ciktoku nie było i namioku na palityku. Redkaje videa na palityčnuju temu było zvyšniezvyčajnym dla sacsietki. Ale pastupova palityki ŭ ciktoku, papularnaha siarod padletkaŭ, stanaviłasia ŭsio bolš. Naprykład, deputat-kamunist Sarataŭskaj abłdumy Mikałaj Bandarenka nabraŭ 386 tysiač padpisčykaŭ u ciktok, dzie vykładvaŭ videa z zabastoŭkami na zavodzie i svaje emacyjnyja vystupleńni ŭ abłsaviecie, paviedamlaje Ruskaja słužba Bi-bi-si. Ale heta nie paraŭnać z maštabnaj palityzacyjaj sacsietki paśla viartańnia Navalnaha ŭ Rasiju i rasśledavańnia ab pryvatnym pałacy Pucina ŭ Hielendžyku koštam 1,5 miljarda dalaraŭ.
Videa pra Navalnaha i pratesty dzielacca na niekalki typaŭ, raskazvaje rasijskaje vydańnie «Mieduza». Adno z samych papularnych było takim: školnica Viktoryja zdymaje partret Pucina ŭ kłasach, a zamiest jaho viešaje partret Navalnaha. Paźniej heta videa było vydalena, bo, pa słovach Viktoryi, u jaje ŭźnikła šmat prablem praz hetu publikacyju.
U asobnych videa błohiery nakładvajuć pratesnuju muzyku, naprykład, uryvak z treka repiera Face: «Być suprać ułady — nie značyć być suprać Radzimy».
Ciktokieram palubiłasia fraza Julii Navalnaj, jakuju błohiery ciapier aktyŭna vykarystoŭvajuć u svaich videa: «Chłopčyk, vodački nam pryniasi, my dadomu lacim». Heta videa Julija i Alaksiej zapisali ŭ samalocie za niekalki hadzin da taho, jak palityka zatrymali na miažy. Raniej taki pryjom byŭ zusim nie palityčnym: ciktokiery vykarystoŭvali viadomyja frazy ŭ videa pra lubimych znakamitaściaŭ.
Niekalki papularnych błohieraŭ apublikavali padobnyja videa z krytykaj Navalnaha. Pry hetym raniej hetyja błohiery nie vykazvalisia nakont palityčnych tem. Padpisčyki padazrajuć ich u supracoŭnictvie z uładami. A rekłamnaje ahienctva Wildjam zajaviła, što spyniaje supracoŭnictva z takimi błohami, bo, jak zajaviŭ kiraŭnik ahienctva Jarasłaŭ Andrejeŭ, ahienctva zajmajecca rekłamaj brendaŭ na placoŭkach błohieraŭ, a nie prapahandaj i palityčnaj rekłamaj.
Akramia hetaha, u ciktoku źjaviłasia šmat rolikaŭ, dzie palicejskija zryvajuć ź siabie pahony — pa anałohii ź videa padčas biełaruskich pratestaŭ. Adnak redakcyja «Mieduza» źviazałasia ź niekatorymi aŭtarami padobnych videa, i vyjaviłasia, što adzin ź ich nikoli na pracavaŭ u palicyi i źniaŭ videa dziela prahladaŭ, a druhi syšoŭ z pravaachoŭnych orhanaŭ paŭhoda tamu, a svaim videa chacieŭ, kab «palicejskija zadumalisia pra svaje dziejańni».
20 studzienia Raskamnahlad pa patrabavańni Hienprakuratury nakiravaŭ zvarot u kampaniju TikTok, kab z sacsietki vydalili ŭsie materyjały, źviazanyja z palityčnymi zaklikami da ŭdziełu ŭ pratesnych akcyjach. Akramia hetaha, Hienprakuratura patrabavała zabłakavać usie sajty z padobnym źmiestam, a Raskamnahlad pahražaje sacsietkam štrafami da 4 miljonaŭ rubloŭ.
Paplečnik Alaksiej Navalnaha Leanid Vołkaŭ nakont efiektyŭnaści ciktoka vykazaŭsia tak: «Nakolki virusnaja chvala ŭ ciktoku zdolna stać chvalaj na vulicy, my nie viedajem — i nichto nie viedaje. Heta budzie pieršy važny ekśpierymient. Zaraz stanovicca zrazumieła, ci źjaŭlajecca ciktok płatformaj dla raspaŭsiudžvańnia palityčnaha kantentu ŭ Rasii».
