«Niby zrabiŭ kamuści zaŭvahu». Prosta na pracy zatrymali supracoŭnika Asvoda
Pavodle infarmacyi rodnych i kalehaŭ, matros-vyratavalnik Asvoda Leanid Buhor ciapier znachodzicca ŭ izalatary na Akreścina. Jaho siastra nie viedaje dakładna, pry jakich abstavinach byŭ zatrymany 20-hadovy Leanid, što jamu staviać u vinu i kali sud, piša TUT.BY.
Učora ŭviečary Leanid pracavaŭ na Niamizie, jon vyratavalnik Asvoda. Jaho zatrymali prosta na pracy kala 21:00, a ŭ 23:30 jon užo byŭ na Akreścina — aspaviadaje Kaciaryna, rodnaja siastra Leanida.
Leanidu 20 hadoŭ, pa słovach rodnych, u Asvodzie chłopiec pracuje kala hoda — na vyratavalnaj stancyi «Kamsamolskaje voziera». Toj samaj, 8 supracoŭnikaŭ jakoj apynulisia za kratami paśla niadzielnaha maršu 6 vieraśnia, kali jany ratavali z vady pratestoŭcaŭ. Pavodle viersii milicyi, heta było niepadparadkavańnie: zamiest taho, kab pieradać ludziej siłavikam, supracoŭniki Asvoda pieravieźli ich na inšy bierah. U vyniku ratavalniki paŭstali pierad sudom, dvoje ź ich atrymali štrafy, spravy astatnich adpraŭlenyja na dapracoŭku. Vinu nichto nie pryznaŭ.
— Leanida nibyta zatrymali za toje, što jon niešta skazaŭ tym, chto zatrymlivaŭ. Ale dakładna ničoha nie viedaju, heta ŭsio z čužych słoŭ. Miarkujučy pa śpisach u internecie (jakija składajuć vałanciory), brata dastaŭlali ŭ roznyja RUUS i ŭžo potym na Akreścina. Jaki ŭ jaho artykuł i kali sud — nieviadoma, — kaža Kaciaryna.
Niama padrabiaznaściaŭ i ŭ kalehaŭ Leanida Buhra.
— Jon dakładna zatrymany na pracoŭnym miescy, u niadzielu Leanid pracavaŭ u katary na vadzie, jon matros-vyratavalnik, — rastłumačyli TUT.BY u ASVOD. — Viedajem, što jon na Akreścina, a pa jakim artykule — nie. Niby Leanid zrabiŭ kamuści zaŭvahu, ale heta papiaredniaja viersija.
TUT.BY źviarnuŭsia pa kamientar u HUUS Minharvykankama.
Darečy, paśla taho jak 8 supracoŭnikaŭ Asvoda praviali troje sutak u izalatary za niepadparadkavańnie, adzin ź ich, vučań vadałaza, Ivan Jurski pryniaŭ rašeńnie syści. Astatnija praciahvajuć pracavać.
