Minčuka sudziać za niadzielny marš pa «kryminałcy». «Minsktrans» vystaviŭ pretenzii na 10 tysiač rubloŭ
U sudzie Pieršamajskaha rajona Minska razhladajuć spravu ŭ dačynieńni da minčanina, jaki ŭdzielničaŭ u maršy 1 listapada. Mužčynu abvinavačvajuć pa artykule 342 KK (Arhanizacyja i padrychtoŭka dziejańniaŭ, jakija hruba parušajuć hramadski paradak). Jamu taksama vystaŭleny hramadzianski pazoŭ ad «Minsktransa» na 10 tysiač rubloŭ, piša Tut.by.
Michaiłu Hłuchoŭskamu 48 hadoŭ, jon pracuje kiroŭcam na adnoj z vytvorčaściaŭ u Minsku. 1 listapada mužčyna vyjšaŭ na marš kala Parku Čaluskincaŭ, kab vykazać svoj pratest: spačatku išoŭ pa tratuary, potym razam ź inšymi pratestoŭcami vyjšaŭ na prajeznuju častku.
Tady ž Michaiła zatrymali pa artykule 342 KK RB, ale asudzili pa artykule 23.34 KaAP. Dali 20 bazavych. Krychu raniej Hłuchoŭski byŭ asudžany pa takim ža artykule i atrymaŭ 15 bazavych za ŭdzieł u Maršy.
Paśla druhoha zatrymańnia da Michaiła pryjšli ź pieratrusam pa abvinavačvańni ŭ č. 1 art. 342 KK RB (Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich).
4 studzienia ŭ sudzie Pieršamajskaha rajona sudździa Śviatłana Čarapovič pačała razhladać hetuju spravu.
Hłuchoŭski — na voli pad padpiskaj ab asabistaj parucy, da kryminalnaj adkaznaści raniej nie pryciahvaŭsia, abaroncy ŭ jaho niama.
Pa spravie paciarpiełym pryznany «Minsktrans», arhanizacyja vystaviła hramadzianski pazoŭ.
Pavodle abvinavačvańnia, 1 listapada na praśpiekcie Niezaležnaści kala doma № 95a—111 Hłuchoŭski hruba parušyŭ hramadski paradak, udzielničajučy ŭ niesankcyjanavanym mierapryjemstvie. Heta vyjaŭlałasia ŭ «publičnym vykrykvańni łozunhaŭ, ździajśnieńni hučnych vopleskaŭ rukami, masavym praciahłym upartym bieśpierapynnym parušeńni hramadskaha spakoju pry znachodžańni ŭ pieršych šerahach masavaha mierapryjemstva, błakavańni transpartnych kamunikacyj šlacham stvareńnia pieraškod u vyhladzie hrupavoha vychadu na prajeznuju častku».
Na dumku dziaržabvinavaŭcy Zubko, kala 30 maršrutaŭ hramadskaha transpartu byli zabłakavanyja ŭ rajonie ad parku Čaluskincaŭ, Zialonaha Łuha i da MKAD. Hetyja dziejańni nanieśli «Minsktransu» škodu — 10 689 rubloŭ 76 kapiejek. U intaresach transpartnikaŭ zajavu padavała i prakuratura, z takoj ža sumaj, jak u abvinavačvańni.
Mužčyna ličyć siabie vinavatym častkova. Zhodny tolki z tym, što ŭdzielničaŭ u Maršy, vychodziŭ na prajeznuju častku, ale nie zhodny z pamieram škody i tym likam maršrutaŭ, jakija nie pracavali nibyta z-za jaho.
— Kali vychodzili na prajeznuju častku, nie było ni ŭ adnym ni ŭ inšym kirunku hramadskaha transpartu. Sumniajusia, što [transpart byŭ] u takoj kolkaści i [škoda] ŭ takoj sumie. Śledstva spačatku nie vyłučała hetaj sumy. Śledčy skazaŭ, što «Minsktrans» naličyŭ škodu, jon rastłumačyŭ, što suma budzie [raźmiarkoŭvacca] na ŭsich zatrymanych u hety dzień, a ŭ vyniku atrymałasia, što ja adzin. Ja nie błakavaŭ, nia kidaŭsia pad koły hramadskaha transpartu. I dzie znachodzicca park Čaluskincaŭ, a dzie — kalcavaja daroha! — skazaŭ jon.
Pa słovach Hłuchoŭskaha, jon prabyŭ na prajeznaj častcy kala Parku Čaluskincaŭ piać chvilin.
Mužčyna raspavioŭ: kali ŭbačyŭ siłavikoŭ, jakija pačali ŭžyvać śpiecsrodki, byŭ u šoku.
— Nie moh ujavić, što takoje adbyvajecca ŭ maim rodnym horadzie, — skazaŭ Hłuchoŭski.
Kali Hłuchoŭski pajšoŭ nazad u bok Uručča, jaho zatrymali ŭ rajonie doma pa praśpiekcie Niezaležnaści, 111.
U telefonie Hłuchoŭskaha znajšli pierapiski ź ludźmi, jakim jon raspaviadaŭ pra niesankcyjanavanyja masavyja mierapryjemstvy, u halerei malunkaŭ «zdymkaŭ apazicyjnaha charaktaru nie vyjaŭlena». Telefon kanfiskavali jak rečavy dokaz.
U materyjałach spravy jość pratakoły dopytaŭ śviedak-amapaŭcaŭ: Nazarava, Chadarčuka, Šeŭčyka, Śvirydava, Alaksiejeva. Sudździa patłumačyła, što heta vydumanyja proźviščy, bo jość pastanova ab užyvańni mier pa zabieśpiačeńni ich biaśpieki i nierazhałošvańni źviestak ab asobach. Na pieršym sudovym pasiadžeńni śviedki nie vystupali.
U sudzie taksama pahladzieli niekalki videazapisaŭ, dzie bačnyja śpiny siłavikoŭ, natoŭp ludziej, čutnyja vopleski, ludzi kryčać: «Trybunał!», «My — adzin narod!», «Sychodź!». Hłuchoŭski paznaŭ siabie na videa.
Mužčyna prasiŭ uličyć, što jahonyja sastarełyja baćki žyvuć ź im, jon ich hladzić. Baćku Hłuchoŭskaha 74 hady, jon invalid 2-j hrupy, maci — 72 hady, jana taksama chvoraja, samastojna nie moža spuskacca.
U sudzie abviaścili pierapynak, razhlad praciahniecca 14 studzienia.
Nahadajem, 1 listapada ŭ Minsku prajšoŭ čarhovy niadzielny marš, paśla jakoha byli zatrymanyja sotni ludziej. Raspačataja kryminalnaja sprava pa fakcie arhanizacyi dziejańniaŭ, jakija hruba parušajuć hramadski paradak, i aktyŭnaha ŭdziełu ŭ ich. 231 čałaviek pryznany padazravanym pa č. 1 art. 342 Kryminalnaha kodeksa. Sankcyja artykuła praduhledžvaje pakarańnie ad štrafu da troch hadoŭ pazbaŭleńnia voli.
