«Dva miesiacy masavych demanstracyj raźviančali mif Alaksandra Łukašenki»
Fota Nadziei Bužan
Siońnia niadziela. Usie minułyja niadzieli paśla vybaraŭ u Minsku i inšych vialikich haradach prachodzili masavyja demanstracyi pratestu suprać Alaksandra Łukašenki, jaho palityki i falsifikacyi vybaraŭ. U Minsku piać niadziel zapar na šeści źbirałasia ad 150 da 300 tysiač čałaviek.
Jany achoplivali ŭvieś centr stalicy. Pryčym kolkaść demanstrantaŭ mała zaležała ad taktyki ŭładaŭ, jakaja mianiałasia.
U rehijonach biesprecedentnyja akcyi pratestu prachodzili nie tolki va ŭsich abłasnych haradach, ale i mnohich rajcentrach.
Pratesty nie spynilisia, niahledziačy na zatrymańnie paśla 9 žniŭnia jak minimum 10 500 čałaviek. Darečy,
Uschodniaja Jeŭropa nie viedała bolš maštabnych palicejskich apieracyj ad 1940-ch hadoŭ. Za paŭtara miesiaca ŭ Biełarusi praz turmy pa palityčnych matyvach prajšło bolš za 0,11% nasielnictva.
Možacie sami heta sprajecyravać na lubuju inšuju krainu.
Na akcyi pratestu dvuch apošnich miesiacaŭ ŭ Minsku vychodziła prykładna ŭ 6 razoŭ bolš ludziej, čym na samyja vialikija pratesty ŭ raniejšyja hady. U rehijonach ža pratestuje ŭ dziasiatki razoŭ bolš ludziej, čym u minułyja hady. I nikoli raniej pratesty nie tryvali tak doŭha.
Pry hetym pratesty nosiać absalutna mirny charaktar. Było ŭsiaho para vypadkaŭ u pieršyja dni paśla vybaraŭ u Breście, Pinsku, Navapołacku i Minsku, kali demanstranty ŭžyvali siłu suprać siłavikoŭ, jakija nie davali im sabracca, usie astatnija demanstracyi prajšli vyklučna mirna.
Hetaja biesparaŭnanaja ŭ historyi Biełarusi pratestavaja aktyŭnaść zrujnavała mif pra masavuju padtrymku Alaksandra Łukašenki. Na samy vialiki mitynh u jaho padtrymku ŭ Minsku 16 žniŭnia sabrałasia prykładna ŭ 20 razoŭ mienš ludziej, čym na demanstracyju suprać jaho ŭ toj ža dzień,
choć na prałukašenkaŭski mitynh zvozili aŭtobusami i ciahnikami, pad achovaj siłavikoŭ, a na pratesty ludzi źbirajucca sami, nasupierak zastrašvańniu.
