MUS paviedamlaje pra zatrymańnie dvuch «partyzanaŭ» pry sprobie sabatažu na čyhuncy
Skrynšot ź videa MUS.
«Za sprobu pryvieści ŭ nieprydatnaść čyhunačnyja kalei zatrymanyja dva čałavieki, — paviedamlaje pres-słužba Ministerstva ŭnutranych spraŭ. — Uviečary 11 listapada pablizu prypynku «Viazynka» supracoŭniki Maładziečanskaha RAUS zaśpieli dvuch mužčyn, jakija sprabavali niešta zrabić na čyhunačnych kalainach. Kali milicyjanty padyšli bližej, tyja kinulisia biehčy.
Adzin pabieh u bok vioski Lipieni da schavanaha ŭ kustach aŭtamabila. Mužčynu zatrymali i vyjavili ŭ jaho ŭ zaplečniku butelku ź bienzinam, bałakłavu i abcuhi. Druhoha vyjavili za 1,5 km ad čyhunki — uciakač chavaŭsia ŭ lesie.
Zatrymanyja vyjavilisia svajakami z Radaškavič (36 i 37 hadoŭ). Jany nakłali čatyrochmietrovy mietaličny drot na pierahonie «Radaškavičy — Dubrava» i vyšmaravali śpiecsrodkam bałty dla palapšeńnia elektrakantaktu. Pravaachoŭniki apieratyŭna znajšli raściažku i nie dapuścili falšyvaha spracoŭvańnia śviatłafora i błakavańnia ruchu ciahnikoŭ.
Sa słoŭ zatrymanych, jany źbiralisia raźlić bienzin na šlachu adychodu, dumajučy, što takim čynam zmohuć źbić sa tropu słužbovaha sabaku.
Zatrymanych pasadzili ŭ Izalatar časovaha ŭtrymańnia, zaviedzienaja kryminalnaja sprava.
