Kolki hrošaj vydatkavali na kancert paśla praŭładnaha aŭtaprabiehu z udziełam Ejsmant i Baskava
Adzin z samych maštabnych praŭładnych aŭtaprabiehaŭ zładzili pad Minskam 8 listapada, piša Tut.by. Paśla taho jak kałona prajechała pa MKAD, u Lipkach dla ŭdzielnikaŭ arhanizavali biaspłatnuju sałdackuju kašu z palavoj kuchni, šašłyk i inšuju ježu pa całkam dastupnych cenach, a taksama arhanizavali kancert z Saładucham, Žaniet, Łanskoj i inšymi vykanaŭcami.
Na sajcie dziaržzakupak źjaviłasia infarmacyja ab tym, kolki hrošaj vydatkavali na arhanizacyju kancerta. Krynica finansavańnia — biudžetnyja srodki. Miarkujučy pa hetych źviestkach, adzin z samych vialikich hanararaŭ byŭ zapłanavany hrupie Aura i jaje kamandzie, salistka jakoj — Julija Bykava, davieranaja asoba Alaksandra Łukašenki na vybarach. Dla paraŭnańnia: dla Alaksandra Saładuchi suma ŭ dva razy mienšaja, a dla Aleny Łanskoj — u čatyry.
Chto vystupiŭ na kancercie i jakija praduhledžany hanarary dla artystaŭ
Pry hetym stała viadoma, jakaja suma była praduhledžanaja na arhanizacyju i praviadzieńnie kancerta ŭ Lipkach 8 listapada dla ŭdzielnikaŭ aŭtaprabiehu. Nahadajem, na aŭtaprabieh źjechałasia kala 1000 mašyn. Siarod jaho ŭdzielnikaŭ byli ŭ tym liku pres-sakratarka Łukašenki Natalla Ejsmant, staršynia Fiederacyi chakieja Biełarusi Dźmitryj Baskaŭ, hałoŭny trenier nacyjanalnaj zbornaj Biełarusi pa chakiei Michaił Zacharaŭ.
Fota Maryny Sierabrakovaj, Tut.by
Pavodle źviestak na sajcie dziaržzakupak, na praviadzieńnie patryjatyčnaj akcyi «Aŭtaprabieh «Za adzinuju Biełaruś» była zapłanavanaja suma ŭ 21 895 rubloŭ. Krynica finansavańnia — biudžetnyja srodki. Zakazčyk/arhanizatar — «Minskkancert».
Vykanaŭcam Alonie Łanskoj, Žanet, Viktoryi Aleška, baletu Fusion, baleta Next była zakładziena suma pa 1000 rubloŭ, art-hrupie «Biełarusy», šoŭ-teatru «Alur» — pa 1500 rubloŭ, Alaksandru Saładuchu — 2000 rubloŭ, a hrupie Aura, tancoram, muzykam — 4000 rubloŭ.
Raniej Mazyrski rajonny Mižhalinovy centr raźmiaščaŭ zajaŭku na dziaržzakupku na vystup 19 vieraśnia hrupy Aura na takuju ž sumu — 4000 rubloŭ, krynica finansavańnia — biudžetnyja srodki. U hety dzień u Mazyry śviatkavali 865-hodździe horada.
Na pracu hałoŭnaha režysiora na kancercie paśla aŭtaprabiehu była zakładziena suma ŭ 2000 rubloŭ, pamočnika režysiora — 1000 rubloŭ, chareohrafa — 500 rubloŭ, asistentaŭ režysiora — 700 rubloŭ.
Na pasłuhi pa pieravozcy hruzavym transpartam da 3,5 ton vydatkavali 495 rubloŭ, na videakantent, demanstracyju — 2700 rubloŭ.
Damovy pa vynikach praviadzieńnia pracedury zakupki z adnoj krynicy, miarkujučy pa infarmacyi na sajcie dziaržzakupak, zaklučyli ź IP Saładucha Alaksandr Antonavič, IP Faminych Iryna Stanisłavaŭna, IP Aleška Viktoryja Robiertaŭna, IP Saroka P. H., IP Šmat Valeryj Siarhiejevič, IP Alejnik Jaŭhien Fiodaravič (pradziusar hrupy Aura), IP Radzivonava Ludmiła Michajłaŭna (vystup šoŭ-teatr «Alur»), IP Fambaraŭ Je. H., IP Puntus M. P. (transpartnyja pasłuhi), IP Fiedarenka Alaksiej Siarhiejevič. Niekalki damovaŭ zaklučyli ź IP Arciukoŭski D. A. (pasłuhi — hałoŭny režysior; asistenty režysiora; videakantent, demanstracyja), IP Kašavy Dzianis Alehavič. Źviestki z adkrytaj krynicy — sajt dziaržzakupak.
Ci kampiensavali ŭdzielnikam aŭtaprabiehu vydatki na paliva i, kali tak, u jakim pamiery, ci apłačvajuć im «kamandzirovačnyja», ci vydajuć čyrvona-zialonyja ściahi abo jany kuplajuć ich za ŭłasnyja hrošy, ci pakryvajuć im inšyja vydatki nakštałt načlehu, ekskursij, charčavańnia i, kali tak, ź jakich krynic, dakładna nieviadoma.
Darečy, 8 listapada taksama byŭ zadziejničany viertalot MI-2, jakim kiravaŭ načalnik Minskaha aerakłuba DTSAAF Mikałaj Mačanski.
