Tramp vajuje z sacsietkami
Prezident ZŠA Donald Tramp u čaćvier padpisaŭ vykanaŭčy ŭkaz, jaki, jak ličać u Biełym domie, dazvolić rehulavać dziejnaść sacsietak i pazbavić ich abarony ad abvinavačvańniaŭ u paklopie, piša bbc.com.
Dakumient, padpisany Trampam, admianiaje dziejańnie parahrafa 230 dziejučaha ŭ ZŠA Akta, jaki vyznačaje normy pavodzin, u pryvatnaści i ŭ sacyjalnych sietkach (Communications Decency Act). Heta parahraf vyzvalaje najbujniejšyja technałahičnyja kampanii ad adkaznaści za źmiest paviedamleńniaŭ, źmieščanych na stvoranych imi płatformach. Takim čynam, kampanii Twitter i Facebook, naprykład, byli abaronienyja ad mahčymych sudovych pazovaŭ pa abvinavačvańniach u paklopie i abaronie honaru i hodnaści.
Letam minułaha hoda sproba administracyi pradstavić padobny ŭkaz pravaliłasia paśla taho, jak pradstaŭniki Fiederalnaj kamisii pa handli i Fiederalnaj kamisii pa kamunikacyjach vykazali pratest, zajaviŭšy, što padobny krok pieratvaraje Bieły dom u «palicejskaje padraździaleńnie». Heta niezaležnyja orhany, i jany nie padparadkoŭvajucca prezidentu.
Raniej «Tvitar» paznačyŭ dva tvity Trampa jak nie adpaviednyja faktam.
Ekśpierty sumniajucca, što prezident ZŠA moža svaim ukazam spynić dziejańnie 230-ha parahrafa Akta, pryniataha ŭ 1996 hodzie. Bolšaść ź ich sychodziacca ŭ tym, što rašeńnie prezidenta nieadkładna budzie asprečana ŭ sudzie.
Tym nie mienš, novaja inicyjatyva Biełaha doma moža prymusić najbujniejšyja technałahičnyja kampanii, u tym liku Twitter, Facebook i Google bolš ahresiŭna maderavać paviedamleńni ŭ sacsietkach dla taho, kab paźbiehnuć mahčymych sudovych pazovaŭ.
«Achviaraj» takoj palityki mohuć stać i tvity samoha prezidenta ZŠA.
Dla ŭniasieńnia źmianieńniaŭ u zakon spatrebicca adpaviednaje rašeńnie Kanhresa, ale na Kapitalijskim pahorku ŭžo dali zrazumieć, što nie źbirajucca padtrymlivać inicyjatyvu Donalda Trampa.
U tvitach Trampa, jakija administracyja sietki paznačyła jak nie adpaviednyja faktam, havaryłasia ab tym, što pašyreńnie hałasavańnia pa pošcie stvoryć umovy dla maštabnych ukidaŭ. Tvity z hetym papiaredžańniem pa-raniejšamu dastupnyja ŭsim. Tym časam usie daśledavańni paštovaha hałasavańnia ŭ ZŠA pakazvajuć na toje, što machlarstva — vielmi redkaja źjava.
Kiraŭnik Twitter Džek Dorsi, sa svajho boku, napisaŭ: «My praciahniem pakazvać na niasłušnuju abo sprečnuju infarmacyju pra vybary va ŭsim śviecie».
