Mininfarm vynies papiaredžańnie Tut.by — za ličby daterminovaha hałasavańnia
Ministerstva infarmacyi Biełarusi 7 žniŭnia vyniesła piśmovaje papiaredžańnie partału Tut.by za raspaŭsiud «niedakładnaj infarmacyi, jakaja moža nanieści škodu dziaržaŭnym abo hramadskim intaresam».
5 žniŭnia Tut.by pisaŭ pra toje, jakija parušeńni zafiksavali naziralniki, što nie trapili ŭ lik abranych, jakim dazvolena znachodzicca na vybarčych učastkach. U tekście byŭ taksama kamientar CVK. Naziralnik Alaksandr Jakuboŭski, akredytavany na 19-y ŭčastak u pasiołku Śmiłavičy Červieńskaha rajona, raspavioŭ pra svaje padliki (pryjšoŭ 21 vybarščyk suprać ukazanych u pratakole 164), adznačyŭšy, što na ŭčastku jon znachodziŭsia z momantu apiačatvańnia skryni i da kanca dnia.
Mininfarm ličyć, što infarmacyja pra čas znachodžańnia naziralnika nie adpaviadaje rečaisnaści.
Pa Zakonie ab ŚMI vypusk srodka masavaj infarmacyi moža być prypynieny na termin da troch miesiacaŭ rašeńniem respublikanskaha orhana dziaržkiravańnia, kali vydańnie nie likviduje parušeńni, jakija pasłužyli padstavaj dla vyniasieńnia piśmovaha papiaredžańnia, albo nie dakładzie pra heta ŭ Mininfarm. Termin vykanańnia, napisany ŭ papiaredžańni, — 8 žniŭnia.
Rašeńnie ab vyniasieńni piśmovaha papiaredžańnia moža być u miesiačny termin abskardžana ŭ sudovym paradku. Tut.by z rašeńniem Mininfarma nie zhodny. Rašeńnie ab abskardžańni jašče nie pryniataje, ale, kab paźbiehnuć błakiroŭki resursu, byli ŭniesieny źmieny ŭ tekst artykuła.
