«Parušaje architekturnaje rašeńnie budynka». U minskaj kvatery milicyja kanfiskavała bieł-čyrvona-biełyja štory
Darja Bialko žyvie ŭ šmatpaviarchoviku na Smarhoŭskim trakcie ŭ Minsku. Dva tydni tamu ich siamja paviesiła na ŭvieś bałkon tkaninu ŭ vyhladzie bieł-čyrvona-biełaha ściaha.
U paniadziełak, kali Darja była doma adna, u dźviery nastojliva pahrukali dvoje mužčyn biez formy. Dziaŭčyna, spužaŭšysia, patelefanavała mužu, toj — u milicyju.
«Pryjšli milicyjanty, pahladzieli na zapis damafona, skazali, što heta byli ich supracoŭniki. Udakładnili, ci jość u nas zbroja. Atrymaŭšy admoŭny adkaz, paprasili začynić vokny, maŭlaŭ, pobač prachodziać niejkija mierapryjemstvy. Bałkon jany nie bačyli», — raskazvaje Darja.
Pieršyja dva mužčyny biez formy tym časam źviarnulisia da staršyni tavarystva. Muž Darji paśla pahutaryŭ ź imi. Na zahad prybrać ściah z bałkona spytaŭ: «Čamu ja pavinien prybirać štoru?» Jamu skazali, što jość skarha ad žychara, jakomu nie padabajecca, i ŭviečary raźbiracca pryjdzie ŭčastkovy.
Ale zamiest ŭčastkovaha znoŭ na parozie źjavilisia milicyjanty ŭ štackim.
«Pakazali paśviedčańnie, paprasili adčynić dźviery. Pavodzili siabie vietliva, skazali, ci ja sama zdymaju ściah, ci jany, bo my parušajem zakon. Paśla telefonnaj razmovy z mužam pajšli i sarvali tkaninu, skazali, što kanfiskujuć», — apisvaje vizit dziaŭčyna.
Svaje dziejańni milicyjanty arhumientavali artykułam 21.13 KaAP (parušeńnie architekturnaha rašeńnia fasada budynka). Viarnuć ściah paabiacali paźniej, kali składuć pratakoł.
Heta ŭžo nie pieršy vypadak palavańnia na bieł-čyrvona-biełuju simvoliku ŭ Centralnym rajonie. U toj ža dzień na vulicy Haja ściah z bałkona źniali rabočyja, pakul haspadyni kvatery nie było doma.
Čytajcie taksama. Milicyja pra źniaty z bałkona bieł-čyrvona-bieły ściah: Jon abraziŭ maralnyja pryncypy minčuka
