Palitviaźnia Miadźviedskaha asudzili na try hady «chimii», adnak vyzvalili ŭ zale suda
Prysud ahučyła 15 studzienia sudździa Leninskaha rajona Minska Taćciana Šocik.
Arcioma Miadźviedskaha abvinavačvali ŭ ździajśnieńni dziejańniaŭ, jakija hruba parušajuć hramadski paradak (art. 342 KK RB). Jaho pryznali vinavatym pa hetym artykule i prysudzili da troch hadoŭ abmiežavańnia voli z nakiravańniem ŭ papraŭčuju ŭstanovu adkrytaha typu («chimija»). Mienavita stolki i prasiŭ na papiarednim pasiadžeńni prakuror, piša spring96.org.
Taksama sudździa pastanaviła zaličyć u termin pakarańnia jaho znachodžańnie pad vartaj z 19 kastryčnika pa 15 studzienia ŭ suadnosinach «adzin dzień pad vartaj za dva dni abmiežavańnia voli».
Arcioma Miadźviedskaha vyzvalili ŭ zali suda pad padpisku ab niavyjeździe.
Akramia taho sudździa vyniesła pryvatnaje vyznačeńnie na adras kiraŭnictva «Burhier Sici», dzie pracuje Miadźviedski, u jakim prosić arhanizavać prafiłaktyčnuju pracu ab niedapuščalnaści ździajśnieńnia złačynstvaŭ.
Arciom Miadźviedski byŭ zatrymany 19 kastryčnika. Spačatku jamu było pradjaŭlena abvinavačvańnie pa č. 2 art. 293 KK RB (udzieł u masavych biesparadkach), zatym spravu pierakvalifikavali ŭ hrupavyja dziejańni, jakija hruba parušajuć hramadski paradak (art. 342 KK RB). Arcioma abvinavacili ŭ tym, što jon ŭviečary 10 žniŭnia ŭdzielničaŭ u akcyi pratestu kala st. m. Puškinskaja, vykaciŭ na darohu kamień, što pryviało da błakavańnia prajeznaj častki.
