Na zasnavalnika ruchu «Dzieja» zaviali dźvie kryminalnyja spravy. Adna ź ich — za ŭzłom sistemy Minharvykankama
Na zasnavalnika ruchu «Dzieja» zaviali dźvie kryminalnyja spravy. Adna ź ich — za ŭzłom sistemy Minharvykankama, paviedamlaje spring96.org.
Zatrymanaha 3 listapada zasnavalnika i siabra rady hramadskaha ruchu «Dzieja» Kima Samusienku padazrajuć va ŭzłomie kampjutarnaj sistemy Minharvykankama (č. 2 art. 349 KK) i dziejańniach, jakija hruba parušajuć hramadski paradak, u Minsku z 9 žniŭnia (č. 1 art. 342 KK). Praz dva dni byŭ zatrymany i brat Kima — Alaksiej.
Kima Samusienku zatrymali 3 listapada doma paśla vobšukaŭ u jaho doma i ŭ domie jahonaj maci. Paśla vobšuka, jaki, pavodle pravaabaroncaŭ, supravadžaŭsia strełami ŭ domie i prymianieńniem fizičnaj siły, zabrali ŭsiu techniku Kima i jahonaj žonki, zarehistravanuju palaŭničuju zbroju, hrošy, bčb-ściah, ściah Ukrainy, ukrainski pašpart žonki i inšaje.
Rodnym paviedamili, što mužčyna zatrymany na 72 hadziny ŭ miežach kryminalnaj spravy pa č. 2 art. 349 Kryminalnaha kodeksa (Niesankcyjanavany dostup da kampjutarnaj infarmacyi). Jaho źmiaścili ŭ izalatar časovaha ŭtrymańnia na Akreścina, dzie jon znachodzicca i ciapier.
Praz dva dni paśla paśla zatrymańnia Kima Samusienki Śledčy kamitet paviedamiŭ, što jon i jaho znajomy datyčnyja da ŭzłomu kampjutarnaj sistemy Minharvykankama.
«Pavodle źviestak śledstva, unačy 3 listapada 34-hadovy mužčyna, znachodziačysia na techničnym paviersie budynka na vulicy Prytyckaha ŭ Minsku, dziejničajučy ź nieŭstanoŭlenymi asobami, z asabistaj zacikaŭlenaści, z dapamohaj kampjutarnaj techniki šlacham parušeńnia sistemy abarony ažyćciaviŭ niesankcyjanavany dostup da infarmacyi, jakaja zachoŭvajecca ŭ kampjutarnaj sietcy Minskaha haradskoha vykankama», — zajavili ŭ viedamstvie.
Paźniej, jak havorycca ŭ paviedamleńni SK, byŭ zatrymany jaho znajomy, datyčny da ŭzłomu kampjutarnaj sistemy Minharvykankama. Havorka idzie pra zasnavalnika «Dziei» Kima Samusienku:
Skrynšot ź videa SK. Mierkavana na im Kim Samusienka
«Pa daručeńni śledčaha pa miescy žycharstva zatrymanaha, 31-hadovaha minčanina, supracoŭnikami milicyi praviedzieny vobšuk, u chodzie jakoha vyjaŭleny šerah rečavych dokazaŭ, u tym liku ahniastrelnaja zbroja, bojeprypasy, broniekamizelki, kaski, miačy, radyjostancyi i ŭlotki z zaklikami da strajku».
Pry hetym, jak paviedamlali adrazu rodnyja Kima, vyniataja zbroja z kvatery Kima źjaŭlajecca zarehistravanaj, a na broniekamizelku nijaki dazvoł nie treba.
Viadoma, što pa hetaj spravie zatrymanyja Ivan Andrušojć i Alaksandr Chackievič. Viadoma, što Ivan Andrušojć znachodzicca ŭ IČU na Akreścina. Ale bolš padrabiaznaj infarmacyi pra zatrymanych pakul niama.
