Udzielniku telehram-kanała «Armija z narodam» Siarhieju Koršunu vystavili abvinavačvańnie
Zatrymanamu ŭdzielniku telehram-kanała «Armija z narodam» Siarhieju Koršunu vystavili abvinavačvańnie pa častcy 1 i častcy 2 artykuła 342 Kryminalnaha kodeksa Biełarusi. Pra heta spring96.org paviedamili svajaki zatrymanaha.
č. 1 art. 342 KK RB. Arhanizacyja hrupavych dziejańniaŭ, jakija hruba parušajuć hramadski paradak i spałučajucca ź vidavočnym niepadparadkavańniem zakonnym patrabavańniam pradstaŭnikoŭ ułady abo paciahnuli parušeńnie pracy transpartu, pradpryjemstvaŭ, ustanoŭ abo arhanizacyj, albo aktyŭny ŭdzieł u takich dziejańniach pry adsutnaści prykmiet bolš ciažkaha złačynstva. Karajucca štrafam, ci aryštam, ci abmiežavańniem voli na termin da troch hadoŭ, ci pazbaŭleńniem voli na toj ža termin. č. 2. art. 342 KK RB. Navučańnie ci inšaja padrychtoŭka asob dla ŭdziełu ŭ hrupavych dziejańniach, jakija hruba parušajuć hramadski paradak, a roŭna finansavańnie ci inšaje materyjalnaje zabieśpiačeńnie takoj dziejnaści pry adsutnaści prykmiet bolš ciažkaha złačynstva. Karajucca aryštam abo pazbaŭleńniem voli na termin da dvuch hadoŭ. |
5 žniŭnia ŭ domie siastry Koršuna prajšoŭ vobšuk. Byli vyniaty dva noŭtbuki, stary płanšet i telefon. Vobšuk taksama prachodzić na leciščy siamji, dzie znachodzicca maci Siarhieja.
Siarhiej Koršun na praciahu dziesiaci hadoŭ słužyŭ u milicyi. Prykładna dziesiać hadoŭ tamu syšoŭ pa ŭłasnym žadańni ŭ zvańni kapitana.
Jon byŭ zatrymany 21 lipienia i źmieščany pad vartu ŭ miežach spravy pa art. 342 KK RB pa padziejach 29 traŭnia ŭ Hrodnie, pa jakoj taksama prachodziać błohier Siarhiej Cichanoŭski, palityk Mikałaj Statkievič i jašče jak minimum 20 čałaviek. Akramia Koršuna ŭ toj dzień zatrymali inšych udzielnikaŭ telehram-kanała «Armija z narodam» Alenu Kolikavu i Siarhieja Łukjanava. Praz try dni jany vyjšli na volu ŭ statusie padazravanych pa spravie.
