«Patrabujem zaviadzieńnia kryminalnych spraŭ pa faktach hvałtu»: zajava štaba Viktara Babaryki
Siońnia Biełaruś raźvitvałasia z Alaksandram Tarajkoŭskim, zabitym siłavikami padčas mirnaha pratestu. My vykazvajem spačuvańni blizkim Alaksandra. I patrabujem praviadzieńnia śledstva pa fakcie jaho śmierci, havorycca ŭ zajavie Štaba Viktara Babaryki.
My patrabujem zaviadzieńnia rasśledavańniaŭ i kryminalnych spraŭ pa faktach prymianieńnia hvałtu z boku AMAPa, milicyi, nahladčykaŭ. My padtrymajem esie inicyjatyvy pa zbory źviestak ab hvałcie i katavańniach dla mižnarodnych sudoŭ.
Vyzvalenyja z zaścienkaŭ zaraz prachodziać novyja koły piekła z aśviedčańniami. Ludziam, jakim sutkami nie davali navat vady i ŭtrymlivali pa 50 čałaviek u kamierach na 4-ch, razdajuć rachunki za ježu. Dziasiatki špitalizavanyja. Dziasiatki źnikli, i svajaki nie viedajuć nijakaj infarmacyi pra ich. Tysiačy zastajucca ŭ niavoli. Sudy biez abaroncaŭ tolki na asnovie chłuślivych pratakołaŭ, padpisanych siłavikami. Ni da kaho nie puskajuć advakataŭ. Štodzionnyja naviny pra kryminalnyja abvinavačvańni, pieratrusy, aryšty. Heta naša realnaść.
My patrabujem vyzvaleńnia ŭsich zatrymanych padčas vybarčaj kampanii i mirnych pratestaŭ, razboru i kampiensacyj dla paciarpiełych ad samavolstva ŭładaŭ, abskardžvańnia rašeńniaŭ sudoŭ, adstaŭki i nastupnaha kryminalnaha pieraśledu ŭsich adkaznych za prymianieńnie hvałtu, a taksama ŭsich sudździaŭ, jakija vynieśli niespraviadlivyja rašeńni. My patrabujem spynieńnia ŭsich palityčna matyvavanych kryminalnych spraŭ i nieadkładnaha vyzvaleńnia ŭsich palityčnych viaźniaŭ.
My nie spynimsia, pakul u hetaj krainie nie pieramoža spraviadlivaść i zakon dla ŭsich!