Suśvietny bank daje Biełarusi €90 miljonaŭ. U tym liku i na infarmavańnie ludziej pra karanavirus
Uładzimir Karanik, fota Nadziei Bužan
Suśvietny bank vydzieliŭ Biełarusi na baraćbu z karanavirusnaj infiekcyjaj 90 młn jeŭra. Dakumienty baki padpisali anłajn, paviedamlaje Minzdaroŭja.
Ad biełaruskaha boku podpis u dakumientach pastaviŭ ministr achovy zdaroŭja Uładzimir Karanik. Srodki pojduć na abstalavańnie dla reanimacyjnych adździaleńniaŭ, zakupku srodkaŭ abarony i infarmavańnie biełaruskich hramadzian, rastłumačyli ŭ pres-słužbie viedamstva.
Pikantnaść situacyi ŭ tym, što Biełaruś ci nie adzinaja kraina ŭ Jeŭropie, dzie Minzdaroŭja admoviłasia ad bryfinhaŭ, dzie b infarmavała žurnalistaŭ pra situacyju z karanavirusam
Apošni raz bryfinh u Ministerstvie adbyŭsia 24 krasavika (u mai nie było ŭvohule). Tady namieśnica ministra Alena Bohdan začytała padrychtavanuju infarmacyju i admoviłasia adkazvać na pytańni karespandentaŭ.
Apošniaja pres-kanfierencyja z udziełam ministra Uładzimira Karanika adbyłasia 17 krasavika.
Što praŭda, štodnia Minzdaroŭja paviedamlaje źviestki pra chvorych na karanavirus, ale taksama ŭžo bolš za miesiac nie paviedamlaje źviestki pa rehijonach.
U toj ža Litvie i Estonii dajucca padrabiaznyja źviestki pa kožnym rajonie, uličvajučy navat uzrostavuju katehoryju.
