Čały ŭ intervju Miełkazioravu: Albo carstva svabody, albo paŭnavartasny Aśviencim — inšaha nie dadziena
Viadomy ekanamist (siabie jon nazvaŭ papularyzataram) daŭ intervju prajektu Mikity Miełkaziorava «Žyćcio-malina». Naprykład, patłumačyŭ, čamu Rasija daje hrošy, što ŭ Łukašenki ŭžo niama elektaratu, čamu nienavidzić Kaca i čamu našaj krainie navat karysny defołt.
Raspaviadajučy, čym situacyja 2020 hoda adroźnivajecca ad vybaraŭ-2015 i vybaraŭ-2006, Čały adznačyŭ, što siońnia ŭsie dakładna viedajuć, što nas šmat, što mienšaść u praciŭnika. «Heta adčuvańnie, i maralnaj racyi, i taho, što my pieramahli, ale pieramohu ŭ nas skrali, užo nikudy nie dzieniecca».
«Pieraharnuć staronku, zabyć pra 400 vypadkaŭ katavańniaŭ, 30 tysiač asudžanych na sutki? Tak nie byvaje. Prymireńnia nie byvaje biez pakajańnia», — kateharyčny ekanamist.
«Adbyłosia niešta biezzvarotnaje. Užo darohi nazad niama. Uładzie vielmi chaciełasia b viarnucca nazad u 8 žniŭnia, pra što kazała Kačanava. Ale heta niemahčyma. I my, i jany ŭžo zrabili vielmi šmat biezzvarotnych rečaŭ. Tak, jak raniej, užo nie budzie dakładna».
«A skončycca heta moža tolki dvuma scenarami. Albo ŭsio pojdzie ŭ bok demakratyčnaj revalucyi ŭ carstva svabody, albo tut budzie paŭnavartasny Aśviencim. Tamu što pa-inšamu nijak».
Razam z tym u siońniašniaj situacyi ŭrad i ekanomika mohuć pratrymacca hod, miarkuje Čały.
«Ekanomika ciapier usia praktyčna ŭ paraličy, u stanie čakańnia. Heta ž bačna pa tym, što haryzont płanavańnia rezka skaraciŭsia. U takoj situacyi niemahčymyja inviestycyi, naohuł nijakija, ja ŭžo nie kažu pra zamiežnyja. Chto ŭ zdarovym rozumie budzie ciapier pašyrać biznes?»
«Dla mianie nasamreč dziŭna, što i tak dastatkova doŭha ŭsio. Ja baču hieraičnyja dziejańni Nacbanka. Jamu ž pryjšłosia pieražyć i adtok depazitaŭ, i nabieh na abmieńniki, i zołatavalutnych reziervaŭ jany ŭ hetym hodzie 20% stracili. Pryčym pierad hetym čatyry hady ludzi naohuł nie zhadvali devalvacyju».
«Sprabuju zrazumieć, što adbyvajecca ŭ kalidorach ułady. I toje, što danosicca adtul…» — zadajecca pytańniem Siarhiej.
«Pakul atrymlivajecca tak, što ad dziejańniaŭ Rasii zaležyć vielmi šmat. Mnie heta nie padabajecca, ale heta fakt. Heta i jość strata mižnarodnaj lehitymnaści, kali los tvajoj krainy vyrašajuć nie ŭ tvajoj krainie»
«Ale heta nie značyć, što ŭsio, što Pucin vyrašyć, tak i budzie. Pucin moža chacieć usio, što zaŭhodna, ale voś ci atrymajecca tut usio, što jon choča».
Čały miarkuje, što samaja hałoŭnaja ryzyka ciapier — heta nie ryzyka niejkaha krachu, źbiadnieńnia, devalvacyi. «Hałoŭnaja ryzyka — heta apuskańnie ŭ zastoj bieznadziejnaści.
Kali ŭsie, chto zdolny, kankurentny na rynku, źjedzie adsiul, bo tut nie budzie ni ŭnutranaha popytu, ni ŭmoŭ, a tyja, što zastalisia, buduć charčavacca pieravodami z-za miažy i padnožnym kormam na dačnych učastkach. Biełaruś moža stać bankrutam, pryčym u kłasičnym jaho razumieńni. Heta i nazyvajuć defołt».
Ale bajacca defołtu nie varta, paśla defołtu — rost, jak stała ŭ Rasii ŭ 1999-m.
Kali ŭ Biełarusi adbuducca novyja vybary, to pieramahčy Łukašenku zmoža chto zaŭhodna, bo heta budzie pratesnaje hałasavańnie, jak faktyčna było 9 žniŭnia, miarkuje Čały.
Pry kancy Siarhiej raskazaŭ hruzinski aniekdot. «Kali ŭ hruzina spytali, jaki transpart samy chutki ŭ śviecie? — Tralejbus. — Čamu? — Bo jon pryviazany tak biehaje, a kali adviazać, palacić, napeŭna».
Toje ž i dla Biełarusi. «Ja da taho, što kali my takija cudy (pratest mietadami Handzi) pakazvajem śvietu pad takim ciskam, to jak heta budzie, kali hety cisk źniknie.
Kali źniknie hety strach, hety hvałt, kali možna budzie narmalna ŭzdychnuć, iści pa vulicy i nie dumać, što tabie treba chistać hety režym, zajmacca baraćboj, bajacca, a možna prosta budavać mirnaje žyćcio. Voś heta realna budzie kruta i heta sapraŭdy buduć cudy. Dumaju, što nam realna buduć usie zajzdrościć».
«Ja ŭpeŭnieny, što ŭvieś śviet ciapier sočyć za tym, ci atrymajecca ŭ nas. Ab 2020 hodzie buduć potym manahrafii i dysiertacyi pisacca, zdymacca filmy. Heta budzie padzieja XXI stahodździa, jakaja źmianiła chod historyi. Voś što ciapier adbyvajecca», — reziumavaŭ ŭ kancy intervju Siarhiej Čały.
