U Maładziečanskim rajonie były muž pabiŭ supiernika, a paśla vyliŭ na jaho 5 litraŭ zialonaj farby
Zdareńnie adbyłosia ŭ pasiołku Čyść.
U dziažurnuju čaść Maładziečanskaha RAUS paviedamili z chutkaj dapamohi, što miedyki dapamahali źbitamu 39-hadovamu mužčynu. Z množnymi traŭmami paciarpiełaha zabrali ŭ rajonnuju balnicu, paviedamlaje «Rehijanalnaja hazieta».
Apieratyŭniki vyśvietlili, što padstavaj dla kanfliktu stali pierypietyi ŭ asabistym žyćci 37-hadovaj miascovaj žycharki. Žančyna ŭžo bolš za hod nie žyvie sa svaim zakonnym mužam i nibyta źbirajecca ź im razyścisia. Heta nie zadavalniała muža. U supiernikaŭ časam zdaralisia vyśviatleńnia adnosin.
U toj dzień 40-hadovy žychar pasiołka prachodziŭ mima doma, dzie pražyvaje žonka, i, zaprykmieciŭšy śviatło ŭ voknach, nakiravaŭsia da jaje ŭ kvateru dla čarhovaha vyśviatleńnia adnosin. Adnak žančyny ŭ hety čas nie było. Byŭ tolki sužyciel. Pamiž supiernikami ŭspychnuła svarka.
Muž nanios supierniku nie mienš za try ŭdary rukami i nahami pa hałavie, tułavie i kaniečnaściach, a zatym vyliŭ na apanienta piacilitrovuju banku zialonaj farby.
U pošukach dapamohi paciarpieły mužčyna vypaŭz z kvatery na leśvičnuju kletku i pahrukaŭ u dźviery da susiedziaŭ. Mienavita jany i vyklikali bryhadu miedykaŭ. Ciapier paciarpieły znachodzicca ŭ miedycynskaj ustanovie, jaho žyćciu ničoha nie pahražaje.
Supracoŭniki kryminalnaha vyšuku na praciahu sutak zatrymali padazravanaha ŭ naniasieńni ciažkich cialesnych paškodžańniaŭ. Sam fihurant rastłumačyŭ, što pryčynaj ździajśnieńnia ŭčynku stała reŭnaść.