«Zamiest pytańniaŭ ab hvałcie paśla vybaraŭ abmiarkoŭvali zakupku broniekamizelek». Jak deputatka Minharsavieta prosić ab adklikańni
Viečaram paniadziełka ŭ adzin ź minskich dvaroŭ Brylevičaŭ pryjšła deputat Minharsavieta. Jana vielmi prasiła miascovych: adkličcie! Heta taja samaja Volha Ciesakova, jakaja miesiac tamu, paśla prezidenckich vybaraŭ, napisała zajavu z prośbaj daterminova skłaści paŭnamoctvy. Ale akazałasia, kab syści raniej za termin, patrebnyja važkija padstavy: rašeńnie suda pa kryminalnaj spravie, chvaroba abo adklikańnie, inicyjavanaje vybarščykami, piša tut.by.
Volha Ciesakova — deputat Minharsavieta pa Dziaržynskaj vybarčaj akruzie № 23. Ciesakovu abrali ŭ Radu 28-ha sklikańnia ŭ lutym 2018 hoda, tady joj było 23 hady. Hramadskuju nahruzku jana sumiaščaje z pracaj u TAA «Finprofit», dzie źjaŭlajecca śpiecyjalistam pa pracy z klijentami. Fota: Volha Šukajła, tut.by
Spačatku Volha rastłumačyła, čamu choča syści.
— Na žal, z tym, što adbyvajecca, deputaty ničoha nie mohuć zrabić. Ni z hvałtam, ni z užo praviedzienymi vybarami, zrazańniem stužačak, ściahoŭ. Ja pryniała dastatkova ŭzvažanaje rašeńnie — syści ź sistemy, jakaja nie robić ničoha dla naroda ŭ momant, kali pavinna być maksimalna ŭklučanaja.
— My viedajem, što vy padali zajavu. A što vy zrabili za hety miesiac paśla vybaraŭ? — spytała žycharka Brylevičaŭ.
Volha adkazała, što chadziła da kiraŭnika Maskoŭskaha rajona Minska, sustrakałasia z pradstaŭnikom MUS i staršynioj Savieta deputataŭ. Sprabavała im rastłumačyć, što adbyvajecca na vulicach.
— Ciapier kažuć, što ŭ nas vychodzić na pratesty chto? Prastytutki, marhinały, asacyjalnyja asoby! Ja sprabavała danieści, što ludzi vychodziać, tamu što niama aficyjnaj reakcyi na toje, što adbyvajecca. Tamu što niama nastupstvaŭ (naprykład, pa prykładach hvałtu siłavikoŭ suprać mirnych hramadzian. — TUT.BY). Niešta dzieści jak by robicca, ale my hetaha nie viedajem.
Na maje pytańni mnie na minułym tydni klatvienna paabiacali, hledziačy ŭ vočy, što na siesii harsavieta budzie pradstaŭnik MUS ci prakuratury, jaki raskaža, što, naprykład, uzbudžana 950 kryminalnych spraŭ pa pieravyšeńni paŭnamoctvaŭ. I na siesii Minharsavieta, jakaja prajšła ŭ piatnicu, my pačali ź vielmi «važnaha» pytańnia — padviadzieńnie vynikaŭ ahladu-konkursu na najlepšuju łaŭku Minska. Vy mianie prabačcie, ja tak mocna śmiajałasia, što prapuściła, chto ŭ nas pieramožca. Ja takaja złaja była!
Volha Ciesakova dadała: niekalki deputataŭ prapanavali ŭtvaryć kamisiju pa rasśledavańni faktaŭ hvałtu, mienavita ad Minharsavieta.
— Hetaje pytańnie było vyniesiena zahadzia, ale, jak vy razumiejecie, u paradak jaho nie ŭklučyli.
Na vieraśnioŭskaj siesii deputaty abmiarkoŭvali biudžet Minska i pieraraźmierkavańnie srodkaŭ. Apošniaj kroplaj dla Volhi Ciesakovaj stała pytańnie ab finansavańni zakupki 200 broniekamizelek dla siłavikoŭ.
— Suprać prahałasavała tolki ja i Pavieł Bačarnikaŭ (jašče adzin deputat pa Maskoŭskim rajonie Minska, pradprymalnik). Nas dvoje suprać 53-ch! Ja miesiac bjusia hałavoj ab ścianu i naohuł ničoha. I ja nie viedaju, što jašče možna zrabić, akramia jak syści adtul i pakazać, što ich sistema nie pracuje, što ŭ ich jość prablema.
Zajavu ab adklikańni ja napisała miesiac tamu. Pra jaje ŭsie viedali, kazali i tolki na minułym tydni mnie skazali: oj, vy viedajecie, a jana nie prakocić!
Volha Ciesakova raspaviała, što da deputataŭ Minharsavieta zaraz źviartajucca ludzi z nahody hvałtu paśla vybaraŭ i falsifikacyj na vybarčych učastkach.
Naprykład, ludzi prosiać admianić abmiežavańni na praviadzieńnie mirnych masavych akcyj i mierapryjemstvaŭ u Minsku, vyłučyć pastajannuju placoŭku, prosiać adpravić deputacki zapyt u Śledčy kamitet pa faktach masavaha źbićcia, adpravić zapyt u Minharvykankam na publikacyju pratakołaŭ hałasavańnia, u Hienprakuraturu — na raźbiralnictvy pa faktach falsifikacyj. Jašče ludzi prosiać pryznać vyniki prezidenckich vybaraŭ niesapraŭdnymi — tamu što na mnohich učastkach nie vyviesili vynikovyja pratakoły.
— Što my na heta majem? Ad Śledčaha kamiteta — «Minski haradski saviet deputataŭ u adpaviednaści z zakanadaŭstvam nie maje paŭnamoctvaŭ na publikacyju pratakołaŭ hałasavańnia». Pišuć, što z nahody prymianieńnia siłavymi orhanami fizičnaj siły i śpiecsrodkaŭ 9 i 10 žniŭnia ciapier pravodziać pravierki, a zajaŭnikam paviedamiać «u paradku, ustanoŭlenym zakanadaŭstvam», — pryvodzić prykłady adkazaŭ svaim kaleham deputat.
— Nu to značyć, nikoli! — vyhuknuŭ chtości.
Deputatam Minharsavieta kažuć, što pytańni vybarčaha zakanadaŭstva nie ŭ ich kampietencyi. Upłyvać jany mohuć chiba što na vykanańnie zakona «Ab masavych mierapryjemstvach». Ale Volha ŭpeŭnienaja: i na prapanovy pravodzić maršy «ŭ ramkach zakona» buduć adpiski.
Deputatka Volha Ciesakova sama chodzić na akcyi pratestu, na niadzielnyja maršy. A adzin raz vychodziła razam z kaleham na taki marš z płakatami «Deputaty suprać hvałtu».
Volha spadziajecca, što inšyja deputaty paśla jaje prykładu taksama buduć vychodzić ź sistemy.
Dziaŭčyna raspaviała, što praź dźvie hadziny paśla taho, jak apublikavała zajavu ab adklikańni ŭ sacsietkach, chtości źviazaŭsia ź jaje siamjoj, «byli pahrozy». Padrabiaznaściej nie kaža, kab nie naškodzić blizkim.
Volha Ciesakova pryznałasia TUT.BY, što nie hałasavała na prezidenckich vybarach. Farmalna — tamu što chvareła. Faktyčna — tamu što była ŭpeŭnienaja, što jaje «hołas ničoha nie vyrašaje».
— Ja prykład taho, jak vybary źmianili biełarusaŭ. Niahledziačy na hramadskuju aktyŭnaść, bo ja była dosyć apalityčnaja da momantu, pakul hvałt paśla vybaraŭ nie zakranuŭ blizkich mnie ludziej.
Adna sprava, kali tabie raskazvajuć. Inšaja sprava, kali ty bačyš žudasnyja hiematomy na ciele znajomaha, kali bačyš, što ŭ chłopca niama miesca na tvary ad švoŭ, tamu što jon prosta nie ŭ patrebny čas 10 vieraśnia kataŭsia ŭviečary pa parku. Źniali, pakłali mordaj u padłohu — heta strašna.
Strašna, kali ty pieražyvaješ za ludziej, jakija prosta žyvuć na «Puškinskaj», na «Kamiennaj Horcy». Strašna, kali ty idzieš poźnim viečaram u kramu, bačyš supracoŭnikaŭ pravaachoŭnych orhanaŭ — i baišsia ich. Heta dakładna nie tyja adčuvańni, što pavinny być u krainie ŭ čałavieka, jaki viadzie zakonny ład žyćcia.
— A što vy budziecie rabić, kali vy spynicie dziejnaść u jakaści deputata? — pytalisia ludzi.
— Padtrymlivać, nakolki heta mahčyma, niazhodnych ludziej. Chadzić ź imi na šeści, mitynhi. Toje, što ja i rablu ŭvieś hety miesiac.
Volha patłumačyła ludziam, što paśla jaje adklikańnia na hetaj akruzie pavinny buduć pravieści novyja vybary.
— Tamu što termin našych paŭnamoctvaŭ jašče kala paŭtary hadoŭ. Stolki času miesca deputata pustavać nie pavinna.
— A vy budziecie znoŭku abiracca?
— Vy prapanujecie padmanuć sistemu? Syści i viarnucca? — zaśmiajałasia deputat.
Prama ciapier žychary Maskoŭskaha rajona stalicy robiać sproby adklikać deputata ranham vyšej — Ihara Kamaroŭskaha z Pałaty pradstaŭnikoŭ. Ciapier ludzi damahajucca asabistaj sustrečy ź im, a jašče źbirajuć podpisy, kab deputat pradstaviŭ spravazdaču ab svajoj pracy za hod.
