Pamiatajecie 20-hadovuju naziralnicu, jakuju jaje ž nastaŭniki nie puskali ŭ škołu? Jana zatrymanaja
20-hadovaja naziralnica Iva Ambraževič sačyła za vybarami ŭ škole №59 na vulicy Lidskaj u Kamiennaj Horcy.
«NN» rabiła pra heta materyjał. Dziaŭčyna skončyła hetuju škołu, a ciapier nazirać za vybarami jaje nie puskajuć ułasnyja nastaŭniki. Uvieś hety čas jana znachodziłasia pad škołaj, kab zafiksavać kolkaść vybarcaŭ.
Čytajcie. «Vočy apuskajuć»: 20-hadovuju naziralnicu nie puskajuć u škołu jaje ž nastaŭniki
U subotu, 8 žniŭnia, prykładna ŭ 11:40 da škoły padjechali amapaŭcy, ich było troje, raskazaŭ «NN» inšy naziralnik Siarhiej Antusievič. Jany paviedamili Ivie, što na jaje napisanaja zajava ad kahości z členaŭ vybarčaj kamisii. I dziaŭčynie patrebna prajechać z supracoŭnikami milicyi.
Kaardynataru «Prava vybaru» pa Minsku Źmitru Sałoškinu Iva paśpieła napisać, što zaviedzienaja kryminalnaja sprava i zatrymańnie źviazana z hetym, ale nie zrazumieła, ci suprać Ambraževič i pa jakim artykule.
Baćki dziaŭčyny na hety momant nie mohuć daviedacca pra los dački. Tata Siarhiej kaža, što ŭ Frunzienski RUUS dačka nie pastupała, źviazacca ź joj jany nie mohuć.
