Pieršy sud pa «spravie Cichanoŭskaha». U Łahojsku sudziać palitviaźnia Uładzimira Niaronskaha
U sudzie Łahojskaha rajona 12 studzienia pačaŭsia sud nad palitźniavolenym aŭtaram jutub-kanała «Słuck dla žyćcia» Uładzimiram Niaronskim. Jaho sudziać pa dvuch artykułach Kryminalnaha kodeksa: č. 1 art. 342 (Arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich) i 369 (Abraza pradstaŭnika ŭłady). Błohier abvinavačvajecca ŭ arhanizacyi «niezakonnych hramadska-masavaha mierapryjemstvach» pa ŭsioj Biełarusi. Heta pieršy sud pa «spravie Cichanoŭskaha». Taksama palitviaźnia abvinavačvajuć ŭ publičnaj abrazie ŭ jaho roliku na jutub-kanale staršyni Słuckaha rajvykankama. Spravu razhladaje staršynia suda Łahojskaha rajona Alaksandr Rybakoŭ, piša spring96.org.
Spravu Uładzimira Niaronskaha razhladaje staršynia suda Łahojskaha rajona Alaksandr Rybakoŭ. Dziaržaŭnaje abvinavačvańnie padtrymlivaje namieśnik prakurora Łahojskaha rajona Alaksandr Laŭkovič. Na sud pryjechaŭ paciarpieły pa spravie pa art. 369 Kryminalnaha kodeksa (Abraza pradstaŭnika ŭłady) staršynia Słuckaha rajvykankama Andrej Jančeŭski. Z žodzinskaj śledčaj turmy na sud pryvieźli i Uładzimira Niaronskaha.
Na pytańni ab davieru sudu Niaronski skazaŭ: «Ja ŭdziačny Bohu, što pa ŭsioj krainie pakataŭsia i patrapiŭ mienavita siudy».
«Natchniŭšysia zaklikami Cichanoŭskaha, Statkieviča, Sieviarynca». U čym abvinavačvajuć błohiera?
Zhodna abvinavačvańniu, Uładzimir Niaronski, budučy aktyvistam «Strana dla žiźni», pa zmovie ź Siarhiejem Cichanoŭskim arhanizavaŭ hrupavyja dziejańni, jakija hruba parušajuć hramadski paradak u Homieli, Mazyry, Breście, Minsku, Słucku, Hrodnie, Mahilovie. Srodak ździajśnieńnia złačynstva — jutub-kanał i telehram-kanał «Strana dla žiźni». U abvinavačvańni havorycca, što «natchniŭšysia zaklikami Cichanoŭskaha, Statkieviča, Sieviarynca», jon stvaryŭ jutub-kanał «Słuck dla žiźni». Pa viersii śledstva, jon 2 lutaha sustreŭsia ź Cichanoŭskim, ź jakim raźmierkavaŭ roli ździajśnieńnia złačynstva.
U vinu błohieru staviać administravańnie hetaha kanała, na jakim raźmiaščaŭ videaroliki, u jakim byli «zakliki, adrasavanyja šyrokaj hrupie asob uziać udzieł u hrupavych dziejańniach, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady abo paciahnuli parušeńnie pracy transpartu, pradpryjemstvaŭ, ustanoŭ abo arhanizacyj». U hetych rolikach, jak havorycca ŭ abvinavačvańni, prapahandavałasia biespakaranaść. Takija zakliki śledstva ŭbačyła ŭ rolikach Uładzimira Niaronskaha «Daroha na Minsk», «Vsie prijezžajtie v posiołok Družnyj Jevroopt», «Zadieržanije Družnyj TEC-5», jakija źbirali da 40 tysiač prahladaŭ. Prakuror pieraličyŭ u abvinavačvańni ŭsie roliki «Słucka dla žiźni», navat užo vydalenyja.
Taksama ŭ rolikach Uładzimira Niaronskaha ŭbačyli publičnuju abrazu staršyni Słuckaha rajvykankama. Pa viersii abvinavačvańnia, svaimi słovami ŭ rolikach (vyrazami «taki mer na*uj nie treba», «kryvadušnik» i inšyja) jon prynios maralnyja pakuty, padarvali jaho aŭtarytet asabista jak pradstaŭnika miascovaj vykanaŭčaj ułady i ŭ cełym usich miascovaj ułady.
Abvinavačvańni Uładzimira Niaronskaha prakuror začytvaŭ kala 40 chvilin (poŭnaja viersiju «Viasna» apublikuje paźniej).
«Cichanoŭski da hetaha nie maje adnosin». Staŭleńnie palitviaźnia da abvinavačvańniaŭ
Pa č. 1 art. 342 Kryminalnaha kodeksa Uładzimir Niaronski pryznaŭ vinu častkova. Jon skazaŭ, što pryznaje, što sapraŭdy apublikoŭvaŭ hetyja roliki, u jakich vielmi emacyjna vykazvaŭsia, ale nijakaha zhavoru ź Cichanoŭskim i inšymi asobami nie było. Pa art. 369 Kryminalnaha kodeksa błohier całkam pryznaŭ vinu, skazaŭ, što hatovy publična prynieści prabačeńni.
«Płaniorki ŭ vykankamie pačynalisia z abmierkavańnia maich rolikaŭ». Dopyt palitviaźnia
U sudzie prystupili da dopytu Uładzimira Niaronskaha. Prakuror pačaŭ dopyt z adnosinaŭ jaho ź Siarhiejem Cichanoŭskim, ich znajomstva, sustreč.
«Ja chaču zaŭvažyć, što Cichanoŭski mnie nie daviaraŭ. Jamu niechta skazaŭ, što ja ad KDB — «zasłany kazačok». Ja tady vielmi ździŭlaŭsia, što jon tak reahuje na mianie. Tamu jon mnie nie daviaraŭ. My ź im tak i nie znajšli ahulnaj movy. Ja taki čałaviek».
Niaronski na sudzie raspavioŭ, što ź Cichanoŭskim paznajomiŭsia ŭ kancy śniežnia 2019 hoda. Kali jon lažaŭ u lakarni, to ŭbačyŭ roliki «Strana dla žiźni». Jon ubačyŭ u jutubie, što Cichanoŭski biare intervju ŭ čałavieka. Taksama Cichanoŭski zapytaŭ na roliku, ci jość u jaho padpisanty sa Słucku, kab jamu zmahli raspavieści, što tam adbyvajecca. Uładzimir Niaronski napisaŭ u kamientary, što jon sa Słucka i pahadziŭsia dapamahčy Cichanoŭskamu sa zdymkaj ab miascovym pradpryjemstvie. 2 lutaha 2020 hoda jany sustrelisia. U pramym efiry ŭ Słucku jany abmiarkoŭvali situacyju, pradpryjemstva, što jany znachodziacca ŭ drennym stanie.
«Ale heta nie vina mera, jamu ŭžo dastałasia takaja spadčyna», — kaža Niaronski.
Paśla hetaha Niaronski vyrašyŭ aśviatlać słuckija prablemy, ale jon nie viedaŭ jak heta rabić. Uładzimir raspavioŭ na sudzie, što jon nie moh stvaryć jutub-kanał, tamu što drenna viedaŭ mahčymaści kamputara i internetu. Cichanoŭski stvaryŭ jamu jutub-kanał i dasłaŭ parol, jaki Niaronski paźniej źmianiŭ.
«Ja źmianiŭ parol pa svajoj inicyjatyvie. Kali mianie abvinavacili, što ja zarablaju na svaim jutub-kanale hrošy, to ja vydaliŭ usie roliki. Mnie kryŭdna było. Ja za spraviadlivaść».
«Chaču skazać, što šmat dobraha adbyłosia za hety čas [viadzieńnia kanała «Słuck dla žyćcia»]. Prynosiŭ karyść na karyść hramadstva. Płaniorki ŭ vykankamie pačynalisia z abmierkavańnia maich rolikaŭ. Efiekt byŭ, sapraŭdy navodziŭsia paradak».
Uładzimir Niaronski raspavioŭ, što Siarhiej Cichanoŭski krytykavaŭ jaho za taki rezki styl viadzieńnia jutub-kanała, kazaŭ, što nielha tak dziorzka vykazvacca nakont uładaŭ. Niaronski skazaŭ, što sam vyrašaŭ, jak i jakim čynam vieści svoj kanał, jon byŭ niezaležny. Pa słovach Niaronskaha, jon sam vyrašaŭ, što budzie ŭ jaho rolikach, ź Cichanoŭskim jon nie ŭzhadniaŭ ich źmiest.
«Ź Cichanoŭskim u nas byli roznyja pohlady. Ja vielmi dziorzka vykazvaŭsia z nahody ŭłady, a Cichanoŭski kazaŭ, što nielha tak emacyjna vykazvacca. Heta vidać pa maim pieršym pramym efiry z Mazyra, dzie ŭ dziaciej ź invalidnaściu chacieli zabrać dziciačy centr «Viasiołka». Ale, dziakuj bohu, dzieciam jaho viarnuli, usio vyrašyłasia. Ja tady płakaŭ sam. Ale Cichanoŭski paru razoŭ niehatyŭna vykazaŭsia z nahody maich rolikach, što ja zanadta emacyjny».
Uładzimir Niaronski raspavioŭ, što za ŭvieś čas asabista ź Cichanoŭskim sustrakaŭsia razoŭ 4-5: pramy efir u Słucku, pryjazždaŭ na sud padtrymać Niaronskaha ŭ Słuck, razam jeździli ŭ Brest, dzie Niaronski byŭ kiroŭcam.
«Vy zrazumiejcie, u mianie nie mahło być nijakich damoŭlenaścieŭ ź Cichanoŭskim, bo jon mnie nie daviaraŭ».
5 dzion na śviežym pavietry za 252 dni źniavoleńnia
Uładzimir raspavioŭ, što padčas viadzieńnia kanała jamu pahražali ŭ KDB turmoj. Palitviazień skazaŭ, što ŭ jaho vielmi balić śpina, jon praciahnuŭ adkazvać na pytańni prakurora sidziačy. Potym Uładzimir zapłakaŭ i raspavioŭ pra svajo ŭtrymańnie pad vartaj:
«Ja chaču skazać Vam [źviartajecca da sudździ], kab Vy zrazumieli mianie jak čałavieka. Dva hady tamu ja pavieryŭ u Boha. Ja pravioŭ u źniavoleńni 252 dni. 60 sutak — u adzinočcy. 21 raz za ŭvieś čas ja schadziŭ u duš. 12 etapaŭ, 24 poŭnych pieratrusa, pravioŭ 5 dzion na śviežym pavietry. Prajšoŭ 50 sudoŭ, 90 źniavolenych. Žyć u adnoj chacie z hałavarezami i zastacca čałaviekam… [Niaronski płača] Za hetyja 252 dni ja ni razu nie paškadavaŭ, što trapiŭ u turmu. Ja prašu prabačeńnia ŭ spadara Jančeŭskaha, ja sapraŭdy nie mieŭ racyju.
Turma čałavieku karysnaja, ale praz paŭhoda čałaviek pryvykaje da turmy i jon ličyć jaje druhim domam. Praz paŭhoda čałaviek zabyvaje pra volu naohuł. Mianie pałochać turmoj bieskarysna, ja nie chaču kab praciahvalisia hetyja sudy. Ja turmy nie bajusia. Ja tolki chaču paprasić prabačeńnia ŭ maich rodnych.
U maim IČU ciapier niama aciapleńnia. My holimsia nahała, kab nas nie zajadali vošy. Mianie ŭ Akreścina 3 dni trymali ŭ śpiecyjalnaj «chacie», dzie mianie źjadalisia kłapy. Heta dla palityčnych. My ŭžo kocimsia ŭ biezdań, tak nielha».
Sudździa spyniŭ palitviaźnia i skazaŭ adkazvać pa paradku na pytańni prakurora. Uładzimir Niaronski praciahnuŭ adkazvać na pytańni.
«Ja nie razumieju, čamu ŭsie (supracoŭniki KDB, śledčyja) ličyli, što ja pravaja ruka Cichanoŭskaha. Jany chacieli ŭ mianie niešta vybić, ale ja ničoha nie viedaŭ».
Prakuror zapytvaŭ u Niaronskaha, ci atrymlivaŭ jon hrašovaje ŭznaharodžańnie za raźmiaščeńnie svaich rolikaŭ na jutub-kanale. Uładzimir skazaŭ, što navat u pajezdkach ź Cichanoŭskim jon sam sabie kavu nabyvaŭ. Prakuror zapytvaŭsia taksama ŭ jaho, ci viedaje, ci atrymlivaŭ hrošy Cichanoŭski ad inšych asobaŭ, ad zamiežnych dziaržavaŭ. Niaronski raspavioŭ, što jamu tolki viadoma, što Siarhiej Cichanoŭski źbiraŭ hrošy ŭ pramym efiry na svajoj jutub-placoŭcy.
Prakuror zapytaŭ, ci znajomy Niaronski z Statkievičam i Sieviaryncam. Uładzimir skazaŭ, što adzin raz bačyŭsia ź Sieviaryncam na prezientacyi jaho knihi, a z Statkievičam navat nie znajomy:
«My razmaŭlali ź Sieviaryncam pra Boha. Mnie hetaja palityka-prastytucyja niecikava. Mnie cikava było, jak jon pryjšoŭ da Boha».
«Ja zaklikaŭ čynoŭnikaŭ pačuć ludziej, a nie zaklikaŭ ludziej da čahości»
Prakuror pačaŭ dopyt pra abrazy Jančeŭskaha. Staršynia Słuckaha rajvykankama nie zajaŭlaŭ ni materyjalnych, ni maralnych patrabavańniaŭ. Prakuror spytaŭ, ci jość u Niaronskaha niepryjaznyja stasunki z pradstaŭnikom Słuckaha rajvykankama. Uładzimir Niaronski patłumačyŭ u sudzie, što kanflikt ź Jančeŭskim pačaŭsia padčas pajezdki ŭ adnu viosku Słuckaha rajona.
«Tam zapachali darohu na pole da mohiłak, pa jakoj šmat hadoŭ chadzili miascovyja žychary. Na sustrečy Jančeŭskaha ź miascovymi žycharami, u jaho stary spytaŭ, čamu i navošta jany heta zrabili. Tady Jančeŭski adkazaŭ jamu: «Zakryj rot, a to milicyju vyklikaju». Ja aburyŭsia, i na emocyjach nazvaŭ mera ch*ram».
Niaronski zajaviŭ na sudzie, što nie ličyć słova «ch*r» abraźlivym. Raspavioŭ, što padčas śledstva heta vyraz adpraŭlali na ekśpiertyzu.
Prakuror pytaŭsia ŭ Nieronskaha pra stvareńnie rolikaŭ «Licie-Mer» i «Licie-Mer 2. Słaboniervnym nie smotrieť». Niaronski paraiŭ prakuroru pahladzieć hety rolik, bo jon «mocny»:
«Jon raspaviadaje pra vypadak u vioscy Sorahi, dzie dziaŭčynie na pradpryjemstvie ŭ kałhasie «Sorahi-Ahra» adrezała palcy, jaje adpraŭlali pracavać, a ŭ vypadku, kali pačnie skardzicca, pahražali zabrać dziaciej».
Uładzimir Niaronski za čas suda paśpieŭ raspavieści niekalki padobnych historyj, pakazvajučy na niespraviadlivaść i biaździejnaść uładaŭ. Prakuror pieraličvaje ŭsie roliki ź jutub-kanała «Słuck dla žiźni» i zapytvajecca, ci stvaraŭ jon hetyja roliki. Niaronski ŭsio padćviardžaje i supravadžaje heta kamientarami, jakaja niespraviadlivaja situacyja adlustroŭvajecca ŭ hetych rolikach, jak i za jaki rolik jaho «presavali». Ale nie ŭsie źmiesty rolikaŭ Niaronski moh uspomnić. Paźniej hetyja roliki buduć prahladacca ŭ sudzie.
«Mnie niecikavyja hetyja ŭsie apazicyi. Ja nie padzialaŭ ich pohlady, i nie padzialaju da hetaha času. Ja kazaŭ, što čałaviek pavinien zastavacca čałaviekam. Moj deviz: davajcie dapamahać adzin adnamu. Usio. Ja zaklikaŭ čynoŭnikaŭ pačuć ludziej, a nie zaklikaŭ ludziej da čahości. dyrektar Słuckaha cukrovaha zavoda byŭ vielmi krutym, ale ciapier jon sam ža jeść takuju ž bałandu jak i ja. A viedajecie z čaho ŭsio pačałosia? Jon skazaŭ čałavieku, što nivodny zek u jaho na zavodzie pracavać nie budzie, a praź miesiac jaho samoha zatrymali.
Stolki biezładździa ŭ krainie. Heta hienacyd. I voś va što heta ŭsio vyliłasia. Heta nazapašvałasia 26 hadoŭ. My ŭ invalidaŭ zabrali dom! Vy što? Ja kažu, Ryhoravič, Vy što? Ja ŭziaŭ telefon i skazaŭ, što hetaja ŭłada — djabał! Pahladzicie, Łukašenka taksama pačaŭ uzhadvać Boha, raniej jon kazaŭ, što jon ateist. Ale, kali ludzi vyjšli na vulicu, jon zadumaŭsia. U našaj krainie nielha słova skazać. U našaj krainie ciapier ničoha nielha, usio zabaroniena, nu vy ž razumiejecie, tak?
Ja nie zaklikaŭ ludziej parušać zakon. Ja tolki skazaŭ, kab hramadzianie čynoŭniki pierastali pavodzić siabie nieprystojna. Zaklikaŭ nie ŭbačyŭ ni ja, ni ludzi, a tolki toj, kamu heta treba.
Sudździa znoŭ paprasiŭ Niaronskaha adkazvać na pytańni pa sutnaści, na što jon skazaŭ:
Mnie śpiašacca niama kudy, u mianie ŭ «chacie» niama aciapleńnia, tam takaja chaładzina i kormiać adzin raz u dzień».
«Ty siadziš za toje, što viedaješ Cichanoŭskaha»
Prakuror pačaŭ zapytvacca ŭ Niaronskaha pra mitynhi ŭ roznych haradach Biełarusi, dzie pravodzili vybarčyja pikiety, a taksama, dzie Cichanoŭski pravodziŭ pramyja efiry. Havorka idzie pra masavyja mierapryjemstvy ŭ Mazyry, Mahilovie, Minsku i navat Hrodnie 29 traŭnia.
«Toje, što ŭ dziaciej zabirajuć dom [situacyja ź dziciačym centram «Raduha» ŭ Mazyry], — heta niesankcyjanavanaje masavaje mierapryjemstva?»
Prakuror spytaŭ, arhanizoŭvaŭ Niaronski mitynh u Mahilovie:
«Nie, kaniešnie! Vy bačyli, što jany [supracoŭniki milicyi] tam zładzili? Nijakaha mitynhu tam nichto nie płanavaŭ! Tam spynili našu mašynu! Ja ž nie viedaŭ, što pryjduć ludzi i pačnuć aburacca. Usio było b narmalna, kali b milicyjanty nie pyrsnuli nam hazam».
Abvinavačvańni pa arhanizacyi mitynhu 29 traŭnia ŭ Hrodnie Uładzimir Niaronski emacyjna adreahavaŭ:
«Heta naohuł marazm! Ja tady siadzieŭ u IČU z 6 traŭnia. Što paśla hetaha było — ja nie viedaju! Da čaho dajšoŭ absurd, što mianie abvinavačvajuć u padziejach, dzie mianie nie było! Usie ŭ šoku!
Kali mianie zatrymali, ja spytaŭ u śledčaha, za što. Mnie prama skazali: «Ty siadziš za toje, što viedaješ Cichanoŭskaha». I ŭsio. Kazali: «Vy byli pobač ź im». Ni ŭ adnym roliku ja nie zaklikaŭ hramić, zabivać i inšaje».
Sudździa spytaŭ, ci viedaje jon inšych členaŭ kamandy: Aranoviča, Sakava:
«Navošta Aranovič apranaŭsia ŭ vopratku Cichanoŭskaha?»
Na heta Niaronski skazaŭ, što «jamu naohuł cikava, jak jon tam [za kratami] apynuŭsia».
Sudździa raspytvaŭ jaho, na jakija hrošy jon žyŭ, zapisvaŭ roliki na jutub-kanale, nabyŭ mašynu. Ale Niaronski skazaŭ, što ŭ jaho zapazyčanaści pa kredytam, a taksama pa alimientam.
«Kali b mnie davała apazicyja hrošy, to ja b daŭno zapłaciŭ kredyt».
Ja nie nios nijakich materyjalnych vydatkaŭ dla viadzieńnia svajho kanała. U Salihorskim aŭtacentry Reno mnie dazvolili vydać kredyt na mašynu, za jaki zapłaciŭ tolki 36 rubloŭ, vydaču aformiŭ Biełhazprambank».
«Ludzi karystalisia davieram Niaronskaha». Dopyt paciarpiełaha staršyni Słuckaha rajvykankama
Uładzimira Niaronskaha abvinavačvajuć u abrazach staršyni Słuckaha rajvykankama ŭ troch rolikach, stvoranych na praciahu troch dzion zapar u lutym 2020 hoda.
«U kancy 2019 hoda pačali źjaŭlacca hetyja roliki. Ja adrazu nie źviartaŭ uvahu, ale ŭsio bolš znajomych pačali aburacca. Ja pahladzieŭ i aburyŭsia, tamu vyrašyŭ pryniać miery.
Zychodziačy z hetych rolikaŭ vidać, što Uładzimir vieryŭ ludziam, jakija nibyta paciarpieli ad dziejańniaŭ uładaŭ. Jon braŭsia abaraniać ich, emacyjna vykazvacca z nahody mianie i naohuł dziejańniaŭ uładaŭ. U pieršym roliku jon dobra vykazvaŭsia pra mianie, a potym jaho mierkavańnie źmianiłasia, pa-mojmu, pad upłyvam.
My vymušanyja byli raźbiracca z hetym. Ale pry hetym usio było skažonaje. Ludzi karystalisia davieram Niaronskaha.
Kali vy budziecie hladzieć rolik, to ŭbačycie, što tam niezavualavanyja naŭprostavyja abrazy: śvińnia, zažraŭsia».
Jančeŭski raspavioŭ, što da jaho na pryjom prychodziła maci Uładzimira Niaronskaha i paprasiła nie pradjaŭlać pazoŭ da syna i nie patrabavać surovaha pakarańnia:
«Ja abiacaŭ heta joj».
Hramadzianskija pazovy da Uładzimira Niaronskaha staršynia Słuckaha rajvykankama nie pradjaŭlaŭ.
Na pytańnie abaroncy Niaronskaha, čamu Jančeŭski nie źviartaŭsia z zajavami na hierojaŭ rolikach, jon skazaŭ, što ŭ jaho niama žadańnia i času hetym zajmacca.
«Ja b na Niaronskaha nie padavaŭ zajavu, pakul heta ŭsio nie stała paŭtaracca ŭ dziasiatkach rolikach».
«Čałaviek usio pryznaŭ, paprasiŭ prabačeńnia, času stolki prajšło, stolki siadzić. U maim razumieńni, jon užo pavinien byŭ usio zrazumieć».
Na hetym dopyt paciarpiełaha skončyŭsia.
U pierapynku Uładzimir Niaronski ŭ razmovie z prysutnymi skazaŭ: «Čym bolš ludziej pasadziać — tym lepš». Sudździa skazaŭ žurnalistam paznačyć heta, kab usio było abjektyŭna.
«Brudnyja majtki ŭ jakaści dokazaŭ zabrali, ujaŭlajecie?» Ahałošvańnie materyjałaŭ spravy
Sud prystupaje da vyvučeńnia piśmovych materyjałaŭ spravy. Sudździa spytaŭ u Niaronskaha pra aŭtadom: što heta, kamu naležyć, chto za jaho płaciŭ. Uładzimir raspavioŭ, što jon uziaty Cichanoŭskim u arendu, ale Niaronski nie płaciŭ za heta.
U sudzie ahučvajucca dadzienyja prasłuški 5 traŭnia Uładzimira Niaronskaha ź siabram dziacinstva i žonkaj. U razmovie jon kaža, što «u Biełarusi adbyvajecca takoje, jakoha za 10 hadoŭ nie było», pra revalucyju, pra antyparad 9 traŭnia ŭ Babrujsku i h.d. Na sudzie Uładzimir kaža, što heta ŭsio havorycca ŭ žartoŭnaj formie, i, pa jaho słovach, u dakumientach paznačana, što jany tam śmiajucca. Pa telefonie žoncy 5 traŭnia Niaronski kaža, što za imi jechaŭ aŭtobus AMAPa, i kaža, što jaho zatrymajuć.
Taksama ŭ dakumientach pieraličvajucca vyniatyja ŭ Niaronskaha rečy.
«Vy ŭjaŭlajecie, mianie zakinuli na «Vaładarku» ŭ šortach, a rečy ź pieradač na administracyjnyja sutki ŭ mianie śledčy zabraŭ u jakaści rečyŭnych dokazaŭ. Brudnyja majtki ŭ jakaści dokazaŭ zabrali, ujaŭlajecie?»
U sudzie prakuror dasłoŭna ahučvaje źmiest rolikaŭ Niaronskaha. Usie manałohi błohiera ź jaho videa-rolikaŭ pieraviedzieny ŭ tekst i začytvajucca ŭ sudzie. Dziaržabvinavaŭca zadaŭ niekalki ŭdakładniajučych pytańniaŭ pa adnosinach Cichanoŭskaha da jaho i ŭdziełu ŭ rolikach.
«Ja roliki adrazu vydalaŭ, kali vyrašali prablemy. U mianie nie było idei stvaryć napružańnie ŭ hramadstvie. Ja ŭsio naadvarot zdymaŭ napružańnia z dapamohaj hetych rolikaŭ».
Sud praciahvajecca.
***
Uładzimir Niaronski byŭ zatrymany 6 maja 2020 hoda pad Minskam, kali jon z paplečnikami viartaŭsia z Mahilova, dzie napiaredadni jany ładzili sustreču z čytačami YouTube-kanału «Strana dla žiźni». Jaje mahiloŭskaja milicyja kvalifikavała jak «masavaje niesankcyjanavanaje mierapryjemstva», i 8 maja Kastryčnicki rajonny sud Mahilova pakaraŭ Niaronskaha pa art. 23.34 KaAP 10 sutkami administracyjnaha aryštu nibyta za jaho arhanizacyju. Paśla hetaha na volu jon nie vyjšaŭ. Kali i dzie prachodzili sudy nad im, u vyniku jakich atrymlivaŭ čarhovyja «sutki», — nieviadoma.
16 maja stała viadoma, što Niaronski ŭžo adbyvaje čarhovyja 5 sutak pa art. 23.34 KaAP u Marjinaj Horcy. Potym stała viadoma, što jaho pieraviali ŭ Słuck, dzie jon adbyvaŭ čarhovy administracyjny aryšt. 12 červienia pieravieźli ŭ Minsk, a 17 červienia stała viadoma, što Uładzimira Niaronskaha źmiaścili ŭ śledčy izalatar № 1 na vuł. Vaładarskaha ŭ Minsku ŭ miežach kryminalnaj «spravie Cichanoŭskaha». Na jaho zaviedzienaja kryminalnaja sprava pa dvuch artykułach Kryminalnaha kodeksa: č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak) i art. 369 (abraza pradstaŭnika ŭłady) — za abrazu ŭ jaho roliku na jutub-kanale staršyni Słuckaha rajvykankama.
18 žniŭnia stała viadoma, što Uładzimir Niaronski byŭ pieraviedzieny ŭ SIZA h. Žodzina.
Sud pryznačyli ŭ sudzie Łahojskaha rajona Minskaj vobłaści.
