Jarmošyna prakamientavała paviedamleńni pra zatrymańni naziralnikaŭ i vydaleńni ich z učastkaŭ
Fota Darji Burakinaj
Naziralnikaŭ vydalajuć z učastka dla hałasavańnia z dapamohaj milicyi tam, dzie parušajecca hramadski paradak, i prosiać ich pakinuć pamiaškańnie z-za vykanańnia patrabavańniaŭ biaśpieki, ustanoŭlenych u suviazi z pandemijaj. Pra heta paviedamiła TUT.BY staršynia CVK Biełarusi Lidzija Jarmošyna, kamientujučy paviedamleńni ab zatrymańni niezaležnych naziralnikaŭ na vybarčych učastkach.
Pa słovach Lidzii Jarmošynaj, naziralnikaŭ vydalajuć z učastkaŭ z pryciahnieńniem supracoŭnikaŭ milicyi ŭ vypadkach parušeńnia imi hramadskaha paradku. Infarmacyja ab hetych incydentach u cełym pa krainie jość u CVK: tam, aproč inšaha, značacca vypadki znachodžańnia na ŭčastku ŭ stanie ałkaholnaha apjanieńnia, pahroz inšym naziralnikam, viadzieńnia fota- i videazdymki biez dazvołu staršyni kamisii i stvareńnia pieraškod dla vybarščykaŭ.
— Adrazu mahu skazać, što ŭ nas tut jość ad inšych naziralnikaŭ padrabiaznaja daviedka, navat siońnia na 14-ju hadzinu. Tam, dzie jany debašyrać, vydaleńni z dapamohaj milicyi jość. Usio astatniaje — heta ŭzajemaadnosiny i razborki «kamisija — naziralnik», — zajaviła staršynia Centrvybarkama.
Infarmacyju pra padobnyja zdareńniai, jakija adbyvajucca na vybarčych učastkach, Centralnaja vybarčaja kamisija atrymlivaje dziakujučy supracoŭnictvu ź Fiederacyjaj prafsajuzaŭ Biełarusi.
— Učastkovym kamisijam niama kali heta pisać. Dziakuj Bohu, nam dapamahajuć biełaruskija prafsajuzy. Jany daručyli ŭsim svaim naziralnikam, stvaryli koł-centr, i ŭ ich siadzić cełaja hrupa, jakaja akumuluje na praciahu dnia ŭsie paviedamleńni ad naziralnikaŭ, jakija znachodziacca na ŭčastkach. I jany nam hetuju infarmacyju pastaŭlajuć — my paprasili ich pra heta, ja vypadkova daviedałasia, što takaja praca imi viadziecca.
Lidzija Jarmošyna ličyć, što zajavy niekatorych niezaležnych naziralnikaŭ ab nieabhruntavanym vydaleńni ich z pamiaškańniaŭ dla hałasavańnia ci ŭ cełym z terytoryi ŭčastkaŭ nie adpaviadajuć rečaisnaści i ŭ bolšaści vypadkaŭ źviazany z zachavańniem limitu ŭ try naziralniki, ustanoŭlenaha z-za pandemii karanavirusa.
Pa słovach Lidzii Jarmošynaj, takaja prablema adsutničaje na tych učastkach, dzie byŭ składzieny hrafik znachodžańnia na ich naziralnikaŭ, jaki CVK prasiŭ stvaryć učastkovyja kamisii na ŭvieś pieryjad daterminovaha hałasavańnia dla zručnaści ludziej.
— My rekamiendavali ŭsim składać hrafik. Dzieści častka kamisij takija hrafiki skłała. Voś, darečy, siońnia kali ŭziać pa rehijonach. U Bresckaj vobłaści prysutničajuć na ŭčastkach 2225 naziralnikaŭ ad prafsajuzaŭ, hramadskich abjadnańniaŭ i 83 alternatyŭnyja. U Minskaj vobłaści tolki dva alternatyŭnyja na ŭčastkach. U Mahiloŭskaj vobłaści ŭvohule nivodnaha. U Homielskaj vobłaści 27 alternatyŭnych. Minsk — 1987 naziralnikaŭ ad prafsajuzaŭ, 15 alternatyŭnych. Hrodzienskaja vobłaść — 1717 naziralnikaŭ ad prafsajuzaŭ, BRSM, sajuza žančyn i hetak dalej, 24 alternatyŭnyja. Viciebskaja vobłaść — adzin alternatyŭny. Uvohule, tam, dzie kamisii skłali hrafiki i damovilisia z naziralnikami, tam usio ŭ paradku. Tam, dzie rabili heta stroha pa akredytacyi (jany majuć prava heta rabić, prosta my prasili źnizić napał i rabić hrafiki), naturalna, atrymlivajecca, što pieršaja trojka traplaje, a astatnich nie vidać. Pieršyja, chto atrymaŭ akredytacyju, — jany i prysutničajuć. A kali sychodziać, to zaprašajucca nastupnyja.
