Niekalki piensijanieraŭ atrymali pa 15 sutak, astatnich sahnali ŭ adździaleńnie milicyi i razdali štrafy. Pakarali navat 75-hadovuju babulu
Marš mudraści 30 listapada staŭ pieršym šeściem pažyłych ludziej, jakoje skončyłasia masavymi zatrymańniami. Raniej kropkava chapali maładziejšych udzielnikaŭ i žurnalistaŭ, ciapier — samich piensijanieraŭ.
Adna z hrup piensijanieraŭ u ačapleńni paśla taho, jak kałonu raśsiekli
Kala 10 čałaviek zabrali ŭ milicyju, častku ź ich uviečary adpuścili z pratakołami, ich buduć sudzić paźniej, niekatorych adpravili na Akreścina.
Sudździa Siarhiej Kacar razhladaŭ spravu 58-hadovaj Rymy Siarohinaj. Vierdykt — 15 sutak.
57-hadovuju Marynu Suślinu sudziła Lidzija Cialica. Žančyna patłumačyła, što nie ŭdzielničała ni ŭ jakoj demanstracyi. Išła pa advarotnym baku vulicy, a potym stajała na prypynku, dzie jaje i zatrymali. Vynik — tyja ž 15 sutak.
Na Akreścina ŭ čakańni suda znachodzicca 58-hadovaja Ludmiła Dabravolskaja — siastra palityka Alaksandra Dabravolskaha. Jaje taksama zatrymali na Maršy mudraści ŭ paniadziełak.
Inšuju hrupu piensijanieraŭ zacisnuli na vulicy Vaładarskaha. Babulam i dziadulam dazvalali vyjści z ačapleńnia tolki pry ŭmovie, što jany skažuć na videakamieru svaje imia i adras pražyvańnia.
Da mnohich ź ich u aŭtorak pryjšli milicyjaniery i ŭručyli paviestki na sieradu ŭ milicyju. Ad ranicy piensijanieraŭ sabrali ŭ aktavaj zale Maskoŭskaha RUUSa, skłali pratakoły i adrazu ž asudzili praź internet u Maskoŭskim sudzie.
Vałanciory, jakija dziažuryli ŭ sudach, tolki i paśpiavali paviedamlać vyniki pasiadžańniaŭ:
75-hadovaja Ł. Lepichava — štraf 15 bazavych,
66-hadovaja A. Dźmitryjeva — štraf 30 bazavych,
59-hadovaja H. Hołdbierh — štraf 30 bazavych,
57-hadovaja Žanna Hurbanovič — štraf 30 bazavych,
V. Vasileŭski — štraf 30 bazavych.
