Viktar Marcinovič pra vybary-2020: Chitryki bolš nie pracujuć
Fota Nadziei Bužan
Viktar Marcinovič na budzma.by razvažaje pra sioletniuju vybarčuju kampaniju, jakaja zajmieła niečakana aktyŭny start.
Jašče ŭ pačatku krasavika ja zaznačyŭ tut, što hod vytancoŭvajecca duža niezvyčajny. Vykruntasy, jakija cudoŭna spracoŭvali ŭ 2019-m, ciapier viaduć da advarotnych nastupstvaŭ.
Za toj dopis šmat chto pryličyŭ mianie da «mistykaŭ», ale čym dalej, tym bolš paćvierdžańniaŭ toj intuicyi ja baču navokał.
Vyhladaje, što 2020-y chranična nie dapuskaje krucielstva.
Jak usio cudoŭna było prydumana: zładzić vybary ŭ pieršaj tracinie žniŭnia, kab zbor podpisaŭ prypaŭ na čas vakacyj, kali ŭsie musiać adpačyvać u Ispanijach ci ŭ Antalii! I chto ž moh dapuścić situacyju, kali paŭsiudny karancin zamknie samych aktyŭnych biełarusaŭ na radzimie! Jak najmienš da lipienia, bo raniej vonkavyja miežy šenhiena nie adkryjucca!
Chto moh pradbačyć, što staŭka na «kvołyja», «niezaŭvažnyja», «prachadnyja» vybary abierniecca voś takim startam kampanii! Pry tym, što patencyjnaja «płošča» prypadaje ciapier nie na śniežań, a na samuju ciopłuju paru, kali chałady nie buduć vyciskać narod z vulic.
Jaki pryhožy, techničny byŭ płan z abviaščeńniem vybaraŭ za dzień da parada Pieramohi! Kab, suzirajučy šerahi bajavych mašyn, a paśla hledziačy salut i radujučysia na viečarovym kancercie, nacyja ŭ adzinym paryvie źliłasia vakoł łozunha «Za Biełaruś» i tych, chto jaho ŭvasablaje!
I čym ža ŭsio skončyłasia? Na kancert i parad daviałosia raźmiarkoŭvać tych, chto tudy, miakka kažučy, nie imknuŭsia. Vyćcio ŭ sacyjalnych sietkach, «źlivy» ŭ telehram-kanałach. Usienarodnaja kansalidacyja pieratvaryłasia ŭ takoje ž, na ŭsiu krainu, asudžeńnie.
Jaki cudoŭny byŭ krok ź niejtralizacyjaj Cichanoŭskaha — i jak harantavana takija kroki spracoŭvali raniej! Sutki, viaźnica, a potym jašče i papraknuć, što naŭmysna na rehistracyju nie pryjšoŭ, bo zabajaŭsia parazy! Ale tut padaje papiery jahonaja žonka. I ŭ jaje prymajuć dakumienty, bo ličać, što asnoŭny vorah užo paralizavany. I raptam pakinuć aŭtohraf toj žoncy vystrojvajecca čarha ad Kamaroŭki da mietro!
Cudoŭna, jaskrava, z ahańkom prakacili ŭsich «kandydataŭ pratestu» Statkieviča! U «Tvitary» navat pačali paśmiejvacca, maŭlaŭ, nu što, spadar Mikoła, dahulaŭsia ŭ «Counter Strike» z čytarami? Ale adzin čałaviek, jakoha vyrašyli, nie inakš z pačućcia žalu, usio ž dapuścić da zboru podpisaŭ, ładzić toj samy pikiet la Kamaroŭki, jaki dazvalaje Statkieviču spracavacca ź Cichanoŭskim. I voś my majem samy vialiki pohałas ad sustrečy pa zbory podpisaŭ za ŭsiu historyju biełaruskich vybaraŭ.
Čort jaho viedaje, što pačało pracavać suprać zvyčajnaj zaviadzionki. Čamu čałaviek, adsiedzieŭšy 15 sutak, vychodzić z astrohu nie złomlenym i nie pačynaje miamlić, jak šmat chto rabiŭ dahetul. Mietady nie źmianilisia — ni ŭ sistemy, ni ŭ tych, chto joj supraćstaić. Ale pracavać usio stała pa-inšamu.
Mahčyma, u hetaje ŭraŭnieńnie prosta dadałasia taja samaja bolšaść, jakaja raniej vahałasia. Mahčyma, takim čynam, i raniejšyja płany byli pracazdolnyja, prosta im brakavała cikaŭnaści da tych, chto tyja płany prydumlaŭ i ahučvaŭ.
Ciapier ža za što ni vaźmisia, ad baraćby z karanavirusam (jak tam z vakcynaj, Alaksandr Mikałajevič?) da «vypłat miedykam», — padman vyłazić i reža vočy. Heta jak z toj situacyjaj u Babrujsku, kali miedyki «chutkaj» vyrašyli ŭmiašacca ŭ zapis siužeta dla televizara.
I kali zvyčajny pikiet pa zbory podpisaŭ błohiera, jaki navat nie dapuščany da kampanii, i pratestnaha palityka, jaki taksama nie zarehistravany, uzdymaje taki verchał, dyk ci nie sapsujecca i ŭsio astatniaje?
Tyja samyja vybary.
Toj padlik hałasoŭ z papiarednim daterminovym hałasavańniem.
Kali padumać hałavoj, dyk tam niama čamu «łamacca». Usio adpracavana, zmazana, cikaje i nikoli nie pamylajecca. Ale kali padumać mienavita hałavoj, taho, što adbyłosia ŭčora la Kamaroŭki, taksama być nie pavinna było. Dyk čaho čakać 10 žniŭnia? Jakich vynikaŭ?
U padliku i abviaščeńni samy hałoŭny ŭdzielnik — biełaruskaja namienkłatura, jakuju isny raskład stavić pierad niaprostym vybaram. Ci to «płošča» z mahčymym prychodam da ŭłady vielmi radykalnych tavaryšaŭ — u vypadku, kali znoŭku budzie abvieščany pieramožcam niepažadany hetym tavaryšam kandydat. Ci to kampramisnaja pieramoha łahodnaha kandydata, jaki navat publična ahučyŭ, što falsifikacyj «pakul» u Biełarusi nie było (a značyć, prabačać usich, chto pracavaŭ i ŭ 2010-m, i ŭ 2015-m).
Adno mianie turbuje.
U hetaj krainie pracesami kiravali dźvie stychii: krucielstva, jakoje dazvalała hramadzianam padmanvacca, i brutalnaja siła (padklučałasia ŭ vypadku, kali znachodziłasia šmat tych, chto vieryć pierastavaŭ).
To chočacca, kab hetyja siońniašnija tryumfy nie skončylisia vielizarnym šuchieram i tatalnym hvałtam, a potym — najhłybiejšym pachmiellem, ź jakoha kraina nie vykaraskajecca jašče 10 hadoŭ.
