Studenty MDŁU kryčali «Hańba!» administracyi, jakaja nie abaraniła ich ad AMAPa
Studenty MDŁU sustrelisia z rektaram univiersiteta Natallaj Baranavaj, u VNU da hetaha času pryjšli i baćki, jakija patrabavali ad administracyi VNU abaranić svaich dziaciej, piša Tut.by.
— Darahija studenty i baćki, — źviarnułasia Natalla Baranava da prysutnych. — Toje, što adbyłosia ŭ univiersitecie, my rasceńvajem jak surjoznaje nadzvyčajnaje zdareńnie. I heta było dla nas zusim niečakana. Litaralna da hetaha za piać chvilin ja patelefanavała (nazyvaje imiony supracoŭnikaŭ) spytać, ci ŭsio ŭ nas u paradku ŭ faje. My viedali, što vy pojdziecie śpiavać pieśniu, my pasłali tudy dekana, kab kožny pahavaryŭ sa svaimi studentami. I dekany stajali i čakali, kali vy praśpiavajecie.
Natalla Baranava skazała, što ŭžo źviazałasia ź pieršym namieśnikam ministra ŭnutranych spraŭ Hienadziem Kazakievičam.
— Čas syšoŭ, kab udakładnić, kudy pavieźli našych studentaŭ. Ich užo viazuć nazad z Partyzanskaha RUUS.
Zatrymali ŭ VNU piać čałaviek. Pa infarmacyi Natalli Baranavaj, pravaachoŭniki rascanili toje, što adbyvałasia ŭ univiersitecie, jak niesankcyjanavanuju akcyju. Rektar adkazała Hienadziu Kazakieviču, što ŭ MDŁU viedali, što studenty źbirajucca śpiavać.
— Vy pieradajcie, kali łaska, što studenty žartujuć z ahniom, — pieradała rektar MDŁU słovy pieršaha namieśnika ministra ŭnutranych spraŭ.
