U Breście 10 čałaviek sudziać za karahod na skryžavańni Mašerava i bulvara Kasmanaŭtaŭ
Na łavie padsudnych — studentka, piedahoh, dyrektar firmy, inžynier-prahramist, hruzčyki, časova biespracoŭny i inš.
U sudzie Leninskaha rajona Bresta pačaŭsia razhlad kryminalnaj spravy, abvinavačanymi pa jakoj prachodziać 10 čałaviek, u tym liku dźvie dziaŭčyny. Raniej im było vystaŭlena abvinavačvańnie pa častcy 1 artykuła 342. Havorka idzie pra padziei, jakija adbyvalisia 13 vieraśnia: maštabnaja akcyja pratestu ŭ toj dzień skončyłasia karahodam na skryžavańni bulvara Kasmanaŭtaŭ i praśpiekta Mašerava i nastupnym razhonam pratestoŭcaŭ vadamiotam. Praz dva dni va USK pa Bresckaj vobłaści zaviali kryminalnuju spravu ab masavych biesparadkach, paviedamlaje «Bresckaja hazieta».
Razhladaje spravu sudździa Śviatasłaŭ Kalina. Pasiadžeńnie pačałosia z paŭhadzinnaj zatrymkaj — zała nie zmahła źmiaścić usich udzielnikaŭ pracesu i tych, chto chacieŭ prysutničać, usim, kamu nie chapiła miescaŭ, daviałosia pakinuć pamiaškańnie.
Na łavie padsudnych — Mikałaj Fiedarenka, Jarasłaŭ Jarašuk, Jaŭhien Kaŭpačyk, Viktar Dzienisienka, Vital Litvin, Maksim Žaraŭ, Maryna Hłazava, Vadzim Varanovič, Alaksiej Jakubuk i Maryna Siracan.
Pavodle viersii abvinavačvańnia, kožny z 10 padsudnych u hrupie ź inšymi asobami naŭmysna ŭziaŭ aktyŭny ŭdzieł u hrupavych dziejańniach, jakija hruba parušajuć hramadski paradak. «Ich dziejańni byli spałučanyja ź vidavočnym niepadparadkavańniem zakonnym patrabavańniam pradstaŭnikoŭ ułady, paciahnuli parušeńnie pracy transpartu, pradpryjemstvaŭ i arhanizacyj. U pryvatnaści, z-za prastoju tralejbusnamu parku byŭ naniesieny ŭron 619 rubloŭ 55 kapiejek, aŭtobusnamu — 40 rubloŭ 37 kapiejek».
Niekatoryja abvinavačanyja, jak nastaŭnica Maryna Hłazava, całkam pryznali svaju vinu, častka ź ich pryznali vinu častkova i niekalki čałaviek zajavili, što vinavatymi siabie nie ličać.
Pieršym pakazańni daŭ Mikałaj Fiedarenka. Jon kaža, što ŭ toj dzień siadzieŭ u kaviarni, ubačyŭ vialikuju kałonu pratestoŭcaŭ i vyrašyŭ dałučycca da natoŭpu. U karahodzie nie ŭdzielničaŭ, ale pieraškadžaŭ ruchu transpartu. Svaju vinu pryznaŭ całkam.
Vital Litvin skazaŭ, što dałučyŭsia da pratestoŭcaŭ u rajonie CUMa. Ludzi śmiajalisia, razmaŭlali: «Było vydatna».
