Pašynian paraiŭ vajskoŭcam vyrašyć pytańnie z pratestoŭcami, jakija skuholać
Premjer-ministr Armienii Nikoł Pašynian paraiŭ vajskoŭcam viarnucca z Nahornaha Karabacha ŭ Jerevan i vyrašyć pytańnie z tymi, chto «skuholić pad ścienami». Pra heta jon napisaŭ na svajoj staroncy ŭ fejsbuku, piša RBK.
«Prahledzieŭ dziasiatki videamateryjałaŭ vajskoŭcaŭ ź pieradavoj. Uražany hłybakadumnaściu chłopcaŭ. Chłopcy, vy majecie racyju. Čakaju vas u Jerevanie, kab kančatkova vyrašyć pytańni z tymi, chto skuholić pad ścienami. Hanarusia vami», — napisaŭ Pašynian.
U Jerevanie niekalki dzion prachodziać akcyi pratestu, ich udzielniki nie zadavolenyja pahadnieńniem Pašyniana pa Nahornym Karabachu (Armienija straciła bolš za pałovu raniej zaniatych terytoryj) i patrabujuć adstaŭki premjera.
Ambudsmien Armienii Arman Tatajan na svajoj staroncy ŭ Facebook asudziŭ zajavu Pašyniana.
«Heta vielmi niebiaśpiečnaja zajava, jakoj, pa sutnaści, robicca zaklik da hramadzianskaj vajny. Heta zajava ŭdvaja niebiaśpiečniejšaja na fonie zajaŭ z boku ŭzbrojenych asob u vajennaj formie, jakija źmiaščajuć zakliki da hvałtu i zabojstvaŭ. Zaklikaju ŭsich prajavić strymanaść, pravaachoŭnyja orhany abaviazanyja dziejničać u adpaviednaści z zakonam. Nieabchodna praduchilić usie sproby samasudu», — napisaŭ Tatajan.
Paśla zajavy Pašyniana pra namier padać u adstaŭku paviedamiŭ na staroncy ŭ fejsbuku kiraŭnik ofisa vice-premjera Armienii Varah Sisieran.
«Paśla zajavy Pašyniana ja vyrašyŭ napisać zajavu ab adstaŭcy, spynić svajo siabroŭstva ŭ kirujučaj partyi «Hramadzianski dahavor», — napisaŭ Sisieran.
Taksama pra namier skłaści deputackija paŭnamoctvy paviedamiła ŭ Facebook deputat kirujučaj frakcyi «Moj krok» Hajanie Abraamian. «Z hetaha momantu liču biessensoŭnymi svaje paŭnamoctvy. Prašu prabačeńnia za ŭsie pamyłki», — napisała Abraamian.