151 mara: biełarusy z usiaho śvietu sabrali navahodnija padarunki dla dziaciej aktyvistaŭ niezaležnych prafsajuzaŭ
Ofisnaje kresła, baksiorskaja hruša, kvitki na tancpoł i siertyfikaty na boty i vopratku… Našy suajčyńniki z roznych krain z dapamohaj prafsajuzaŭ Brytanii i Irłandyi sabrali padarunki dla dziaciej aktyvistaŭ biełaruskich niezaležnych prafsajuzaŭ. Techničny bok spravy ŭziali na siabie biełarusy Maskvy.
U pačatku śniežnia ŭ vałancioraŭ, jakija dapamahajuć prafsajuzam, saśpieła ideja: dobra było b pavinšavać dzietak zavadčan ź niezaležnych prafsajuzaŭ.
Tak, niezaležnyja prafsajuzy — heta nie pra padarunki da Novaha hoda. I nie pra kvitki na navahodniuju jalinku. Niezaležnyja prafsajuzy zajmajucca surjoznymi rečami — abaronaj pravoŭ, ŭmovami pracy, zarobkam… Ale ŭsio roŭna chočacca śviata. A što, kali ŭsioj hetaj mišuroj (padarunkami) zojmucca nie sami členy niezaležnych prafsajuzaŭ, a ich vydatnyja pamočniki?
I pajechała…
«Šukali padtrymki ŭ mižnarodnych prafsajuzaŭ. Prosta pytalisia ŭ čatach, chto ź mižnarodnych prafsajuzaŭ moža ŭklučycca i dapamahčy», — raskazvajuć vałanciory inicyjatyvy «Prafsajuz anłajn», jakaja dapamahaje ludziam ustupić u adzin z čatyroch aficyjna niezaležnych prafsajuzaŭ i abjadnać ludziej na pracoŭnych miescach.
Adhuknułasia dyjaspara Maskvy i Piciera. Aktyvisty pradumvali, jak dastavić padarunki ŭ Biełaruś, a taksama źbirali źviestki pra dziaciej, baćki jakich pazbavilisia pracy, trapili ŭ SIZA, atrymali štrafy za ŭdzieł u mitynhach.
Byŭ sfarmavany śpis dziaciej ad niezaležnych prafsajuzaŭ 7 bujnych zavodaŭ: Minski traktarny zavod, Minski aŭtamabilny zavod, Minski matorny zavod, Minski elektratechničny zavod, BiełAZ, «Biełkamunmaš» i «Pielenh».
«Chaciełasia znajści padarunki dla dziaciej usich 13 000 členaŭ niezaležnych prafsajuzaŭ». Ale padklučyć prafsajuzy inšych krain usiaho za paru tydniaŭ akazałasia składana.
Zatoje padklučyłasia kanadskaja, francuzskaja, niamieckaja, bielhijskaja, italjanskaja, ispanskaja, niderłandskaja, finskaja, dackaja, luksiemburhskaja, litoŭskaja, izrailskaja, češskaja i słavackaja dyjaspary.
Nabyvali nie standartnyja nabory abo adnolkavyja dla ŭsich padarunki. Kožnaje dzicia napisała, pra što maryć.
Kožny «čaraŭnik», jaki vykazaŭ žadańnie ŭdzielničać u akcyi, braŭ sabie adnaho padapiečnaha, jakomu rychtavaŭ padarunak.
Alena — biełaruska ź Vialikabrytanii, pierakładčyk-sinchranist: «Chaciełasia zrabić dzieciam śviata. Maim plamieńnikam u svoj čas daviałosia śviatkavać Novy hod biez taty, jaki musiŭ jaho pravieści ŭ «amierykancy».
Dzieci jość dzieci. Ich baćki chočuć tolki taho, kab va ŭsich dziaciej Biełarusi była lepšaja budučynia, niekatoryja praz heta achviaravali svajoj pracaj i zdaroŭjem.
Nie pavinna być tak, što dzicia adčuvaje siabie pazbaŭlenym śviata, bo mama ci tata vyjšli suprać niespraviadlivaści. Kab i hetyja dzieci, i ich baćki adčuli, što jany nie samotnyja, što za ich śmiełaść i pryncypovaść mnostva ludziej im hłyboka ŭdziačnyja».
Siarod zamoŭlenych padarunkaŭ byli niemaleńkija, naprykład, rovar. Byli i vielmi ścipłyja žadańni: na mierkavańnie darylščyka abo cukierki. Alena ŭziała sabie padapiečnaha z paznakaj «ničoha nie treba, moža, kamuści bolš patrebna», i vysłała padarunak ź listom ab tym, što padarunak možna padaryć i siabru.
Vielizarnuju pracu zrabili dźvie Iryny z maskoŭskaj dyjaspary. Kožnaja chvilina paśla pracy, nočy — usio było zaniata padarunkami.
Kvatera pieršaj Iryny za apošnija tydni pieratvaryłasia ŭ skład. Usio miesca na padłozie było pazastaŭlana!
Iryna — biełaruska ŭ Maskvie. Atrymlivała padarunki dla dzietak z usiaho śvietu. Niejkija prychodzili da jaje na dom, niejkija — u punkty vydačy. «My praviarali, ci adpaviadajuć padarunki čakańniam. Tamu što zakaz praź internet — jak kot u miašku. Paru razoŭ dazakazvali».
Razam ź inšymi aktyvistami Iryna pakavała padarunki i raskładvała pa skrynkach zavodaŭ.
Jašče adna Iryna — minčanka, zaraz žyvie ŭ Maskvie, pracuje sistemnym analitykam u IT-śfiery. Dva tydni Iryna spała pa dźvie hadziny na sutki: darylščyki ź inšych hadzinnych pajasoŭ časta pisali nočču. Šviecyja, ZŠA, Brytanija, Italija, Izrail, Litva.
Kala 70-80 padarunkaŭ Iryna pryniała doma i zapakavała.
Z kvater dvuch čaroŭnych Iryn padarunki adpravilisia ŭ Minsk.
Dźmitryj — samy pieršy arhanizatar usiaho čaradziejstva z boku Maskvy, biełarus. Damaŭlaŭsia z transpartnaj kampanijaj ab dastaŭcy padarunkaŭ u Minsk. «Kampanija biełaruskaja. Jak tolki supracoŭniki daviedalisia, što my pieravozim, adrazu zrabili nam dobruju źnižku». Dźmitryj dałučyŭsia da inicyjatyvy, bo jamu nieabyjakavyja ludzi, jakija vykazvajuć svoj punkt hledžańnia i damahajucca svajho: «Chtości ŭstupaje ŭ niezaležny prafsajuz, niechta ŭ stačku, chtości na mitynhi vychodzić. Chaciełasia pakazać, što hetyja ludzi nie adny».
I voś razam z zavadskimi prafsajuznymi Dziadami Marazami padarunki prybyli da dziaciej.
Dzied Maroz z MTZ.
Dzied Maroz z MMZ.
«Vialiki dziakuj za padarunki ad usioj siamji i ad usioj dušy!». Ciapier słovy padziaki syplucca ŭ čaty darylščykaŭ. Dziakuj, siabry, za vašu dabryniu!
Mary biełaruskich dziaciej
(Zachavajcie sabie: pra što marać dzieci jakoha vieku).
- 18 hadoŭ — smart-hadzińnik.
- 15-16 hadoŭ — knihi Natalli Ščerby; baksiorskaja hruša; štatyŭ z kalcavoj lampaj; hlina Claycraft by deco; paŭer-bank abo kniha Tołkina «Padzieńnie Handalina».
- 14 hadoŭ — biespravadnyja navušniki; kvitki na kancert; bluetooth navušniki ź mikrafonam.
- 12-13 hadoŭ — školny partfiel; skiejtbord/samakat; zimovyja čaraviki; robat-ruka; chudzi; smart-hadzińnik, biespravadnyja navušniki; prynaležnaści dla malavańnia skietčaŭ; nastolnyja hulni ( «Jak stać miljanieram», «Marski boj» ci «Varjacki łabirynt»
- 10-11 hadoŭ — leha, nastolnyja hulni (naprykład, «Mafija»); 3D-asadka, smart-hadzińnik; partatyŭnaja kałonka; kvitki ŭ akvapark/delfinaryj; nabor dla lepki Genio kids; dziciačyja krejdy dla vałasoŭ.
- 8-9 hadoŭ — mašynka na radyjokiravańni; nabor fłamasteraŭ dla skietčynhu; lalka LOL OMG Swag, lalka z domikam; robat na radyjokiravańni; biespravadnyja navušniki; vialikija stereanavušniki; dziciačaje ofisnaje kresła; dziciačaja kaśmietyka.
- 7 hadoŭ — viertalot na pulcie, leha, roliki; smart-hadzińnik; nastolnyja hulni; nabor fłamasteraŭ.
- 5-6 hadoŭ — kilimok-pazł, leha (MINECRAFT); mahnitny kanstruktar; nabor dla malavańnia ŭ kiejsie; mašynki «Dzikija Skryčary», lalka SryBabies; 3D-ručka; hulniavy nabor «Supiermarkiet» ci «Kuchnia»; nastolnaja hulnia «Dženha»
- 3-4 hady — mašynka na radyjokiravańni, viertalot; płanšet dla malavańnia; čyhunka ź ciahnikom; aŭtaparkinh z mašynkami; katar na radyjokiravańni.
- 2 hady — stoł dla leha Duplo; muzyčnaja miakkaja cacka; mikraskop;
- 1 hod — suchi basiejn; muzyčnaja raźvićciovaja cacka, Biehavieł abo trochkołavy rovar (nie kalaska), kab dzicia samo vučyłasia jeździć; bizibord.
