Na Minskim mory zaŭvažyli redkuju dla Biełarusi ptušku: hahu FOTAFAKT
Fota Śviatłany Savickaj
Na Minskim mory 7 listapada sfatahrafavali niezvyčajnuju dla našaj krainy ptušku. Heta zvyčajnaja haha, dla Biełarusi jana nadzvyčaj redkaja hościa i adznačajecca tut nie kožny hod. Arnitołaham viadomyja tolki adzinkavyja zaloty hetaj marskoj kački, paviedamlajuć ptushki.org.
Najbližejšaje miesca, adkul jana mahła da nas zalacieć — heta ŭźbiarežža Bałtyjskaha mora. Pieršaja rehistracyja vidu ŭ nas była ŭ 1983 h. Apošnimi hadami hahi sustrakajucca čaściej. Mahčyma, heta źviazana z pavieličeńniem kolkaści biordvočaraŭ — amataraŭ nazirać za ptuškami. Ich taksama nazyvajuć ptuškarami.
— Na Minskim mory samka hahi zastajecca ŭžo bolš za try tydni, — raskazaŭ Siamion Levy, śpiecyjalist Achovy ptušak Baćkaŭščyna. — I dla mnohich biordvočaraŭ hetaja ptuška stała pieršaj hahaj, jakuju jany sustreli ŭ žyćci. Akramia taho, druhaja haha ciapier płavaje ŭ Małaryckim rajonie.
Viadoma, što hahi žyvuć da 37 hadoŭ, a znakamityja ŭ asnoŭnym hahačym pucham, jaki maje najmienšuju ciepłapravodnaść siarod puchu lubych ptušak. Im i ciapier nabivajuć ciopłuju vopratku žycharoŭ paŭnočnych rehijonaŭ, palarnikaŭ, alpinistaŭ i kasmanaŭtaŭ. Samka vyščypvaje jaho z hrudziej i bruška, kab aciaplić hniazdo. Promysieł puchu dahetul isnuje ŭ Isłandyi i Narviehii, dzie častku puchu adzin raz zabirajuć padčas nasiedžvańnia, a paśla vyvadu ptušaniat zabirajuć usio, što zastałosia.
Hahi nyrajuć na hłybiniu da 20 m i kormiacca račkami i maluskami. Hetyja ptuški nie bajacca choładu i na zimoŭku časta źlatajuć u rajony bolš paŭnočnyja, čym miescy hniezdavańnia — aby było niehłyboka i mora nie było skavanaje lodam.
