Ekśpiert sprahnazavaŭ, ź jakim kursam dalara biełarusy sustrenuć Novy hod
Fota Nadziei Bužan
U listapadzie dalar u adnosinach da biełaruskaj nacyjanalnaj valuty źlohku asieŭ — na 1,82%. Jeŭra i rasijski rubiel raśli, tamu padaražeŭ i valutny košyk u cełym — na 0,62%. Finance.tut.by cpytaŭ u ekśpierta, što budzie adbyvacca na našym valutnym rynku ŭ śniežni i ź jakimi kursami my možam pryjści da kanca hoda.
Staršy analityk «Alpary Jeŭrazija» Vadzim Josub adznačaje, što ŭ listapadzie na biełaruski rubiel aktyŭna ŭpłyvała toje, što adbyvajecca na źniešnich valutnych rynkach. Adzin z asnoŭnych faktaraŭ — rost jeŭra da dalara i jašče bolšaje ŭmacavańnie rasijskaha rubla da hetych valut.
— Tak, za miesiac — z 1 listapada da 1 śniežnia, valutnaja para EUR/USD vyrasła z 1,1680 da 1,1980 — heta plus 2,5%. Rasijski rubiel umacavaŭsia da abiedźviuch zamiežnych valut. Dalar u Rasii za hety čas patańnieŭ z 79,2 da 76,1 rubla, abo na 3,8%, jeŭra ŭpaŭ z 92,5 da 91,2 rubla, to-bok na 1,4%, — raspaviadaje analityk. — U vyniku za listapad dalar da biełaruskaha rubla patańnieŭ, a jeŭra i rasijskaja valuty vyraśli. Dalar źniziŭsia z 2,6352 da 2,5873 biełaruskaha rubla, abo na 1,82%. Jeŭra vyras z 3,0778 da 3,0987, to-bok dadaŭ 0,68%. Rasijski rubiel padaražeŭ z 3,3290 da 3,3982 biełaruskich rubloŭ za 100 rasijskich, plus 2,08%.
Adnak, jak kaža Vadzim Josub, niahledziačy na padzieńnie dalara, naša nacyjanalnaja valuta za miesiac u cełym «schudnieła». Valutny košyk za listapad vyras na 0,62%.
— U śniežni dalar moža praciahnuć svajo źnižeńnie na suśvietnych rynkach u čakańni novaj prahramy dapamohi ekanomiki. Pry hetym rost naftavych koštaŭ moža spryjać dalejšamu ŭmacavańniu rasijskaj valuty, — kaža ekśpiert.
— U hetym vypadku da kanca hoda dalar moža źnizicca da 2,54 biełaruskaha rubla, jeŭra moža vyraści da 3,12 biełaruskaha rubla, a rasijskaja valuta padaražeje da 3,47 biełaruskaha za 100 rasijskich.
