RNPC «Maci i dzicia» nie praciahnuła kantrakt viadomamu dziciačamu reanimatołahu Andreju Vitušku
RNPC «Maci i dzicia» nie budzie praciahvać kantrakt ź viadomym dziciačym reanimatołaham, kandydatam miedycynskich navuk Andrejem Vituškam.
Pra heta napisała ŭ svaim fejsbuku jaho žonka Kryścina Vituška.
«RNPC «Maci i dzicia» pryniało rašeńnie kandydatu miedycynskich navuk, mahistru humanitarnych navuk, doktaru vyšejšaj katehoryi z amal 20-hadovym stažam nie praciahvać kantrakt. «U nas mnoho vračiej», — zajaviŭ akreścinski viertuchaj, kali niekalki dziasiatkaŭ źniavolenych, ryzykujučy iznoŭ być pabitymi, sprabavali patłumačyć absurdnaść zatrymańnia Andreja Vituški. Dziesiatki, kali nie sotni, kaleh i pacyjentaŭ ładzili ŭ žniŭni stychijnyja akcyi ŭ padtrymku. Kalehi pa balnicy zajavili, što nie vyjduć na pracu, kali Andreja zvolniać. I nie zvolnili. Tady nie zvolnili. Pahladzieli na datu zakančeńnia kantrakta i vyrašyli prosta pačakać».
Sa słoŭ Kryściny Vituški, apaviaščeńnie ab niepadaŭžeńni kantraktu dasłali poštaj. Kantrakt zakančvajecca ŭ siaredzinie śniežnia.
«Choć adnyja kaladnyja śviaty nie buduć skradzienyja», — sumna iranizuje Kryścina Vituška.
Andrej i Kryścina Vituški byli zatrymanyja viečaram 10 žniŭnia la Centralnaha RUUS: jany tam šukali tam svajho niepaŭnaletniaha syna Mirona, zatrymanaha niezadoŭha da hetaha. Kryścinu adpuścili z Akreścina kala 5 hadzin ranicy 13 žniŭnia, a 14 žniŭnia adpuścili i Andreja Vitušku.
Z partretami Andreja Vituški i płakatami pra toje, kab jaho vyzvalili, na praciahu dvuch dzion na akcyi salidarnaści da Biełmieduniviersiteta vychodzili miedycynskija rabotniki.