«Pieraviali ŭ kamieru z kruhłasutkavym nazirańniem». Ihar Łosik haładaje ŭžo 39 dzion
Za kratami błohier i palitviazień znachodzicca z 25 červienia 2020 hodu — užo 209 dzion, a haładaje z 15 śniežnia, nahadvaje «Radyjo Svaboda».
«Ihar praciahvaje haładoŭku, — raskazaŭ advakat palitviaźnia Dźmitryj Lepretar, jaki naviedaŭ Ihara ŭ žodzinskim SIZA 21 studzienia. — Jon vyhladaje nie vielmi dobra, ale śćviardžaje, što adčuvaje siabie prykładna tak ža, jak i minuły raz. Jaho turbuje cisk. Jon źmianiajecca na praciahu dnia. Dastatkova surjozna. Ihara pieraviali ŭ novuju kamieru, heta zdaryłasia ŭčora. Heta susiedniaja kamiera, tam try videakamery, jana ŭsia prahladajecca. U raniejšaj kamiery Ihara nazirańnia nie było. Ciapier Ihar faktyčna znachodzicca pad kruhłasutkavym videanazirańniem».
Pa słovach advakata, 21 studzienia Ihar atrymaŭ kala 70 listoŭ. Jon starajecca adkazvać na ŭsie, nakolki chapaje siłaŭ. Taksama palitviazień pieradaje vialikuju padziaku śviataram, jakija vystupili z paručalnictvami za jaho.
«Ihar taksama viedaje pra haładoŭki, jakija abvieščanyja ŭ znak salidarnaści ź im. Jon prosić ludziej spynić ich. Matyvuje tym, što jaho haładoŭka była asabistym vybaram, jaki pradyktavali abstaviny, u jakija Ihar trapiŭ. Prajavić salidarnaść možna inšymi mietadami, jakija nie padviarhajuć žyćcio niebiaśpiecy. Ihar viedaje, što takoje haładoŭka i razumieje, što heta vielmi składana».
Što adbyvajecca z čałaviekam padčas haładoŭki? Raskazvajuć doktar i biełarus, jaki haładaŭ na pratest piać razoŭ
