Treciaja śmierć miedyka ŭ Barysavie. Sanitar pamior ad pnieŭmanii na nastupny dzień paśla špitalizacyi
Uładzimier Frałoŭ pracavaŭ sanitaram u bryhadzie chutkaj dapamohi ŭ Barysavie. 18 traŭnia jaho špitalizavali z padazreńniem na infarkt, a na nastupny dzień jon pamior u reanimacyi. Vyjaviłasia, što pryčynaj śmierci stała pneŭmanija. Kalehi miarkujuć, što sanitar byŭ chvory na COVID-19, piša «Radyjo Svaboda».
60-hadovy Ŭładzimier Frałoŭ bolš za 20 hadoŭ pracavaŭ na stancyi chutkaj dapamohi ŭ Barysavie. Spačatku kiroŭcam, a ŭ apošnija hady — sanitaram. Pra heta «Svabodzie» raskazaŭ znajomy Ŭładzimiera, medyk z centralnaj rajonnaj lakarni ŭ Barysavie.
Padčas epidemii karanavirusu Ŭładzimier pracavaŭ u bryhadzie, jakaja pieravoziła pacyjentaŭ na mašynie chutkaj dapamohi. Tych, chto mieŭ paćvierdžany COVID-19, jahonaja bryhada nie pieravoziła. Adnak heta nie vyklučaje mahčymaha kantaktu ź infikavanymi karanavirusam, skazaŭ medyk z Barysava ŭ razmovie z karespandentam «Svabody».
«Medyki z takich bryhad časam mienš dbajuć pra svaju biaśpieku, bo ličycca, što ŭ ich mienšaja ryzyka natrapić na pacyjenta z karanavirusam, — skazaŭ barysaŭski medyk. — Ale heta ŭsio adno niebiaśpiečna».
Pavodle jaho, Uładzimieru stała błaha 18 traŭnia. U hety ž dzień jaho špitalizavali z padazreńniem na infarkt. U toj ža dzień pakłali ŭ reanimacyju. Na nastupny dzień sanitar pamior.
Śmierć sanitara paćvierdziła kiraŭnictva stancyi chutkaj dapamohi pry centralnaj rajonnaj lakarni ŭ Barysavie. Pa słovach zahadčyka, Frałoŭ pamior ad infarktu.
Jak stała viadoma redakcyi, u paśviedčańni ab śmierci Ŭładzimiera Frałova napisana, što pryčynaj śmierci staŭ syndrom reśpiratarnaha rasstrojstva, vyklikany dvuchbakovaj pneŭmanijaj. Pry hetym kalehi ličać, što va Ŭładzimiera Frałova byŭ i karanavirus.
Heta treciaja śmierć medyka ŭ centralnaj rajonnaj lakarni Barysava padčas epidemii karanavirusu. 8 krasavika pamior felčar chutkaj dapamohi Vasil Lipinin, a 16 traŭnia — medsiastra Taciana Kavalonak. Aboje mieli paćvierdžany karanavirus.
U Barysaŭskim rajonie pad lačeńnie chvorych na pneŭmaniju i COVID-19 pieraprafilavali dźvie lakarni — haradzkuju №2 i ŭčastkovuju lakarniu ŭ vioscy Łošnica. Ahułam heta kala 500 łožkaŭ. Taksama častku pacyjentaŭ adpraŭlajuć u špitali Žodzina i Krupak.
«Nieviadoma, ci rabili test uvohule, — kaža supracoŭnik špitala. — Maja dumka, što heta byŭ karanavirus. Vielmi vysokaja imaviernaść. Ad zvyčajnaj pneŭmanii ludzi nie pamirajuć na druhi dzień».
U dokaz taho, što ŭ sanitara moh być karanavirus, medyk pryvodzić toj fakt, što ŭskryćcio cieła Ŭładzimiera rabili nie ŭ Barysavie, a ŭ Mienskim abłasnym morhu. Tudy zvyčajna advoziać niabožčykaŭ, jakija abo dakładna pamierli ad karanavirusu, abo miarkujecca, što heta tak.
