«My bačym aktyvizacyju represij ŭ dačynieńni da Kaścioła»: biskup Juryj Kasabucki prakamientavaŭ prysudy śviataram
Biskup Minska-Mahiloŭskaj archidyjacezii Juryj Kasabucki padtrymaŭ śviataroŭ, asudžanych na sutki administracyjnaha aryštu. Pra heta jon napisaŭ u svaim fejsbuku.
«My bačym aktyvizacyju represij u dačynieńni da Katalickaha Kaścioła ŭ našaj krainie.
My adkryta vystupajem suprać kožnaha hrachu, suprać nasilla i hvałtu, suprać chłuśni i falšu, suprać represij, suprać cisku i zapałochvańnia, suprać prynižeńnia čałaviečaj hodnaści, bo kožny čałaviek stvorany pa vobrazu i padabienstvu Božamu. My asablivym čynam molimsia ab supakoi, zhodzie, salidarnaści i adzinstvie biełaruskaha naroda.
Adnak usio heta chtości ličyć prajavaj ekstremizmu, raspalvańniem varožaści i h. d.!» — napisaŭ jon.
Juryj Kasabucki čarhovy raz zaklikaŭ da ŭzmacnieńnia malitvy za Baćkaŭščynu, biełaruski narod, za ludziej, jakija znachodziacca za kratami pa palityčnych matyvach, za tych, kaho zvalniajuć z pracy za ich pohlady, za tych, kaho zapałochvajuć i šantažujuć, za ŭsich cierpiačych i za tych, kamu asabliva patrebna naša malitoŭnaja padtrymka.
«Prašu pa miery mahčymaści ŭ kožnym kaściole, kožnaj kaplicy publična malicca za ksiandza Viačasłava Barka i ajca Vitala Bystrova i tłumačyć ludziam pra sapraŭdnyja pryčyny trymańnia hetych śviataroŭ u viaźnicach (represii, cisk, zapałochvańnie, pieraśled Kaścioła za praŭdu i h. d.)», — napisaŭ katalicki ijerarch.
Nahadajem, što a. Viačasłaŭ Barok (probašč kaścioła ŭ Rasonach) i a. Vital Bystroŭ (hreka-katalicki śviatar ź Ivacevičaŭ) atrymali pa 10 sutak aryštu. V. Barok źmiaściŭ u svaim fejsbuku płakat Uładzimira Ceślera, jaki sud paličyŭ prapahandaj nacysckaj simvoliki, a Vital Bystroŭ byŭ asudžany za «ŭdzieł u niesancyjanavanym mierapryjemstvie».
