Moda biełaruskaj revalucyi: jak dyzajniery natchnialisia pratestami
Moda zaŭsiody reahuje na padziei ŭ hramadstvie. «Naša Nina» pahladzieła, jak biełaruskija dyzajniery pieradavali letaś duch času ŭ adzieńni i aksiesuarach. Adnych natchniali biasstrašnyja žančyny, inšych — Minsk, jaki znoŭ staŭ horadam-hierojem.
«Ecika»
Prajekt «Ecika» — pra ŭśviadomlenaje spažyvańnie. Dyzajnierki pierapracoŭvajuć rečy, kuplenyja ŭ sekand-chendzie ci znojdzienyja ŭ šafie svajakoŭ. Vodhukam na pratesty stała siurrealistyčnaja vyšyŭka «žanočaja armija» — čyrvonyja kontury tvaraŭ na biełaj tkaninie.
«Jana pra honar i zachapleńnie biełaruskimi dziaŭčatami i žančynami. Heta praca pra mirnuju i biazzbrojnuju žanočuju armiju, jakaja aśmieliłasia vyjści, niahledziačy na ŭsie aryšty, źbivańni i pahrozy», — raspaviadali dyzajnierki pra vyšyŭku.
Adna ź ich — Volha Matusievič — sama trapiła pad katok represij. U śniežni jana była zatrymana na maršy i adsiedzieła 20 sutak.
Volha Kardaš
Paśla šmathałosaha «Sychodź» na MZKC i šyrokaj kałony rabotnikaŭ MTZ na praśpiekcie ŭsie havaryli pra zavadčan. Zdavałasia, što zabastoŭka moža stać realnaj. U znak salidarnaści z rabotnikami Volha Kardaš vypuściła cełuju sieryju cišotak z łahatypami zavodaŭ — MAZ, BiełAZ, Naftan. Usie jany imhnienna byli raspradadzieny. Pałovu ad sabranaj sumy pieradali ŭ fond, kab patrymać tych, chto bastuje.
A Volha vymušana była źjechać ź Biełarusi. Paśla kalekcyi z zavodami joj stali pastupać paviedamleńni pra toje, što pad jaje kapajuć, i dyzajnierka vyrašyła nie vypraboŭvać los.
Ivan Ajpłataŭ
Ivan Ajpłataŭ taksama prapanavaŭ cišotki z pryntami. «Biełaruś ciapier adzinaja krynica inśpiracyi», — pisaŭ dyzajnier. Vosieńniu źjavilisia słohany «Supermensk», «Miru mir», «Run BLR» (na apošni natchniŭ Siarhiej Mironaŭ, jaki zaklikaŭ haniać va ŭsiu moc).
LSTR
Brend, jakija chutčej za ŭsich reahuje na miemy i simvały. Heta jany zabiaśpiečyli horad cišotkami z «Jevaj» Chaima Sucina, nadpisami «Ščučynščyna» i «Chłopotnoje dielcie».
Kanva
Aktualnyja pasłańni zachavalisia i ŭ aksiesuarach. Naprykład, u chustkach. Takija pašyŭ brend Kanva, jaki spałučaje folk i vuličnuju modu. «Mam, ja ŭ paradku, pakul pošču storyz», — napisana pa-anhielsku na adnoj ź ich i pobač znak «viktary». Chustki, darečy, chit hetaj zimy.
Ksienija Ramanava
Kapsułu «Pieramien» prydumała Ksienija Ramanava. Jana sabrała hałoŭnyja łozunhi hetaj vosieni: «Ja hulaju», «Sabačku». Na adnym sa śvitšotaŭ trapnaja cytata z «Čypalina»: «U našych turmach siadziać sumlennyja ludzi».
Dyzajnierka vypuściła taksama stylovy čorny daždžavik z «zahruzkaj demakratyi».
Ksienija — siarod tych, chto siadzieŭ pa narodnym artykule 23.34. Na Akreścina i ŭ Baranavičach ahułam jana praviała 20 sutak. Pra jaje aryšt možna pačytać voś tut.
10motifs
Brend 10motifs prapanavaŭ sahravacca ŭ ciopłych švedrach ručnoj pracy — z vyšytym čyrvonym sercajkam. U ich možna ŭspaminać pra nievierahodnuju salidarnaść biełarusaŭ.
«Kali toje, što ŭnutry, — ciapier zvonku», — tak apisała zadumu dyzajnierka brenda Alaksandra Žuk.
Sutoria
Abyhrać pratestavy nastroj u abutku składaniej. Ale studyja «Sutoryja» znajšła varyjant — čaraviki ź bieł-čyrvona-biełymi tasiomkami. Kab niezaŭvažna sihnalizavać svaim u horadzie.
«Dumaju, spałučeńnie bieł-čyrvona-biełaha budzie trendam hetaha hoda. Ja jak dyzajnier nie mahu nie adreahavać», — dzialiłasia stvaralnica Maryna Šalima.
