ŚMI: Tramp šlacham zapałochvańnia patrabavaŭ ad uładaŭ štata Džordžyja pieraliku hałasoŭ
Dziejny prezident ZŠA Donald Tramp u telefonnaj razmovie patrabavaŭ ad sakratara Džordžyi Breda Rafienśpierhiera «znajści» dastatkovuju kolkaść addadzienych u jaho padtrymku na vybarach hałasoŭ, kab paćvierdzić jaho pieramohu ŭ štacie. Pra heta paviedamiła ŭ niadzielu hazieta The Washington Post, jakaja zajmieła aŭdyjozapis razmovy amierykanskaha lidara z pradstaŭnikami ŭładaŭ Džordžyi.
Pavodle hetaha zapisu, frahmienty jakoha byli źmieščanyja na sajcie vydańnia, Tramp faktyčna zapałochvaŭ sakratara štata i jaho jurydyčnaha daradcu Rajana Džermani, namiakajučy na mahčymuju kryminalnuju adkaznaść. «Usio, što ja chaču zrabić, heta nastupnaje: ja prosta chaču znajści 11 780 hałasoŭ <…>, pakolki my vyjhrali ŭ hetym štacie», — zajaviŭ Tramp. Pry hetym prezident namiaknuŭ, što kali Rafienśpierhier i Džermani nie znojduć biuleteni, jakija nibyta byli addadzienyja ŭ jaho padtrymku, a zatym źniščanyja, to abodva jany mohuć faktyčna ličycca saŭdzielnikami złačynstva. «Vy viedajecie, što jany zrabili, i vy heta nie raskryvajecie. Heta kryminalnaje złačynstva, heta kryminalnaje złačynstva. I vy nie možacie dapuścić hetaha. Heta vialiki ryzyka dla vas i dla vašaha jurysta Rajana», — skazaŭ prezident ZŠA.
Jon taksama faktyčna zaklikaŭ da partyjnaj dyscypliny, nahadvajučy ab tym, što Rafienśpierhier sam źjaŭlajecca respublikancam. Tramp śćviardžaŭ, što sakratar štata svajoj biaździejnaściu padryvaje šancy na pieramohu svaich adnapartyjcaŭ-sienataraŭ — respublikancaŭ Devida Pierdju i Keli Lefler, jakija 5 studzienia buduć udzielničać u druhim tury vybaraŭ u Sienat Kanhresa ZŠA ŭ Džordžyi.
Pavodle haziety, Rafienśpierhier i Džermani ŭ svaju čarhu nastojvali na tym, što vyniki prezidenckich vybaraŭ u Džordžyi adpaviadali rečaisnaści, a parušeńniaŭ, ab jakich kaža Tramp, zafiksavana nie było.
Ad zychodu hałasavańnia ŭ Džordžyi zaležać suadnosiny sił u vierchniaj pałacie Kanhresa ZŠA. Respublikanskaja partyja pa vynikach praviedzienych 3 listapada ŭ krainie ŭsieahulnych vybaraŭ daviała svajo pradstaŭnictva ŭ Sienacie (100 miescaŭ u cełym) da 50 miescaŭ suprać 48 u demakrataŭ. Ale z abrańniem Kamały Charys vice-prezidentam Złučanych Štataŭ u demakrataŭ źjaŭlajecca pieravaha. Zhodna z amierykanskim zakanadaŭstvam, vice-prezident uznačalvaje Sienat i moža hałasavać, kali pry razhladzie taho ci inšaha pytańnia pazicyi zakanadaŭcaŭ padzielacca paroŭnu. Takim čynam, ciapier pytańnie kantrolu nad Sienatam budzie kančatkova vyrašacca padčas druhoha tura vybaraŭ u Džordžyi, dzie na konie stajać adrazu dva mandaty.
