Biskup Aleh Butkievič: Kaścioł zaŭsiody baronić hodnaść čałavieka, a vykazvańni śviataroŭ — abaviazak źviartać uvahu
Pra heta biskup Viciebskaj dyjacezii Aleh Butkievič raspavioŭ u intervju Radyjo Racyja.
Ciapier, kali mnohija narakajuć na ciažkija časy, na niespryjalnuju situacyju ŭ hramadstvie, ksiondz-biskup Aleh Butkievič raić nie paddavacca skrusie.
«Narakańni na čas — heta prykmieta kožnaj epochi, bo niama idealnaj pary ci idealnaha času. Ale zaŭsiody jość nahoda, kab znajści štości dobraje. Kali kazać pra śviatočnuju radaść, to heta taksama peŭny vysiłak čałavieka, kab zaŭvažyć sutnaść taho, što ciapier pieražyvajem, kab u sabie adkryć prysutnaść nie tolki ciažkaściaŭ i biedaŭ, ale i taho dabra, jakoje prynosić i daje čałavieku Boh. I dla viernika zaŭsiodnaj krynicaj radaści źjaŭlajecca viera. Jana daje razumieńnie, što nie tolki chleb nadzionny źjaŭlajecca metaj žyćcia, ale i mety duchoŭnyja», — miarkuje ijerarch.
Sychodziačy hod adznačyŭsia vysokaj hramadzianskaj aktyŭnaściu paśla minułych prezidenckich vybaraŭ, šmat ludziej pakarali štrafami, aryštami i navat turemnymi źniavoleńniami. Siarod ich — ksiondz z Rasonaŭ Viačasłaŭ Barok, jaki niadaŭna adbyŭ 10-sutkavy aryšt za nibyta prapahandu nacysckaj simvoliki ŭ sacyjalnych sietkach. Pa artykule 23.34 byli zatrymanyja viciebskija śviatary — ksiondz Viktar i hreka-katalicki śviatar ajciec Alaksiej…
Padčas abmierkavańniaŭ takich navinaŭ u ludziej časam paŭstajuć pytańni, ci moža śviatar vykazvać svaju hramadzianskuju pazicyju, ci jahonaja zadača vyklučna pracavać u chramie, z pastvaj.
«Toje, što śviatar pavinien pracavać u chramie, pavinien pracavać z pastvaj — heta biassprečna. Ź inšaha boku, śviatar zastajecca hramadzianinam svajoj krainy, — miarkuje Aleh Butkievič. — I jon niaźmienna zastajecca pradstaŭnikom Kaścioła, a Kaścioł zaŭsiody baronić hodnaść čałavieka, baronić jahonaje žyćcio. Robić heta ŭ šyrejšym, hłabalnym sensie.
I vykazvańni śviataroŭ na hetuju temu — heta ich abaviazak źviartać uvahu na niedaskanałaści ŭ našym hramadstvie.
Biezumoŭna, treba zvažać na toje, što Kaścioł — heta nie palityčnaja partyja, jon nie moža vystupać jak palityčnaja siła. Ale jon zaŭsiody na abaronie pravoŭ čałavieka, jahonaj hodnaści i jahonaha žyćcia».
